Pasal 43
Nan Mesir sono Benyamin ey ntatonnang klong go
1
Nan Kanaan nogo, ten kua go kluongku kangok so se lelemoy.
2
Yakop go yap-tenglam, ten se kua dali. Nggano, danonnang no Yakop lo gemang pu: “Ngga sono tandali klong-a! Nggano imot nogo ten se king-klenalo.”
3
Ngga ey, Yehuda lo pu go: “Atnang nogo, don ey Nan Mesir go gubelnol lo mo pen: ‘motnang go sat kua wawi go weng go, genam mit nogo tandali go motnang kua pluep-lak.
4
Aya iwat go, atnang go sat nemot ey keng go sogo so, ten idok sogo atnang mea klong.
5
No, atnang no Benyamin keng genang, aya lo kua yang go, atnang yakua klong. Gubernur ngga lo pen-nayom go: ‘Motnang go sat kua wawi go weng go, tandali go motnang kua pung.”
6
Nggano, Yakob lo pu go: “Sogo so genam nogo ide taling-ketogoy. Sedue ngganemot nogo, sogo nang sogo so, ne pen? ‘Atnang go sat-a klaya, aya ey gemang suing’”
7
Imot go yaptenglam tang, senang so sedue ngganemot lo usi go tang so, pen go lo. Motnang go aya maning wali so? Motnang go sat sedue denok meno, maning gemang? Ngga tang sogo so, atnang lo kekayso gemang wa. Atnang kua duing, sat wawi genang sogo nemot lo mea pu-yon.”
8
Nggano, Yehuda lo pu go: “ Aya! Duo ngga nemot ey pu go se keng! Nemot sogo tang genam lo mea pen. Imot sik sogo meno duo, ten lo maning kua kebong gono, keda so atnang ya klong go.”
9
Sogokalik-sogokalik nemot lemoy go, aya logo genam sik so se usi. Aya nogo tangpen genang, genam lo mea. Nemot tandali genam lo kua wawi go weng go, wali ba nogo nemot sogo ide keba genam lo glung go mea uwet.
10
Walong so imot kua bubung go, ngge imot tandali danamon tete sogo gabe mo klong-weng.”
11
Nggano, nglangin lo pu go: “Ngga kalik so, seni so mo go, gubelnur nogo taitinang sogo, seni teguop-teguop go nan ngge sik sogo, ikak go se klong! Motnang go keba ba no ngganemot ey king go nase kenalo. Yangga, Kismis, madu, rempah-rempah, kenari don, nggano badam don.
12
Nggano, duoy danamon so se iti go klong dali. Tenkeba ba so motnang lo tegu go duoy ngga, tandali nemot no motnang lo se ikak sing. Ngga ta-a piam so king go.
13
Mot go sat ngge wawi go klong go, keda so nemot ey tandali se weng dali.
14
Gubelnul go dabui ba no, Ki Wali Iram don dega eygo lo pluok go, Benyamin ey Simeon ey motnang sono tandali itak go mea weng. Ngga kalik so, genam go duo ngge ya nega go, ngga nuey-a sang! Sogo-a genam logo ya semu ne.”
15
Nggano, taiti ngga Yusuf go ntatonnang lo king-sing gono, duoy danamon so iti go, Benyamin ey wawi go, nan Mesir sono gemang nenawon go. Nggano pung gono, Yusuf go suongku no nemotnang gemang ip.
16
Ntatonnang, ntaton Benyamin eygo ikum gono, nemot go yap tenglam wengkabui no Yusuf lo gemang pu-tenawon: “Genam go yap ba sono, sedue-sedue ngge wewi go se klong. Nggeasui wabedong go, nemotnang genam ey ten mea dam. Ngganemot sogo so, menay klaya tong go, naklay suik go dali nase ta-sing.”
17
Yusuf lo pen go nebut no keng go, kebali sedue ngga lo nemot go ntatonnang wawi go, nemot go Gubelnul go yap no gemang klong.
