¹ Ngga ey, Woy Wali Iram go nebut, Noak sono gemang kuntun, “Yang, Genam ikum go, nggeasui go ku no wali go seduekabung tang ngge, senieygo nemudi sogo sedue, mot seguong-a klaya. Bayi ba sono mot-a, mot go yap tenglam naklay ey nase degut. ² Ngga ey, dedam go menay taidisonamon yam so, wawi go bayi ba sono se klak. Kagot sogo menay-a, tangyam-tangyam so, kemsi klaya unen klaya yam so wawi go se klak dali! ³ Wi-a, kemsi taidisonamon unen taidisonamon yam so wawi go se degut. Kukunan blo nogo, nok tandali go ngga lo srui genang. ⁴ Woy Wali Iram lo pu go, “Genam sik sogo sa pu genang, ku taidisonamon yam so gabe itak-satun. Sa ngga kuklik-kublong 40 yam so mea pu-ayun. Kukunan blo sogo taut Genam lo semu go ngge naklay, bu ngganemot lo mea suep-sing.” ⁵ Noak sono, Woy Wali Iram go nebut kuntun go kalik seni gemang pluok-nawon. ⁶ Kukunan bu lo kenok go ku nogo, Noak go yagui 600 no mo pung. ⁷ Ngga ey, bu kenok genang tang sogo so, danonnang, senunnang duokabung-yap ey, bayi ngga ba sono Noak gemang degut.* ⁸ Dedam go menay kagot sogo, wi-dasi, tak-lema, menay tangmeno-tangmeno naklay, unen ey-kemsi ey, ⁹ Woy Wali Iram lo pu go kalik, Noak mit no, bayi ba sono weng go gemang blongot-lak. ¹⁰ Ku taidisonamon yam no pung go, kukunan blo bu lo se kekenok. ¹¹ Ku ngganemot nogo, Nuh go yagui, 600 yam no. Banu namon tete, ku 17 no, kukunan tegek go, buput-buput ngang so tenuing go, nan ba sik sogo bu yelung ey, ut blo sik sogo bu ey gemang pi.* ¹² Sa watui kangok so pu go, e… kublong-kuklik 40 yam no, kukunan yam so bu lo se kenok. ¹³ Yang, ku ngganemot dali no, Nuh ey danonnang, Sem, Ham, Yapet, nggano senun ey, duokabung-yap ey bayi ba no gemang degut. ¹⁴ Seni so, ku ngganemot nogo, menay sukmeno-sukmeno, duen sik sogo, yakena no popong go sik sogo, tak-lama, nebo-isuali, widasi, kati-kabot naklay, bayi ba sono gemang degut-lak ¹⁵ Nebuem nebit eygo menay sukmeno-sukmeno naklay unen-kemsi, Nuh mit sono bayi ba sono gemang weng-lak. ¹⁶ Menay degut-lak go ngga, kemsi ey unen ey, Ki Wali Iram lo Nuh no pu go kalik. Ngga ey, Nuh go taton no, bayi yatap Woy Wali Iram lo gemang kadun ¹⁷ Ku 40 yam so kukunan blo, bu ngga lo kenok go e… nan blo sik sogo, bayi-a blo sono bu klak golo gemang i-iti. ¹⁸ Bu yam-yam betugun go, keda so se keklak, kukunan blo, bu blo logo, bayi seguong-a klong-uweng. ¹⁹ Kangok so bu ngganemot klak go nogo, meduim kangok-kangok go kukunan blo, yam so se saguip. ²⁰ Kukunan blo meduim bu ngga keklak golo yam so saguip go, meter taidisonamon* yam no gemang pung. ²¹ Kukunan blo lo uwet go naklay, yam so se leguot. Menay sukmeno-sukmeno, widasi, tak-lema, kati-kabot, nebo-isuali, blim sogo, seduekabung lo popong go, kukunan blo sogo seduekabung naklay yam so se leguot. ²² Yang, kukunan blo sogo, nebuem nebit eygo, yam so se lam-anatun. ²³ Kukunan blo sogo taut naklay, menay sukmeno-sukmeno, widasi, tak-lema, kati-kabot, nebo-isuali, seduekabung, ngga kalik Ki Wali Iram lo gemang suep. No, Nuh ey bayi ba sogo seduekabung eygo-a gemang wali. ²⁴ Bu lo kukunan blo kenok-anangum go ku 150 yam so.