Pasal 44
Yusup go tegun nega go tandali iti go
1
Ngga ey, yap ba kebali wengkabui no Yusuf lo pu go: "Sedue-sedue ngga go tenkeba, nemotnang lo glung genang yam so se king-sing! Nggano, nemotnang go duoy, nemotnang go keba ba no tandali se king-sing dali.
2
Nggano, genam go tegun perak lo semu go ngga-a, duo sat go tenkeba ba no, ten so nay go duoy ey se king." Ngga ey, Yusuf lo pen go kalik, yap ba kebali wengkabui lo gemang pluok.
3
Wadikua go kublong yam no, nemotnang go keledai ey itak go, gemang klong-lak.
4
No, demening yakena sik so pung go, masi maning kua walong gono. Yap wengkabui so, Yusup lo gemang pu: “Sedue-sedue ngga truik-a! Nemotnang tegu go, se usi: “Sogo so, tasuey way sogo, taybat-a ne pluok?”
5
At go tuiam go tegun perak lo semu go, sogo so ne tebok?sNgge, tuiam go, bu so dedrop go tegun. Nggano, ngge, nemot go tegunblue so kiklik go daysruk se? Kangok go kuklue-a, motnang logo mo pluok gabe."“
6
Nemotnang mit no pung gono, Yusuf lo pen go kalik, gemang pen-nawon.
7
Nemot sono, nemotnang lo wa go: “Ngga kalik, tuiam logo sogo so ne pu? Ngga kalik go tasam pluok genang sogo, atnang yakua!
8
Atnang go keba ba so iti go duoy ngga, nan Kanaan sik so tandali mo iti go weng? Nago so mo, wom sogo Gubelnur go emas, perak atnang lo ya iti?
9
Yang! Nando go keba ba so, tegun ngga tuiam lo ikum go, nemot-a se kebong. Tuiam go koybutasemu so, atnang temu-a, se lemoy.”
10
Ngga ey, yap wengkabui lo pu go: “Ngga suey! No, nando go keba ba so tegun ngga tegu go, koybutasemu so nemot-a mea lemoy. Motnang temu-a taitak go, susuoy so se klong-lak.”
11
Ngga ey, ku sono nan blo sono keda so, nemotgo-nemotgo keba iti go tui gono gemang plet-sing.
12
Ngga no, kunala temoy no, yap wengkabui lo gemang wet-nawon. Sedue trang sik so, e… sat sogo no gemang ya pung. I go sogo, Benyamin go keba ba so, tegun ngga gemang iti-nawon.
13
Ngga ey, nemotnang dabui u suk-a. Amka kangok go tegek go, nemotgo-nemotgo keleday no ta go, kota sono tandali nemotnang gemang klong.
14
Yusuf go yap no, Yehuda ey ntatonang ey pung go nogo, Yusuf maning gemang. Yusuf go suongku no nemotnang unuik go, e… nan no duok.
15
Nemotnang no, Yusuf lo bebat go: “Sogo kalik go tasam-a, motnang lo ne semu? Motnang kua senong, genam kalik go sedue ngge, tegunblue klik go sik so mea senong?”
16
Nggano, way so Yehuda lo pu go: “Sogo-a tuiam nogo atnang logo ya pen ne? Sogo kalik ya wa-elu ne? Nggano, sogo lo atnag logo ya pen-elu, atnang kuklue kua go? Mot go koybutasemu go kuklue, Ki Wali Iram lo mo ikum. Ngga ey, atnang ngge, tuiam go koybutasemu. Ngge suey, atnang eygo nando go keba ba so tegum ngga iti go, koybutasemu so se lemoy!”
17
No, Yusuf lo way so tenguo go: "Ngga kalik go, at ya kua semu-srelu! Nando go keba ba so tegun iti go, nemot-a, at go koybutasemu so mea lemoy. No, motnang ngge-a, aya mit sono tandali suey so susuoy so se klong."
Benyamin no Yehuda tebok go
18
Ngga ey, dagu sono Yehuda rlo gono, gemang we-tenawon: “Aya tuiam sang! Genam nogo sagui kua! Mot go koybutasemu ngge, mot sono weng go, deguena Mesir nogo kalik dali, ta ey gabe kokong. Mot lo mo iwat go, genam logo nebut mea pen-lu dali sang?”
19
Atnang sono, tuiam lo mo usi: “Motnang go aya ey motnang go sat eygo, sedue meno maning gemang dali?”
20
Nggano, aya tuiam sono, atnang lo mo wa: “Atnang go aya, mo srawe go maning gemang. Nggano, sat seni so sedueseni yam no tui go duo, maning gemang. Nemot go aka, mia klaya golo tui go-a, mo kebong. Ngga tang so, nemot nogo aya go klum kangok.
21
Nemot ngga, aya tuiam lo pu go: “Ngge sono, atnang lo wawi go mo weng. Aya tuiam ikum genang sogo so.”
22
No, tuiam no atnang lo mo pu: “Nglangin sik sogo duo ngga, yakua itak. Aya sik sogo nemot klong go, aya mea kebong.”
23
Nggano, atnang sono way so tuiam lo pu go: “Motnang go sat ngga, motnang ey kerlam so kua wawi go weng go, at go nebuemnemu motnang kua ikum.”
24
Atnang, aya tuiam go koybutasemu, tandali atnang go aya no klong go nogo, tuiam lo pen go nebut naklay, aya no atnang lo mo pen.
25
Ngga ey atnang go aya lo pu go: “Tandali kenalo go, imot nogo ten ey seguay so iti-kenalo ya.”
26
No, atnang lo pu go: “Ngga sono go atnang yakua klong. Atnang go sat ngga, kerlam so atnang ey kua go. Nemot eygo so atnang mea klong. Seni so, tuiam go nebuemnemu ikum sogo, atnang moyso. Atnang go sat ngga, atnang ey kerlam so kua weng go.”
27
Ngga ey, mot go koybutasemu, atnang go aya lo pu go: “Motnang mo senong, at nogo so at go kabung lo tui go duo namon ey.
28
Meno duo, genam sik sogo mo klong.” Nggano, at lo pu go: “Nemot ngga menay iseng eygo lo mo dam gemang. Nggano, nggeasui go tandali nemot at kua ikum.”
29
Duo ngge genam sik sogo, wawi-kelo go nemot waluk go, genam kut blong go ngge, duo nggenemot tang sogo so, sedue kebong go sip no mea li.
30
v 30 Nggeasui go, genam mot go tamot-a, at go aya sono klong go. Atnang ey kerlam so duo ngga kua go, aya meakua wali.
31
Duo ngga kua ikum go sik so, sogo-sogo mea lemoy. Seni so, nemot mea kebong. Nggano, mot go tamotnang ngge logo tang so, aya penggu kut mo blong go ngga, mangne ya kebong.
32
No, idekeba ngga, genam lo mo iti. Aya sono at lo mo pu: “Nemot ey tandali genam kua wawi go weng go, aya nogo senang piam genam lo lek go mea gigit.”
33
Ngga tang sogo so, ngge suey: “Genam-a koybutasemu so, duo ngga way so suing go. Nemot-a nuey-a, ntatonnang ey tandali se klong.
34
Denok ngga genam ey kerlam so kua go, sogo kalik so, ya? Genam yakua ikum, tebadali ngga kalik so aya waluk go.”