Yusuf go yap no ntatonnang wawi go klong go
18
Yusuf go yap no, nemotnang wawi go koklong go nogo, suali tra go nemotnang gemang duiduing: “Ngge sono imot wawi go weng go, keba ba so tegu go duoy ngganemot so gabe mo? Imot mea dok-singneyon. Ngga ey, imot go keledai nemotnang lo ikak go, nemotnang go koybutasemu so imot mea lemoy.”
19
Ngga tang sogo so, Yusuf go yap yataput dedegut gono, kebali sedue meno no gemang usi-netenawon:
20
“Esang aya! Ngge sono go, ten iti sogo atanang mo weng.
21
Tap koklong go, tap lo srek sogo no, atnang naklay go keba ba sogo duoy naklay gemang. Nemot-a, ten king genang so, duoy ngga atnang lo mo iti go. No, atnang kua senong, nando lo duoy ngga tandali mo king?
22
Nggeasui go duoy ngga, aya nogo so tandali iti go mo weng gabe. Nggano, ten demening go king genang duoy, mo iti go weng dali gabe.
23
Kebali sedue ngga lo pu go: “Suali kua tra, dabui kua seglik! Motnang go Ki Wali Iram, yangga motnang go aya go Ki Wali Iram. Duoy ngga motnang go keba ba no, Nemot lo tandali king-sing go. Motnang logo duoy, genam lo mo iti.” Ngga ey, Simeon wawi go, nemotnang no gemang klong.
24
Ngga ey, yap ba sono wawi go nemotnang gemang degut. Nemotnang masi bu ulu genang bu, kebali sedue lo iti go. Nggano, nemotnang go keledai nogo ten, gemang iti dali.
25
Ngganemot no, nemotnang go taiti dali semu-newon go, wabedong go Yusuf weng gono iti genang sogo so. Nemotnang nogo mo pen, ‘wabedong go ten, gubelnur ey klay gono nemotnang mea dam’.
26
Yap no Yusuf pung gono, taiti-taiti ngganemot Yusuf go ta sono, nemotnang lo gemang iti-nenawon. Yusuf go suongku no unuik go ey, gemang iti-nenawon.
27
Ngga ey, nemotnag go wali tang, Yusuf lo gemang usi-tenawon, gemang pupu: “Motnang go aya nogo nebut, motnang lo mo pen-kleyo go, sedue seni so yam so mo lemoy. Nemot sogo kalik, suey seguong so?”
28
Aya tuiam: Atnang go aya, suey seguong so wa!” Ngga ey, Yusuf sono nemotnang unuik go, susubu ey gemang wit-lak.
29
Yusuf go ntaton sat Benyamin ikum gono, Yusuf lo gemang pu-tenawon: “Ngga kalik go, ngge motnang lo genam no pen go motnang go sat nganemot? Dem sop, mot blo nogo taitigualaklum, Ki Wali Iram lo mea uweng.”
30
Ntaton sat no ikum go, Yusuf go dabui ba u lo nala-nawon. Nakua go u mo puik-srenawon. Ngga tang sogo so, ngga sik sogo kedaso klong gono, nemot go degu ba no degut go, u gemang kuo-nawon.
31
Ngga ey, nebuemnemu bu ulu gono, tandali gemang pung. Nggano, dabui demu betep go, ten dam genang sogo nemot lo pu go gemang ta.
Klay gono tendam-nenawon go
32
Yusuf-a, nemot go sip no banom so gemang dam. Nggano, sip meno no banom so ntatonnang gemang dam. Sedue Mesir ngga sogo, nemotnang go tendam sip, banom so ta go gemang dam-nenawon dali. Nemotnang go demu nogo, sedue Iblani eygo sip klaya go blo nogo ten ya kua dam.
33
Yusuf go ntatonnang-a, Yusuf sono iwot go tendamsip no gemang ta-nenawon. Nemot go-nemot go, yagui da tang so gemang ta-sing. Trang sik so iti go, e… sat no yam. Ngga kalik ta go ikum gono, nemotnang ey gemang nega-nenawon.
34
Yusuf logo tendamsip sik sogo-a, nemotnang nogo ten gemang iti. Nggano, Benyamin nogo-a, da taidi yam so gemang king. Ntatonnang temu nogo ey kua kerlam. Ntatonnang ey Yusuf ten dedam go, nutemoy go yam so dabui yakay dali.