Pasal 8
Bu tandali sok go
1
Ngga ey, bayi ba sogo, Noak ey menay-naklay eygo sogo kunala, Ki Wali Iram gemang duing. Nggano, nebit kangok go Ki Wali Iram lo uluing golo, bu gemang sok!
2
Buput-buput yam so wik-sing go, nggano, ut blo sik sogo bu tandali go kua pipi.
3
Kukunan blo bu yamso sok go, e… ku 150 yam no pung go, kukunan blo bu gemang gluk.
4
Banu taidisonamon tete sogo ku 17 no pupung gono, meduim Ararat blo no bayi gemang lit.
5
Banu tanamon sono dedegut go, bu se tetebuo. Seni so, banu tanamon, ku klaya tete, banu ngga no, kumeduim seding pung go gemang ikum.
Wi Walom ey Yagui ey Nuh lo itak go
6
Ku seduesinamon tete no bayi taput Nuh lo gemang tenuing.
7
Ngga no, biap blo wi Walom-a, Nuh lo gemang itak-nawon. Wi ngga, nggesono-nggasono bu blo lo teguom-tenawon. No, kukunan blo bu maning kua lek.
8
Ngga ey, wi Yagui-a wayso, Nuh lo gemang itak-nawon. Nemot lo ikum go, senong genang, nan blo bu mo pat, maning?
9
Wi Yagui ngga pling go koklong go, masi gualing genang sip kua goso, bayi ba sono Nuh mit no tandali pling go weng go gemang pung. Wi ngga Nuh lo mlak go, bayi ba sono gemang degut.
10
Ngga ey, Nuh bung-ton, ku taidisonamon tete no, bayi ba sik sogo, wi Yagui tandali gemang itak-nawon dali.
11
Ku yam so, use sono pupung, bayi ba sono Nuh mit no, di Saytun blup ey lom no kedik go, wi Yagui tandali gemang pung. Ngga ey, Noak gemang senong, kukunan blo bu maning sosok, no diblup mo pupung!
12
Ku taidisonamon yam so, Nuh bung-won gono, wi Yagui ngga tandali gemang itak-siwon. No, tandali go nemot mit nogo, wi Yagui kua iwot go pung. Ngga ey senong go, nan blo sogo bu yam so mo lek. Ngga banu klaya tete ku klaya tete no, kukunan blo bu yam so sok go.
13
Bu klak go logo kukunan blo tandali yam so pat go ku nogo, Noak go yagui 601 no mo pung. Ku ngganemot no, yataput tenung go, Noak gemang ikum, e… bu yam so mo lek ba!
14
No, kukunan blo bu, banu namon tete, ku 27, banu ngga ba no nan blo bu yam so gemang pat.
Taitinang so Ki Wali Iram sono Noak lo puit go
15
Ngga ey, Nuh sono Ki Wali Iram lo pu go,
16
“Mot go duo-kabung ey, bayi ba sik sogo pluep-lak a!
17
Menay wi-dasi, tak-lema, kati-kabot, nebo-isuali, naklay wawi go motnang ey se pluep-lak. Nemotnang ngganemot lo, kukunan blo nase ke-sing.”
18
Ngga no, bayi ba sik sogo, nemot go duo-kabung naklay ey, Nuh gemang pung.
19
Bayi ba sik sogo, menay wi-dasi, tak-lema, kati-kabot, nebo-isuali, nemotgo-nemotgo naklay pung dali go gemang klong-lak.
20
Ngga ey, demusung Woy Wali Iram nogo so Noak lo kong go, menay dedam go, wi dedam go ikak-sing go, taitinang so Ki Wali Iram sono, Noak lo gemang puit-biwon.
21
Kinemon teguop ngga dop-kunuon go, dabui ba lo Woy Wali Iram gemang pu-ton, “Yang! Tandali go, kukunan blo sikabung mea kua suep-srelu. Nemot nemot-a, tui go sik so piam go-a mata so sesemu go. Kukunan blo menay naklay ngga kalik dali sang! Kisebui ngge kalik go, tandali go Genam lo meakua taling. Kukunan blo sogo menay, sikabung tandali go meakua but-srelu.
22
Yang! Kukunan maning gigit go nogo, usukuali-wasmaiti, sapu-woypli, kuklik-kublong, yaguisa-woydalu tong yakua tong, senang so mea koklong.”