Pasal 9
Sikabung go wali nogo nebut
1
Ku ngganemot no, Noak ey danonnang eygo blo nogo, Ki Wali Iram lo tabubluim gono gemang pu, “Sinok nase ke! Kukunan blo nemotnang lo se kenok.*
2
Wi-dasi, menay, ketui logo, bu ba logo, kukunan blo sogo blim sogo naklay mot go ta ba sono gabe itak.
3
Se duing! Genam lo mo pu: tatamang ulu-semu dedam genang gemang. No, nggeasui go sik so, kukunan sogo menay naklay motnang go tendam so se lemoy dali!
4
No, wali ey maning go menay, yangga kin eygo-a kagot sogo, kua dedam go! Se duing: wali eygo-a, kin logo so gabe taling.
5
Nggano, sikabung wali eygo-a, kin logo so gabe taling dali! Ngganemot sogo so, menay iseng eygo lo sikabung luk go sogo, menay sik sogo tang-usi way At lo gemang ya usi. Menay ngga se but go kebong. Nggano, seduekabung dali go kin seduekabung lo pi go sogo, tang usi go idekeba way At lo gemang ya taling dali. Kin so pi go seduekabung ngga, se but go kebong. Ngga Genam lo gabe pu-situgu.
6
Kua kay! Seduekabung ngge, Genam tang go nebuemnemu tamasi gabe. Seduekabung go kin nando lo pi go, nemot go kin way sedue lo mea pi dali.
7
Yang! Sinok nase ke! Kukunan blo lo, naklay nemotnang lo kenok go, tagu meakua i!”
Senang Tegadi’ Ki Wali Iram lo dok go gabe
8
Ngga no, Nuh ey danonnang eygo no, Ki Wali Iram lo pu go,
9
“Mot ey mot lo tui go duo-yap eygo nogo “Senang tegadi” gabe dok-situgu.
10
Menay, widasi, duen logo, nggano mot eygo naklay nogo so tegadi ngge gabe dok-situgu.
11
Tandali go sikabung ey menay eygo buklak go logo meakua leguot. Yang! Kukunan blo naklay, buklak go logo meakua kenok!”
12
Ngga kalik dali Ki Wali Iram lo pu go, “Motnang sikabung ey, kukunan blo sogo wali eygo naklay se tup! Genam go tegadi dok go don ey taling genang sogo,
13
Genam go ple-unen ut temoy no mea glung. Yangga, 'lemakuipukgo' ikum gono, senong genang, mot ey At ey tegadi mo dok.
14
Nago no, sa pu sogo so gum At lo semu go temoy no mea ikum, lemakuipukgo.
15
Ngga ikum go, se senong: Ki Wali Iram Nemot lo senang tegadi dok go nogo, mea duing dali: nago no sa pupu go, kukunan tandali go, sa kangok so pu go, bu logo meakua kenok!
16
Yang! Ut temoy no, sa pu sogo no gum ba lo lemakuipukgo ikum go, Genam go senang tegadi nogo mea duing.
17
Gano Ki Wali nembut mang pen nuh sno,"Ganemot kalik gemang tagedi ga wali Aya lo semugo Wali Aya ey imotnang naklay maning kukenan blo sno susuing go ey
18
Bayi ba sik so, danonnang ey Nuh pung go ngga, Sem, Ham, Yafet. Ham ngga, sedue Kanaan go nglangin gemang.
19
Yang! Nemot nanggglik ngge sik so, kukunan blo logo seduekabung wasey go, gabe ke-sing.
20
Se senong, usu sedue so Nuh lemoy go, kuduong sogo anggul usu klik gono, Nuh lo gemang kuali.
21
Ku meno no, anggul bu drop-nawon gono, Nuh puplu go, ulue so nemot go bala ba lo gemang to-tenawon.
22
Sedue Kanaan go nglangin Ham-a, nglangin Noak saysuk ulue sogo ikum go, klong go ntaton namon no gemang pen-nawon.
23
No, Sem ey Yafet eygo lo, amka iti go, yalu no but-klenawon go kui-kui lo klong go, nglangin go saysuk no gemang kebet. Noak saysuk ulue sogo nemotnamon kua ikum.
24
Suey dap-nawon gono, danon sat lo semu go Nuh tup gono,
25
Nuh lo pu-ton, "Kanaan mot mo piam!
Mot go aka ey sat-yap eygo
koybutasemu so mot se lemoy!
Mot go sui iway blo dega so!
Kanaan-a, Sem go koybutasemu so se lemoy.
Yang!
26
Yang! Woy Wali Iram no ta gemang kokong!
Mot Sem go Ki Wali Iram!
27
Mot go sui iway blo dega so!
Kanaan-a, Sem go koybutasemu so se lemoy.
Yang! Yafet lo tamlak genang nan
Ki Wali Iram lo bata so mea tui.
Nggano, Sem lo dali-dali klik go yap ba lo Yafet mea uwali.No, Kanaan-a Yafet go koybutasemu so mea lemoy."
28
Yang, bu klak go blo idi logo, Nuh wali go yagui 350 yam no.
29
Nuh go wali yagui naklay 950 yam no gemang ip-ngam.