¹ Nggano, Firaun no Yusuf klong go gemang pen: "Nggeasui go, at go aya ey akanang eygo, kambing-domba, sapi-lembu, nan Kanaan sik sogo taut naklay, nan Gosyen so nemotnang ey gemang." ² Ntatonnang sik sogo sedue taidi wawi go Firaun sono gemang klong. ³ Yusuf go ntatonnang sono, Firaun lo gemang usi: "Motnang go kebali sogo?" Firaun sono, nemotnang lo wa go: "Atnang go kebali, domba yay sogo sedue. Atnang go babu asi sik sogo, menay yay sogo sedue." ⁴ Nggano, Firaun no nemotnang lo pu go: "Nan ngge no, glop so amble kalik atnang weng go. Seni so, atnang go menay nogo neguen usu kua dali. Nan Kanaan nogo, ten kua go kluongku kangok go tang so. Nggeasui go, aya ya yang go, nan Gosyen no Atnang ngge ya suing?" ⁵ Ngga ey, Yusuf sono Firawon lo pu go: "Aya ey, mot go akanang ey weng go, genam ey mo tegu. ⁶ Nan Mesir ngge mot nogo gabe. Aya ey mot go akanang eygo nogo, sip suey go-a taling-a, nemotnang suing genang sogo. Nan Gosyen no itak go nemotnang suing-a. Ngga no, kunala kalong eygo sedue nemotnang sik sogo, mot mo senong go-a, genam go menay yay suing genang so se taling-lo dali." ⁷ Nglangin Yakob Yusuf lo wawi go, Firaun no gemang klong. Ngga ey Firaun blo nogo taitigualaklum, Yakob lo wadong genang so. ⁸ Nggano, Yakob sono Firaun lo usi go: "Aya go yagui nggeasui go kata no?" ⁹ Firaun sono Yakob lo wa go: "Genam go yagui tapkulo, amlesaulameno kalik wet go, 130 yam no. Genam go wali yagui ngga yam nogo, ngga nangglik dato eygo ngga piam dali. At go asibabu logo yagui ey kua kerlam. Yangga, nemotnang lo tapkulo, amble kalik wet go yagui." ¹⁰ Ngga ey, Firaun nogo taitigualaklum Yakob lo gemang wadong. Nggano, Firaun go suongku sik sogo, Yakob pung go gemang klong. ¹¹ Nglangin ey ntatonnang ey suing genang sip, Yusuf lo gemang taling. Nggano, nemotnang nogo nan, nan Mesir nogo gemang taling. Nan Mesir sogo sip suey go seni, nan Rameses, Firaun lo pu go kalik so. ¹² Ngga no, nglangin yay Yusuf lo suing go. Ntatonnang nggano nglagin go yaptenglam naklay nogo, nemotnang go duo-yap nogo miam eygo kalik.

