Pasal 42
Nan Mesir no ten duoy lo king so Yusuf go akanang klong go
1
Yakub tup-nawon go, ‘nan Mesir sogo ten gemang'. Nggano, danonnang no gemang pu-tenawon: “Motnang yakot so, sogo so got-ketegoy?
2
Genam tup go, 'nan Mesir sogo, ten gemang'. Mesir no klong-a! Ten lo imot leguot eygo se. Klong go, ten duoy lo iti gono se weng.”
3
Nggano, ten duoy lo iti so nan Mesir sono, Yusuf go ntatonnang tanamon ngga gemang-nenawon.
4
No, ntaton Benyamin-a, Yakob lo pu goso, kua keng-srenawon. Ntaton Yusuf kalik kalong blo no klak eygo so.
5
Nan Kanaan nogo, ten kua dali go so, nan Mesir sono Yakob go danonnang, sikabung temu ey mata so, duoy lo ten iti so gemang klong-lak.
6
Kukunan sedingno-sedingno goso, ten so nenay go wengkabui ngga, Yusuf lo gubelnul so ta gemang mlak. Ngga tang so, nemot go akanang weng go, Yusuf go suongku no genang unuik-nenawon.
7
Nemot go akanang ikum go, Yusuf-a, mo senong-nawon. No, kua senong go kalik, wamoy so gemang semu-nawon. Nisono so, kangok so nemotnang no gemang usi: “Motnang nago sik sogo sedue-sedue?” Way so nemotnang lo pu go: “Atnang ngge Kanaan sik sogo sedue-sedue wa!”
8
Yang, nemotnang-a, Yusuf lo mo senong. No, Yusuf-a nemotnang logo, kua senong-nesrenawon.
9
Nggano, nemot go sedi, nemotnang so srek go ngga, gemang duing-nawon. Ngga ey, nemotnang so gemang pu-tenawon: “Motnang ngge nemusom sogo sedue-sedue gabe. Nuluik so, motnang go gabe. Atnang go nan ngge nogo, don kua go nago no gemang?”
10
Nemotnang lo tenguo go: “Kua sang, tuiam! Atnang weng go, duoy lo ten iti genang seguong so wa sang.
11
Atnang ngge, tang klaya go seguong gabe. Aya tuiam, sang! Atnang ngge sedue suey-suey go. Nemusom sogo sedue kua.”
12
Yusuf lo pu go: “Motnang ngge no weng go, atnang go yakena ngge don kua go, nemu luik sogo so wamoy mlue so weng go.”
13
No, nemotnang lo wa go: “Atnang ngge, naklay go 12 yam so. Atnang go aya klaya, nan Kanaan so gemang. Atnang sik sogo, klaya duo-a mo kebong. Nggano, nggeasui go, sat sogo-a, atnang go aya ey gemang suing.”
14
Yang seni so lo, genam lo pu go kalik. Motnang ngge nemusom so weng go, sedue-sedue gabe.”
15
No, motnang ngge seni sogo senong genang. Deguena go sui no gabe pu-situgu: “Ngge sono motnang go sat ngga, maning kua wawi go weng go, nan Mesir sik sogo motnang yakua itak go klong.”
16
Motnang sik sogo klaya duo-a, klong go wawi go se weng. Boy ba no temu-a namboy mea degut. E… motnang lo pen go ngga seni so taling gono, itak go motnang mea klong-lak. Nggakalik kua lemoy go, ngge deguena go sui tang sogo so, motnang ngge nemusom so weng go plesi gabe.”
17
Nggano, kunanglik yam so, boy ba no nemotnang gemang tega.
18
Ku nangglik tete no, Yusuf lo gemang pu-tenawon: “Genam ngge, Ki Wali Iram nogo suali ey. Ngga tang sogo so, motnang mea susuoy-silu. No, klaya ngge-a se plok-kelo!
19
Monang lo pen go nebut ngga, seni so taling genang, motnang ngge nemudi sogo sedue. Motnang sik sogo klaya duo-a, boy ba no mea betep. Temu-a ten ey king go se klong-lak. Motnang go yap-tenglam ten sogo, ten king go se klong-lak.
20
Nggano, motnang go sat wawi go, ngge sono genam mit no se weng. Ngga tang so senong genang, seni so motnag lo pen go nebut ngga seni ey. Kebong genang idekeba, motnang nogo meakua iti-lu.” Gubernul lo pu go ngganemot, nemotnang lo gemang yang.
