¹ Nggano, nemot go taut naklay ey king go, Israel gemang ip. Bersyeba no nemot pung go, menay tong go, nglangin Isak go Ki Wali Iram nogo taiti gemang puit. ² Wadi sedi ba no, Israel no Ki Wali Iram lo gemang pu-kunuon: "Yakub, Yakub!" Nggano, Yakob lo wa go: "Ya, Woy Wali Iram." ³ Ngga ey, Nemot lo pu go: "Mot go aya go Ki Wali Iram, Genam gabe! Genam-a Ki Wali Iram gabe. Nan Mesir no klong sogo, mot suali kua tra! Seni so, ngga no saulatang babu goso, At lo motnang mea lemoy. ⁴ Nan Mesir nogo, mot ey Genam tang go mea koklong. Nggano, Genam dali lo, mot wawi go tandali mea weng. Nan nggano, mot go duo Yusuf go ta ba no, mot nemu mea sup-nalo." ⁵ Ngga ey, Bersyeba sik sogo Yakob gemang klong. Nemotnang klak genang so, Firaun lo iti go “kreta” no, nglangin Yakob, nemotnang go duokabung ey, danonnang lo king go gemang klong-lak. ⁶ Nemotnang go nan Kanaan so, nemotnang lo yaluim go menay, taut ngga ey naklay wawi go, nan Mesir no nemotnang klong go gemang pung. Yangga, Yakub, nemot go duo-yap ey, mamtatonnang naklay ey kerlam so. ⁷ Seduekabung ey, duo-yap ey, memtatonnang ey naklay, nan Mesir no king go gemang klong-lak. ⁸ Ngge, nan Mesir sono ip go tang Israel go sui-sui gabe. Yangga, Yakub ey duoyap ey. Yakob go duo trang sogo Ruben. ⁹ Ruben go danongnang:Henokh,Palu,Hesronnggano Karmi. ¹⁰ Simeon go danonnang:Yemuel,Yamin,Ohad,Yakhinnggano Zohar eySaul, Kanaan kabung logo danon klaya. ¹¹ Lewi logo danonnang:Gerson,Kehatnggano Merari. ¹² Yehuda logo danonnang:Er,Onan,Syela,Peres nggano Zerah;No, Er nggano Onan nan Kanaan no mo kebong.Nggano, Peres logo duo:Hezron,nggano Hamul. ¹³ Isakhar go danonnang:Tola,Pua,Ayub nggano Simron. ¹⁴ Sebulon go danonnang:Sered,Elonnggano Yahleel. ¹⁵ Yangngga, Padan Aram no Yakob nogo so, Lea lo tui go tang, sedue denok ey kabung denok Dina ey. Sedue ey kabung eygo naklay go, dabuilap 33 yam so. ¹⁶ Gad go danonnang:Zifyon,Hagi,Syuni,Ezbon,Eri Arodi,nggano Areli. ¹⁷ Asyer go danonnang:Yimna, Yiswa,YiswiNggano, Beria;Serah ngga, nemotnang go demanun. Beria logo duo-yap ngga:HeberNggano, Malkiel. ¹⁸ Yangga, koybutasemu Zilpa, denun Lea nogo so Laban lo itak go kabung lo, Yakob nogo so tui go tang. Naklay go, dabuilap 16 yam so. ¹⁹ Yakob senun Rahel logo duo, Ngga:Yusuf ey Benyamin ey. ²⁰ Nan Mesir no, Yusuf nogo so tui go: Menasye eyEfraim ey.Yakena On sogo imam Fotifera go denun Asnat lo tui go. ²¹ Benyamin go danonnang:Bela,Bekher,Asybel,Gera,Naaman,Ehi,Rosh, Mupim,Hupimnggano Ared. ²² Yangga, Yakob nogo so Rahel lo tui go tang. Naklay go dabuilap 14 yam so. ²³ Dan go danon: Husim. ²⁴ Naftali go danonnang:Yahzeel,Guni,Yezer nggano Syilem. ²⁵ Yangga, koybutasemu Bilha, denun Rahel nogo so Laban lo itak go kabung lo, Yakob nogo so tui go tang. Naklay go dabuilap taidisonamon yam so. ²⁶ Mesir no Yakob ey pung go seduekabung naklay, yangga danonnang tang go. Denunduogo ey kua i go, naklay go dabuilap 66 yam so. ²⁷ Yusuf go duo namon, nan Mesir no Yusuf nogo so tui golo, nan Mesir no pluep go Yakob go yaptenglam, dabuilap naklay go 70 yam so.

Mesir no Yakub go yaptenglam pung go

²⁸ Yehuda-a banim no, Yakob lo motdak go, Yusuf mit sono gemang klong. Ngga tang so, Gosyen no nglangin ey tegu sogo Yusuf weng sogo be. Ngganemot nogo, nan Gosyen no nemotnang mo pung. ²⁹ Ngga ey, Yusuf nemot go “kreta” tegan dok go, nglangin Israel tegu so Gosyen sono gemang klong. Nemot ey tegu gono, nglangin go blindon no teguot go, nemot go yalu blo so, walong so u gemang kluo-nawon. ³⁰ Ngga ey, Yusuf sono Israel lo gemang pu-tenawon: "Ngeasui go, mot go nebuemnemu mo ikum-tu. Seni so, mot maning wali-wali so, genam ip go mea selu." ³¹ Ngga ey, ntatonnang naklay ey, nglangin go yaptenglam naklay eygo sono, Yusuf lo pu go: "Firaun sono genam klong so gabe. Nemot no mea pen: “Aya eygo akanang, nan Kanaan so susuing go, at sono mo weng gabe. ³² Nemotnang go kebali, menay kambing-domba so popong go saula. Nggano, kambing-domba, sapi-lembu, nemotnang go sogo-sogo naklay, mo ikak go weng. ³³ Nago no, motnang no Firaun lo usi go: Motnang go kebali sogo? ³⁴ Motnang lo se pen: "Seguai go sik so, e… nggeasui gono pung go, atnang go kebali ngga menay so popong go sedue. Atnang go babu asi sik sogo menay yay sogo sedue. Ngga kalik so wa go, nan Gosyen so motnang suisuing sogo be." Yang, kambing-domba popong sogo sedue Mesir nogo, ngga kedumat."