Takebali Yusuf lo pupluok go

¹³ Nan ngga naklay ten yam so se kua. Kluongku ngga kangok dega go nogo, nan Mesir ey nan Kanaan ey naklay ten lo yam so don wakot. ¹⁴ Nan Mesir sogo duoy naklay, Yusuf lo gemang yaluim. Nggano, nan Kanaan sik sogo nemot dali. Yangga, gandum so nemotnang lo nay go duoy. Nggano Furaun sono, istana ba sono, duoy ngga Yusuf lo iti go gemang yaluim. ¹⁵ Nan Mesir ey nan Kanaan eygo sogo duoy yam so kua go. Sedue Mesir meno, weng go Yusuf no gemang pupu: "Atnang nogo ten iti-a! Sogo so, mot go suongku no atnang ya kebong? Atnang go duoy, seni so yam so mo kua." ¹⁶ Yusuf lo wa go: "Duoy kua go, mot go menay-a se iti. Mot go menay way sogo, mot no genam lo ten-a mea iti." ¹⁷ Ngga ey, Yusuf sono nemotnang go menay kuda, sapi, domba, keleday way sogo ten-a yagui ngga nogo gemang nay. ¹⁸ Ngga ey, yagui ngga yam gono, yagui namon tete nogo tandali nemotnang weng go gemang pu: "Aya nogo ngga ba nogo, atnang yakua kok. Seni so atnang go duoy mo kua. Nggano, atnang go menay naklay tuiam goso mo lemoy. Atnang go sogo-sogo mo kua, tuim no mo iti gabe, atnang go saysuk ey atnang go nan eygo-a maning gabe. ¹⁹ Sogo so, mot go suongku no atnang ya kebong. Atnang ey atnang go nan eygo? Atnang go saysuk ey nan ey, ten nay genang so gabe iti. Atnang ey atnang go nan eygo iti go, Firaun no koybutasemu so atnang mea suing. Atnang wali sogo yakua go. Kebong genaning so, atnang nogo wasmanok-a se iti. Nggano nan ngga naklay lekuoy genaning." ²⁰ Ngga ey, sedue Mesir go nan naklay, Firaun nogo so, Yusuf lo gemang ikak. Seni so, sedue ngga nemotgo-nemotgo usu nay go, ten kua go ku ngga naklay ide dega eygo nogo. Ngga kalik nan ngga Firaun goso gemang lemoy. ²¹ Ngga no, blung ngga, naklay koybutasemu so nemotnang nan Mesir nogo sring sik so iti go e… sring no pung. ²² Imam-imam go nan-a, duoy sogo kua nay. Imam-imam nogo Firaun logo drang banu no kiking go nogo. Nggatang so, duoy ngga sik so, nemotnang gemang wali. Ngga tang sogo so, nemotnang go nan duoy sogo kua nay. ²³ Blung sono Yusuf lo gemang pen: "Nggeasui go, genam lo motnang ey nan ey Firaun nogo so duoy lo mo nay. Ngge wasma nok gabe, nan ngganemot no bluim genang. ²⁴ Wasma ngga seni go, seper lima yam so Firaun no se iti. Nggano namon-namon so wasey dali go, mot go usu nogo noknang so se. Ngga ey, mot ey yap so suisuing go nogo ten so se iti dali. Nggano, mot go duo-yap eygo nogo so." ²⁵ Nggano, nemotnang lo pu go: "Mot lo atnang go wali yay mo suing. Aya go klum atnang nogo mea iti. Atnang Firaun go koybutasemu so mea lemoy." ²⁶ Nan Mesir nogo, Yusuf lo ngga semu go sik so, demu trui don so, gemang lemoy e… nggeasui go kuno gabe pung. Yangga, seni so seperlima usu sik sogo ngga, Firaun go gemang. No, imam-imam go-a, Firaun goso kua lemoy.

Yakob go wali yam sogo

²⁷ Ngga ey, nan Mesir no ngga nan Gosyen no, Israel gemang suing. Nggano, sip ngga sogo blung so nemotnang gemang lemoy. Nemotnang duo tuitui go yam so se ke-atenatun. ²⁸ Ngga no, nan Mesir nogo yagui 17 yam so, Yakub maning wali. Yakob wali go nemot go yagui-yagui 147 yam no. ²⁹ Israel ip genang ku se dedagu. Danon Yusuf usi go, gemang pu-tenawon: "At nogo mot go klum ya taling-lo go? Genam go kebum ba lo mot go ta kok sando-a.t Nggano, se wa-silo, seni so at nogo mot go klum ey tupduk ey ya keng go, Nan Mesir no genam kua tuet-srelo, ³⁰ Genam lo duing go, babuasinang ey klay gono, nimla genang sogo, genam se yaluimg. Yangga, nan Mesir sik sogo king go, nemotnang so ta go sip no genam se tui dali." Yusuf lo wa go: "Mot lo pu go kalik, genam lo mea pluok-lu lo aya."* ³¹ Ngga ey, Yusuf sono Yakub lo pu go: "Genam sono tanat ey se wa-sando!" Nggano, namot nogo ta nat go Yusuf lo gemang wa. Ngga ey, nemot go sipsrek wengkabui temu no, Israel isegabuem unuik go taitisuey gemang iti-biwon.