21
Nggano, nemotnang go seguong so, gemang sok-netenawon: “Yang! Nggeasui imotnang nogo, idekeba taling go ngge, imot go sat no banim imot lo taling go taybat, ngga sik sogo idekaba gabe. Kamso nemot lo pu go, no, nemot go nebut nogo, imot lo kua tup ne. Nemot-a, imot mo ikum, nemot ide kangok so tra go. Ngga tang sogo so, nggeasui go, imot nogo iseng ngge taling go, gabe tra-eton.”
22
Ruben lo pu go: “Banim go motnang no at lo mo pu: “Denok ngga nogo sogo-sogo iseng kua taling. No, genam go nebut nogo motnang lo kua tup ne. Ngga tang sogo so, nemot kebong go idekeba waydali, imot no gabe tetaling.”
23
Nemotnang lo pepen go nebut, Yusuf mo senong. No, nemotnang logo ngga kua sesenong. Yusuf eygo nemotnang nogo, sedue meno lo, tandali pepen go nogo.
24
Nemotnang itak gono, Yusuf klong go ngga ba no, u gemang klou-nawon. Tandali Yusuf weng gono, pu go, Simeon nemotnang go nemu damoy so gemang dok-nenawon.
25
Nggano, Yusuf lo pu go: “Nemot go akanang lo iti go weng go tenkeba, ten se king-sing. Nggano, nemotnang go duoy-a, nemot go-nemot go tenkeba ba no tandali se king-sing. Ngga ey, nemotnang go tapten se dok dali.” Nemot lo pu go kalik, gemang semu-nenawon.
Nan Kanaan no Yusuf go akanang tandali klong go
26
Nggano, nemotnang go, keleday blo no yam so ta-sing go, ip go nemotnang gemang klong.
27
Nemotnang srek genang sip no, keledai ten iti sogo so, nemotnang sik sogo meno duo lo, tenkeba plet go, keba ba sogo, duoy gemang ikum-nawon.
28
Ntatonnang no nemot lo gemang pu: “Ye, genam go duoy tandali iti go. Ngge, genam go keba ba so ngge go!” Nemotnang go dabui bubuong ey king-nenawon go. Nggano, dabui suali ey nemotnang lo pu go: “Sogo kalik so, ngge kalik go tasam, imot nogo Ki Wali Iram lo mo taling?”
29
Nan Kanaan no pung gono, nemotnang no lemoy go ngga naklay, nglangin no gemang pen-nenawon. Nemotnang lo pu go:
30
“Mesir go gubelnul lo, atnang no nebut don ey bebat go. Nemot lo pu go, atnang go yakena nemusom so motnang ngge weng go gabe?”
31
No, atnang lo pu go: “Atnang ngge suey-suey go, nemudi sogo sedue-sedue wa!”
32
Aya klaya golo atnang tui go, naklay go 12 yam so. Klaya duo-a mo kebong, nan Kanaan so aya eygo, sat sogo-a gemang.
33
Nggano, gubelnul lo pu go: "Motnang senieygo, nemudi sogo sedue so senong-lu genang, motnang sik sogo meno-a, ngge no se suing. Temu-a mot go yaptenglam nogo, ten ey iti go se klong, nemotnang ten dam genang.
34
Motnang go sat, wawi go weng gono, genam mea yang lu, 'seni so motnang ngge nemusom sogo sedue-sedue kua. No, motnang ngge sedue suey go, nemudi sogo sedue? Nggano, motnang go kukunu meno-a, at lo pu go suing go ngge, tandali motnang no pu go mea klong. Nggano, motnang nan ngge nogo, taitak goso nay genang sogo mea suing.
35
Nggano, nemotnang go keba nsuong-nenawon go, nemotnang go duoy sip duoy ey gemang ikum. Nemotnang, kangok so suali gemang tra-nenawon. Nglangin Yakob ngga kalik dali, gemang tra-nawon.
36
Nggano, nglangin lo pu go: “Genam go duo naklay, motnang lo mea nega-sing. Yusuf mo kua, Simeon mo kua dali. Nggeasui go, Benyamin wawi go mea klong dali. Genam go dabui sadui kangok dega seni be!”
37
Nggano, Ruben lo nglangin no gemang pu-tenawon: “Benyamin-a, genam sono itak sando-a! Tandali genam lo nemot wawi go mea weng. Ngga kua go, genam go duo namon-a, aya lo nase but go kebong.”
38
No, Yakob lo pu go: “Kua! Benyamin motnang logo yakua wawi go klong. Nemot go aka mo kebong. No, nemot seguong-a genam ey gabe suisuing. Tap masi ngge ba no, piam blo no nemot klak eygo se. Genam ngge sedue seni, utap genam no, motnang lo semu go ngge, genam ey mea kebong-daplu.”