Pasal 6
Sikabung ba so senang so Genam go Waglo yakua suing
1
Kukunan blo nogo sikabung, yam so ke go. Kabung denok tiat, nemotnang lo gemang tui-sing.
2
Kabung denok tiat ngga, kiwali duo-yap lo ikum go, teguop-teguop titiat. Ngga ey, senunnang so, nemotnang go duiduing no gemang ikak.Nggano, kabung kaguit tiat ey kiwali duo-yap lo saduikenok go, nemotnang nogo so, duo gemang tui-sing.
3
Duo ngganemot, sedue seguong so kua wang, no, kiwali duo-yap so gemang pang dali. Yang! Nemotnang ngga, kuduong so got-nengam go, tang babu go sikabung, don eygo, sui dega eygo tang.
Ku ngganemot no, Woy Wali Iram lo pu go, “Yang, kedong-a semu go sikabung. No, senang so Genam go Waglo sikabung ba sogo yakua suing. Nemotnang wali genang yagui 120 yam seguong so mea.”
4
Nggano, kabung kaguit tiat ey kiwali duo-yap lo saduikenok go, nemotnang nogo so, duo gemang tui-sing. Duo ngganemot, sedue seguong so kua wang, no, kiwali duo-yap so gemang pang dali. Yang! Nemotnang ngga, kuduong so got-nengam go, tang babu go sikabung, don eygo, sui dega eygo tang.
Ku ngganemot no, Woy Wali Iram lo pu go, “Yang, kedong-a semu go sikabung. No, senang so Genam go Waglo sikabung ba sogo yakua suing. Nemotnang wali genang yagui 120 yam seguong so mea.”
Kukunan sikabung go taybat
5
Taybat pupluok genang takebali-a, naklay kangok so sikabung lo usey-neakam. Taybat ngga, Woy Wali Iram ikum-kunuon go,* esang!
6
Kukunan blo no semu go sikabung tang sogo so, dabui sadui kangok so gemang tra-Won.
7
Ngga ey, Woy Wali Iram lo pu go, “Sikabung, wi-dasi, kukunan blo sik sogo tang ey naklay mea buin-silu. Nemotnang semu go sik so, dabui sadui ey Genam mo tra.”
8
No, Woy Wali Iram go nemuku no Nemot lo klum go sedue, Noak-a klaya gemang.
Noak go wali
9
Noak go wali suing go ngge kalik.
10
Noak lo tui go sedue nangglik ey. Yangga: Sem, Ham, nggano Yafet. Noak ey wali go sikabung, nemot-a klaya, senieygo sedue, kuklue kua go. Nemot go wali, Ki Wali Iram ey takeduik go.*
11
No, esang! Kukunan ngge blo sogo sikabung temu, taybat lo naklay tram go, waluk go sogo so, tang ey mea buin.
12
Seni so, kukunan ngge naklay, Ki Wali Iram go nemuku nogo yam so mo waluk.
13
Ngga ey, Nuh sono, Ki Wali Iram lo gemang pu, “Yam so mo waluk go tang so, nemotnang naklay tang ey buin genang so, Genam mo pu gabe. Nemudi so, nemotnang kua koklong, kukunan naklay, nemotnang go taybat lo mo waluk. Kukunan ey nemotnang naklay kekayso, tang ey mea buin-silu.”
14
Nggano, Ki Wali Iram lo pu go, “Bayi kangok go-a “gofir” di lo mot lo klik lo go, degu ey se tong-sing. Taton-dabui, biapneli lo se sebut-sing, bu degut eygo.
15
Bayi ngganemot go yam, ngge kalik se: masiwalong 150 meter, kuibata 25 meter, nggano blo yam 15 meter.
16
Bayi ngganemot, ku da, nesip da, ngga ey blo da se dali. Blo nogo nenguon, ½ meter so yabla se tong dali. Ngga ey, yataput se sebut-sing dali.
17
Kukunan blo sono go, bu kangok go Genam lo pu go mea klak-ayun. Kukunan blo, utsegluop ngge ba sogo sikabung ey menay ey naklay, bu ngganemot lo kenok go yam so mea leguot-sing.
18
No, mot-a bayi ngganemot ba no degut go susuoy so se suing. Mot ey kabung ey, nggano, mot go duo-yap senunnang eygo-a se degut-lak. Ngga, mot eygo-a, Genam go tegadi gabe keduik-mleton.
19
Ngga ey, kukunan blo sogo menay widasi, tak-lema, namon so unen ey kemsi ey, tangyam-tangyam so, weng-lak go mot mit no mea pluep-lak.
20
Bayi ba sono, wawi go se degut-lak. Wali-wali so mot ey nemotnang suing genang.
21
Motnang dam genang ten, se ikak dali. Motnang tete sogo ey, widasi, menay lo dam genang ey se ikak dali.”
22
Ki Wali Iram lo pu go kalik seni so, Noak logo bayi gemang klik.*