Pasal 45
Yusuf ntatonnang no saysuk taling go
1
Ngganemot nogo, ntatonnang nogo, Yusuf go dabui yakua kok. Nemot dagu no ip go, seduekabung go suongku no. Nggano, gemang pu-tenawon: “Sedue kabung ngge sik sogo, pu go pung-lak!” Seduekabung pung-lak go, ngga sogo Yusuf eygo, sedue klayanang go kua. Nggano, nemot go saysuk, ntatonnang no gemang taling-nawon.
2
Ngga ey, kangok dega so u gemang kluo-nawon. Ngga tang so, Firaun ey sedue Mesir eygo gemang tup.
3
Ngga no, ntatonnang sono Yusuf lo pen go: “Genam ngge Yusuf gabe! Aya maning gemang?" No, ntatonnang nebut way pu sogo yakua. Suali so, bubuong ey, Yusuf ey nemotnang tegu sogo.
4
Ngga ey, ntatonang sono Yusuf lo pu go: “Dagu sono, weng-a!” Ngga ey, dagu sono nemotnang weng gono, tandali Yusuf lo pu go: “Genam ngge motnang go sat Yusuf gabe. Nan Mesir sono motnang lo nay go ngganemot.”
5
No, nggeasui go, dabui sadui kua tra. Nggano, suali kua tra dali. Ngge sono, motnang lo genam nay go ngga, seni so, wali yay suing genang so, banim Ki Wali Iram lo pu go weng go.
6
Yang! Nan ngge nogo, tenkuago kluongku yagui namon mo klong. Nggano, yagui taidi dali nogo, cseduekabung logo usu yakua klik, wasma yakua iti.
7
Ngga ey, Ki Wali Iram ba no pluok go, genam mo weng, imot go tang yay suing genang so. Kukunan blo nogo, nggano mot go wali yay suing genang so. Ngga tang so, motnang nogo tebok dali genang.
8
Motnang lo pu goso, ngge sono go genam kua weng. No, Ki Wali Iram lo mot-dak goso weng go. Nemot lo genam aya so, Firaun nogo gabe taling. Nggano, tuiam istana blo nogo, nggano nan Mesir blo nogo, trang dega so gabe lemoy.
9
Keda so aya mit no klong go, nggano nemot nogo se pen: “Mot go duo Yusuf lo ngge kalik pu go: “Nan Mesir blo nogo, tuiam so genam Ki Wali Iram lo mo taling. At ey tegu sogo, kua bubung ey kedaso se weng-lak.
10
Genam dagu no, nan Gosyen no motnang mea suing. Mot ey duo ey nggano, duomdat-yap ey, kambing-domba, lembu-sapi motnang go ngga naklay.
11
Motnang yay, genam lo mea suing. Seni so, yagui taidi dali tenkuago, kluongku ngga maning gemang. Ngga tang so, motnang go yaptenglam, motnang eygo sedue kabung naklay, naklay seni ten kua eygo.
12
Motnang tang go, nemu lo mo ikum. Nggano, at go sat Benyamin tang go mo ikum dali. Ngge, genam go lom lo mo pen gabe.
13
Ngga tang sogo so, aya no seni so se pen, Mesir sogo ngge, genam go don kangok. Motnang lo ikum go ngge aya no pen go, keda so aya wawi go ngge sono se weng."
14
Nggano, ntaton sat Benyamin go blindon no teguot go, Yusup u gemang kluo. Yusup go yalu blo no Benyamin but go u gemang kluo.
15
Ntatonnang klugua yamso Yusup lo semu-sing gono, nemotnang teguot go u gemang kluo-nenawon. Nggano, ntatonnang Yusuf eygo nebut gemang pen-nenawon.
16
Deguena Firaun go yap ba naklay tup go, 'Yusup go ntatonnang weng-lak go', Firaun ey nemot go kebali sedue eygo lo, suey so yakay ey gemang wawi.
17
Ngga ey, Yusuf sono Firaun lo pu go: “Mot go akanang no se pen: ‘Ngge kalik so se semu; motnang go menay no king go, nan Kanaan no se klong,
18
aya ey yaptenglam naklay ey king go, weng go genam ey se tegu! Genam lo, motnang no, nan Mesir sogo, sogo-sogo suey dato go mea iti. Ngga tang so, nan ngge go teguop mea dam.’”
19
Mot nogo nebut gabe pupu: 'nemotnang no pen go, ngge kalik so se semu; motnang go duokabung king genang, nan Mesir sik sogo "kereta" iti go se klong. Nggano mot go aya ey wawi go king go se weng.
20
Motnang go taut ngga no itak go nogo, dabui kua lek. Seni so, nan Mesir sogo, sogo-sogo teguop go ngge, motnang go gabe.”
21
Israel go danonnang lo, ngganemot kalik gemang pluok. Firaun lo pen go kalik, nemotnang nogo "kereta" Yusuf lo gemang iti. Nggano, tap no nemotnang lo dam genang ten gemang iti dali.
22
Nemotnang klay-klay no, amka inim gemang wasey-sing. Benyamin nogo, duoy 300 perak, amka inim taidi yam so gemang ikak.
23
Nggano, nglangin nogo so, keleday kemsi tanamon yam so, keledai unen tanamon dali so wawi go, nan Mesir sik sogo, taut teguop go ey king go gemang klong. Nggano, tap no nglangin dam genang sogo ten, loti ey gandum ey gemang king.
24
Nggano, tap sono ntatonang Yusuf lo itak go, nemotnang no gemang pu-nawon: “Tap nogo motnang sagui kua pung!”
25
Nan Mesir sik so, nemotnang ngga kalik klong go, e… nan Kanaan no, nglangin Yakob mit no gemang pung.
26
Ngga ey, nglangin no, nemotnang lo gemang pen: “Aya! Seni so, Yusuf maning gemang. Nggeasui go, woy dega so nan Mesir no nemot mo suing.” No, Yakob go dabui ba nogo, kua yang-srenawon. Seni so, danonnang go nebut nogo, Yakob tayakuamlak.
27
Ganemot kalikso mang pen nemotno naklay Yusuf ko nembut,ga nemotnang no pen go kalik,ga ei nemot mang ikum-kreta-kreta Yusuf lo itigo nemot wawigonang so,saisuik iram dontei kabe ip Yakub nemotnang go aya.
28
Yakob lo pu go: “Ngge nemot wa! Genam go duo Yusuf, maning wali-wali so gemang. Genam maning kua kebong gono, nemot ikum sogo at klong so gabe.”