Pasal 49
Danonnang no i go sogo nebut Yakob lo pen go
1
Ngga ey, danonnang usi gono Yakub lo gemang pu-tenawon: "Ngge sono motnang yaluim-sing-a! Motnang nogo nebut i go sogo ya pen-alu. Yansi go, sogo kalik motnang go wali ya?
2
Yakob go danonnang Yaluim-a!Ya, Yakob go danonnang se tup-lak!Mot go aya, Israel sono kama se tui.
3
Ruben dem, mot genam go duo trang.
Genam go don, genam go sebui kalong so seguoy go duo.Genam go don keduong sogo mot-a mo lemoy.
Genam go wali ba nogo mot-a banim bisi go.
4
No, bu kalik keda so mot sesegueng.
Ngga tang so, mesip sono mot mo tenguo.
Aya go sipsrek blo no mot lo mo klak.
Aya go teguop sip mot lo mo guot.
5
Nggano, Ntaton-ntaton eygo,
Simeon dem ey Lewi dem ey,
nemotnang go ple, don ple gemang.
6
Nemotnang go nebut pu go ba nogo,
genam go dabui yakua keng.
nemotnang yaluim go ey,
klay gono at go waglo yakua tebok.
Dabuipiam tang sogo so
nemotnang lo sedue but go mo kebong.
Nggano, dabuisadui tang so,
menai go ituon klaya go mo tong.
7
Nemotnang go dabuipiam-a, piam so gabe pupu.
Yang, nemotnang go dabuipiam, kangok dega don ey.
Ngga tang sogo so nemotnang,
Yakob go danonnang ba sono,
genam lo gabe uwasey-sing.
Nggano, Israel go danonang ba lo,
nemotnang mea suep-lak.
8
Yehuda dem! Mot iway-a teguop so,
mot go aka-sat-yap lo mea iti.
Mot go ta lo plesi go susudon mea kenok.
Mot go aya go danonnang,
segabuem, mot nogo so mea unuik.
9
Singa nok kalik Yehuda mea;
Menay luk go sip blo dega sogo no, mot-a mea klak.
O, dem sop! Singga nguot kalik, singa unen kalik so,
ku lo srek go nemot mea kekatik.
Nando logo so, nemot ya senglok?
10
Iram go blongdonsipsuing,
Yehuda go sik sogo yakua rlo-sing.
Wengkabui so tamlak go taling genang,
nemot go masi sik sogo yakua rlo-sing,
e … Iram seni nemot mea pung-yon.
Nemot go masi ba no,
saula-saula mea suing-lak.
11
Anggul nuik temoy no,
nemot go keleday mea keduik.
Nggano, anggul kuoygo temoy no,
nemot go keledaynok mea keduik;
nemot go amka anggul bu lo mea ulu;
ngga ey, nemot go amka tawalong go
anggul kin no bu mea ulu.
12
Anggul logo tang so,
nemot go nemu mea bom,min ip kalik klaut so nemot go wasrang mea.
13
Zebelon dem!
Biap ketang lo Zebelon mea suing-lak.
Bayi kokok go sip so nemot mea lemoy.
Nggano, Sidon go teglo idi lo,
nemot go sangyam mae suing.
14
Isakhar dem!
Keleday go don kalik don ey
Isakhar-a mea suing,
saysuk lo kedik goso ku lo kekatik go,
15
Nemot lo ikum go nimla sip ngga suey,
nggano nan ngga teguop seni.
Nemot lek genang sogo, yalu mea kok.
Ngga ey, koybutasemu so mea lemoy.
16
Ngga no, Dan dem!
Nemot go saula tang,
tang Israel meno kalik,
Dan lo mea neyboy-sing.
17
Tap nogo Lema kalik, Dan mea lemoy,
kuda go masiwisi nogo kalik,
lemakupiam golo mea glok,
ngga ey, taton sono nemot no klak go mea pui.
18
Oh, Woy Wali Iram!
Mot sik sogo susuoy ku so, genam gabe bubung.
19
Gad dem!
Sedue tang meno lo,Gad nogo plesagui mea semu.
No, nemotnang go masikemungdon no,
nemot lo mea gong-sing.
20
Asyer dem!
Nemot go ten miam ey mea,deguena-deguena nogo tennemot lo mea iti.
21
Naftali dem!
Rusa unen tegan plet go kalik Naftali mea;
duo teguop-teguop go-a, nemot lo mea tui-sing.
22
Yusuf dem!
Tatamang don imening tagot go kalik nemot mea,
bumu ketang nogo didon demening go kalik so.
Nemot go kali-kali klak go yap blo sono mea.
23
Nemot-a, ple eygo sedue lo yat go,
nemot truik go ple lo sruom go,
24
no, nemot go ple don ey senang so mea gigit.
No, nemot go tanakom-a mea gigit,x
Yakob yay so suing go Kiki Iram logo tang so,
Israel go Kuikikling, nemot yay sogo logo tang so,
25
mot go aya go Ki Wali Iram logo so mot nogo mea tebok.nggano, Ki Wali Iram Don Iram lo,
mot nogo taitigualaklum,Ki Wali yakena sik so mea li,
biapbu kukunan so gigit go sik sogo,
min ip ey sani ey go sik sogo duo lo.
26
Mot go aya logo taitigualaklum kangok
kuso semu go kumeduim ey kua kerlam,
yangngga tom kangok go,
yagui no-yagui nogo meduim ey kua kerlam go;
Yusuf go wengkabui blo no ngga naklay mea kiking,
sedue teguop go, wengkabui blo no mea lili
nemot go ntatonnang nasip no.
27
Benyamin dem!
Menay mlak sogo serigala kalik, Benyamin dem;
wadikua go menay mea dam
use go plesi logo nemot lo gluik go mea uwasey."
28
Yangga Israel tang naklay, 12 yam sogo; nggano ngga nemot go nglangin lo nemotnang nogo so pen go. Ku nemotnang no taitigualaklum so tui go nogo; nemotgo-nemotgo nemotnang nogo so mo pu. Taiti ngga nemotnang klay-klay no gemang iti.
Yakub ip go no tuet go
29
Ngga ey, nemotnang no Yakob lo gemang pu: "Nago no, genam babunang sono yaluim go, babunang mit no genam se klong go tui-kenalo! Usu Efron sogo demuput, sedue Het ngga logo ba no.
30
Usu Makpela sogo demuput, nan Kanaan so di Mamre woy klak idi sogo no. Efron sedue Het ngga sik so, duoy lo Abraham lo nay go usu no. Nemot go simu sip so lemoy genang sogo so.
31
Abraham ey senun Sara ey ngga no gemang tui; Isak ey senun Ribka ey go ngga dali no gemang tui,
32
Ngga dali no, Lea gemang tui. Demuput ngga usu ey sedue Het sik so duoy lo mo king go gemang."
33
Danonnang no, nebut yam so pen-nawon gono, sipsrek blo sono masi lek-biwon go. Nggano, nemot gemang ip. Nemot go nglangin nang ey, nemot gemang yaluim.