Pasal 48
Menase ey Efraim eygo blo no taitigualaklum Israel lo tui go
1
Ngga ey, sedue weng go, Yusuf no gemang pen: "Aya sadui so gemang!" Nggano, danonnamon Menase ey Efraim ey wawi go, nglagin ikum so gemang klong.
2
Pung gono, nglangin Yakob no gemang pen-nenawon: "Mot mit sono, mot go duo Yusuf ngge weng go!" Israel saysukdon kok go, buong gono, sipsrek blo no gemang got-nawon.
3
Yusuf sono, Yakob lo gemang we-tenawon: "Nan Kanaan sogo Lus no, genam ey Ki Wali Mani Iram tegu gono, genam nogo taitigualaklum mo tui.
4
Ngga ey, Ki Wali Mani Iram lo genam no pu go: "Mot go duo At logo tang so mo ke-to. Yang, mot miam dega ey Genam lo mea ke. Saula tang miam eygo, kangok goso yaluim go mea lemoy. Nan ngge, mot sono Genam lo mea itak-lu. Mot go nan so senang so lemoy go mea gigit.
5
Nggeasui go, nan Mesir no genam maning kua weng gono, mot nogo so, nan Mesir no, mot go duo namon ey tui go. Nemotnamon ngga, genam tete sogo duo gemang. Efraim ey Menase ey ngga, genam go gemang, Ruben ey Simeon eygo kalik dali.
6
Ngga no, nemotnamon bu no tui-lo genang sogo-a, mot tete sogo gemang. No, nemotnang tete sogo, ntatonnamon go sui no mea pu dali.
7
Se senong, Padan sik so genam uweng gono, nan Kanaan no, Efrata sik sogo tapmasi maning kua walong gono tap no, mia Rahel mo kebong. Ngga ey, Efrata tap ketang no mia Rahel gemang tuet. Ngga, – Betlehem. no.
8
Yusuf go danonnamon ikum gono, Israel lo gemang usi: "Ngga nando?"
9
Nglangin sono, Yusuf lo pu go: "Ngge, at nogo so ngge no Ki Wali Iram lo iti go duo." Ngga ey, Yakob lo pu go: "Genam dagu sono nemotnang weng-a, nemotnang blo nogo, at tatui-lu sogo."
10
Yang, Israel nemot, sedue seni nogo, nemu mo kli, suey sogo ya kua ikum. Ngga ey, nglangin sono Yusuf lo, danon namon gemang wawi. Nglangin Israel lo, nemotnamon teguot gono, mla gemang tueng.
11
Ngga ey, Yusuf sono Israel lo gemang we-tenawon: "Seni so, genam logo kua duing: ‘mot go nebuemnamu tandali genam ikum genang sogo.’ No, Ki Wali Iram lo nggeasui go, mot go duo genam mo ikum dali."
12
Ngga ey, nglangin go isegabuem sik sogo Yusuf lo nemotnamon lek gono, Yusuf unuik go e… nebuemnemu nan no.
13
Ngga ey, danonnamon Yusuf lo mlak go, Efraim-a tasemla idi lo, ngga Israel go takalik idi no. Menasye-a takalik idi lo, ngga Israel go tasemlea idi no. Nggano, dagu sono Israel sono gemang leguit.
14
No, Efraim go wengkabui blo no, tasemlea-a Israel lo sra go gemang tui. Nemot-a, Efraim ngga sat sogo dou. No, takalik idi-a Menasye blo no gemang tui. Nemot go ta kluadong so gemang sra. Yang, seni so, Menasye ngga trang sogo duo.
15
Ngga ey Yusufu nogo taitigualaklum tui gono gemang pu:"At go babu ey aya Isak eygoKi Wali Iram go suongku no mo wali;
Ki Wali Iram ngga,genam yay so suing go Ki Wali Iram
genam go wali ba nogoe… nggeasui gono gabe pung.
16
Ngga, genam so piam sik so,senang so lelek go Ki Wali tamot so mo lemoy.Duonamon ngge blo nogo taitigualaklum,Nemot lo mea iti!Ngga tang so, genam go sui,nggano genam go babuAbraham ey aya Isak eygo sui,nemotnang tang sogo so,naklay mea senong,ngga tang so nemotnangkukunan blo nogo miam dega so,tang kangok goso mea lemoy."
17
Yusuf ikum go, Efraim blo no tasemla-a aya logo ba tui. Nggakalik go, Yusuf lo duing go piam so. Ngga no, nglangin go ta mlak go Menasye go wengkabui blo sono suey so tui genang so.
18
Nggano, nglangin sono Yusuf lo pu go: "Aya! Ngga kalik so kua! Ngge, duo trang sogo gabe. Duo trang sogo blo no, tasemlea-a se tui."
19
No, tenguo gono nglangin lo gemang pu: "Genam mo senong dem sop, genam mo senong! Nemot ngga, suala tang meno, babu goso mea lemoy. Nggano, nemot don kangok goso mea lemoy dali. Nemot-a ngga kalik go, nemot go sat-a don dega-ey goso mea lemoy. Nggano, ntaton sat go duo lo, saula tang miam eygo so mea lemoy."
20
Ngga ey, woy ngganemot no, nemotnang nogo taitigualaklum gemang wadong. Israel lo pu go: "Mot go sui pupu golo, sedue Israel gono klum mea uweng. Ngge kalik so: mot Efraim ey Menasye eygo kalik Ki Wali Iram logo so mea lemoy." Ngga kalik Efraim-a banim, Menasye-a mesip so mea lemoy.
21
Ngga ey, Yusuf sono Israel lo gemang we-tenawon: "Ku Walong kua gono, genam mea ip-lu. No, Ki Wali Iram motnang ey mea suisuing. Nggano, babuasi go nan sono wawi go tandali mea klong dali.
22
Ngga no, mot no genam lo iti go tete, mot go akanang sik sogo, nggeasui go gabe iti. Kumenduim Shikem, genam go ple ey tengang eygo lo, sedue Amori logo guik go ngga, mot no gabe itak."