¹ Yagui namon dali suing gono, Mesir go deguena lo, sedi gemang to-nawon. Ngge kalik: Sedi so Nil bu ketang so, deguena ip go got-tenawon. ² Bu ba sik so kekay so, sapi diteguop go, taidisonamon yam so gemang pluep-lak. Ngga ey, neguen so dedam klong. ³ Nggano, sapi diteguop go mit no, sapi temu, yangkle-yangkle sogo, suk lo don-a dok go, taidisonamon yam so, gemang pung dali. Pung dali go, bu ketang no gemang ip-lak. ⁴ Ngga ey, sapi diteguop go kangok go-a, yangkle-yangkle sogo lo gemang gut-sing. Nggano, usne sik sogo, deguena gemang bong-nawon. ⁵ Tandali usne so srek gono, sagot teguop so seni go sengin go, pluo taidisonamon yam so, sedi so tandali gemang ikum-nawon. ⁶ Nggano, sagot sakuok sogo seni kua go, pluo taidisonamon yam dali so, gemang ikum dali. ⁷ Ngga ey, saguot seni kango go pluo-a, sakuok sogo pluo lo gemang gut-sing. Nggano, usne sik sogo, deguena gemang buong-nawon. ⁸ Wadikua deguena bong go, dabui ba yakay kua suey kua so tra-tenawon. Ngganemot sogo so, kunala sedue, blue sedue nan Mesir sogo naklay gemang usi-sing nawon. Sedi pen-nawon go, no, klay duo-nang go logo, sedi ngga go seni yakua pen ⁹ Ngga ey, deguena go bu so iiti go kebali sedue lo, deguena no gemang pen: “Nggeasui go genam lo, kuklue go mea pen-alu; ¹⁰ Seni so, kunayum go, ten so iti go ey genam ey gono, aya deguena dabui piam go. Nggano, at namon aya go yap ba sogo boy no mo betep. ¹¹ Ku meno so wadi go, atnamon lo sedi gemang srek. Atnamon go sedi ngga go seni kua kerlam. ¹² Iblani nguot atnang ey boy ba sogo, nemot kebali wekabui. Plesedue wengkabui go kebali sedue. Sedi ngga, nemot no atnamon lo pen gono, nemot lo seni gemang pen. ¹³ Ngga naklay, nemot lo pen go kalik seni, gabe lemoy. Yangga: genam-a tandali genam go kebali dali no, aya deguena lo pu go gabe semu. Nggano, ten so iti go-a, kebong genang idekeba-a gemang iti.” ¹⁴ Nggano, deguena lo pu go, boy ba sik sogo Yusuf wawi go keda so pung go, dit ndok go, amka inim-a kok go, deguena sono klong go gemang ip. ¹⁵ Deguena lo pu go: “Sedi so genam lo srek go. Sedue klaya nang go logo, sedi ngga go seni pen genang yakua. No, genam no, sedue lo mo pen: mot logo, sedi go seni mea pen. Ngga, genam sono se pen-sando.” ¹⁶ Yusuf lo pu go: “Aya deguena! Genam tang go logo ngga, kua pepen. No, sedi go seni nemudi sogo, Ki Wali Iram seguong logo-a mea pen.” ¹⁷ Nggano, deguena lo pu go: “Bu Nil ketang so sedi so, genam ip go suisuing. ¹⁸ Ngga ey, bu ba sik so, taidisonamon yam so sapi gemang pung. Sapi ngga kangok-kangok dega go, saysukbu idop-idop ey, bu ketang lo neguen so gemang dedam. ¹⁹ Nggano, bu ba dali sik so, sapi temu taidisonamon yam so gemang pung. Sapi ngga yangkle-yangkle sogo, suk lo don no sebut go, donluong-a nemu kua blup. Nan Mesir ngge nogo, sapi ngga kalik go kua ikum seni. ²⁰ Pla iti, sapi kangok-kangok dega go, saysukbu idop-idop eygo taidisonamon yam sogo ngga-a, sapi yangkle-yangkle ngga lo gemang gut-sing. ²¹ No, sapi yangkle-yangkle sogo ngga go saysuk, kua babu ne. Nemotnang yangkle-yangkle so ne. Ngga ey, genam gabe buong. ²² Nggano, tandali genam srek gono, sedi gemang srek dali. Genam lo ikum go, sagot tang klaya gono, sot taidisonamon yam so, seni babu go, mo sengin go gemang ikum. ²³ Ngga ey, sagot tang meno no sot temu, taidisonamon yam dali so, yawet sogo sakuok sogo pung go gemang ikum dali. ²⁴ Seni eygo sengin go ngga-a, yawet sogo sakuok sogo lo gemang gut-sing. Sedi ngga, kunala sedue, blue sedue no genam lo mo pen. No, nemot go seni, nemotnang logo kua pen-newon.” ²⁵ Nggano, Yusuf lo deguena no gemang pu-tenawon: “Sedi namon ngga go seni kerlam. Seni so, aya deguena no, Ki Wali Iram lo mo pen: ‘sogo-a Nemot lo ya lemoy-yon?’ ²⁶ Sapi taidisonamon yam sogo ngga, yagui taidisonamon yam so. Nggano, sagot tang klaya go, sot taidisonamon ngga, yagui taidisonamon dali. Sedi namon ngga go seni kerlam. ²⁷ Sapi taidisonamon ey, sagot taidisonamon eygo ngga, yagui taidisonamon yam dali no, tenkua go kluongku pung-ayun genang gemang. ²⁸ At lo pu-tu go kalik, aya deguena no, Ki Wali Iram lo mo taling, sogo-a nemot lo ya lemoy-yon? ²⁹ Yagui taidisonamon santugun go ngge, ten mata sogo, usu wasma naklay, sogo-sogo tong kua tong go. Nan Mesir naklay no, ngga mea lemoy. ³⁰ Ngga blo idi logo, yagui taidisonamon dali, ten kua go kluongku mea pung-ayun. Yagui taidisonamon yam sogo, ten mata sogo ngge kunala mea kay-sing. Kluongku ngga kangok dega seni go nogo, nan naklay mea lekuoy seni. ³¹ .. ³² Danamon so aya lo sedi srek go, nemot go seni, tasam ngga Ki Wali Iram lo dali mo semu-sing. Ngga, keda so mea lemoy-asiun. ³³ Ngga sogo so, sedue klaya duo kunala eygo, iguong kalong eygo-a, aya lo se taling. Nan Mesir seding no sading no, kebali ngga nemot lo pluok genang. ³⁴ Ngga ey, kebalisedue temu, aya deguena lo se taling-sing dali. Ngga ey, don nemotnang nogo se iti. ³⁵ Wasma seni tanamon so wasey go, idi-a tegek go yakena-yakena no klik go ten yap ba sono, Nemotnang lo, senginku, yagui taidisonamon ngge ba no iyaluim genang. Yaluim gono, nemotnang lo yay mea suisuing. ³⁶ Kluongku, yagui taidisonamon pung gono dam genang wasma ngga-a gemang. Ngga tang sogo so, ten logo blung meakua leguot.”

Nan Mesir no gubernur so Yusuf temuit go

³⁷ Yusuf go kunala ngga, deguena ey nemot go kebalisedue eygo lo, gemang yang-nenawon. ³⁸ Nggano, nemotnang no deguena lo gemang pu: “Yang sedue meno-a, imot logo ya kua taling gabe. Ki Wali Iram go waglo lo ngunguok go, nemot ngge-a gabe.” ³⁹ Yusuf sono deguena lo, gemang pu-tenawon: “Ngga naklay, mot no Ki Wali Iram lo mo pen. Ngga sik so ikum go, mot-a kunala kalong eygo sedue gabe. Nggano, mot logo, suey so senong go mea kebali dali. Mot-a kunala blong eygo sedue. ⁴⁰ Gubernur so mot, genam lo gabe tetemuit. Mot nogo keng duduk-a, genam go blung naklay logo mea. Mot blo nogo, don blo sogo genam-a klaya gabe.” ⁴¹ Ngga ey, deguena go taglang sik sogo iwontuk, "cap" ey klik go deguena lo sok go, Yusuf go taglang no gemang kok-nawon. Nggano, gemang pu-tenawon: “Ngge, kokok go tang so, nan Mesir naklay no gubernur so, genam lo gebe temuit-situgu.” ⁴² Ngga ey, amka lenan walong go, susuot sogo Yusuf nogo gemang kok. Nggano, samondan nemot go blindon nogo, gemang glong dali. ⁴³ Nggano, kuda lo lek go kebleng, Yusuf koklong genang sogo, deguena go namon tete sogo-a gemang iti dali. Nggano, nemot yay suing go, ta kokong genang sogo, gemang iti dali. Nemotnang ngga banim temu no koklong, gemang ya pupu-klong: “Ka! Ka! Tap se itak-klong! Nggakalik so, nan Mesir naklay nogo gubernur so, Yusuf gemang temuit. ⁴⁴ Yusuf no deguena lo pu go: “Genam ngge deguena. Genam lo gabe pupu: “Mot lo kua yang go, sedue klayanang go logo, nan Mesir naklay nogo, sogo-sogo yakua pluok gabe.” ⁴⁵ Ngga ey, Yusuf nogo, Mesir go sui deguena lo gemang temuit-nawon. Yangga, "Zafnat-Paaneah" so gemang temuit. Nggano, Yusuf nogo kabung klaya, gemang tong-nawon dali. Kabung ngga go sui, Asnat Potifera go denun. Yakena Heliopolis go imam so kebali go. ⁴⁶ Deguena Mesir go kebali tamlak go, pupluok go nogo, Yusuf go yagui 30 yam no. ⁴⁷ Yagui taidisonamon senginku ba nogo, wasma seni sengin go, naklay mata dega seniso, ususomani-yapsomani. ⁴⁸ Yakena-yakena go ten yap ba no, sagut ngga Yusuf lo yaluim go gemang degut-sing. ⁴⁹ Sagot seni go, miam dega ey, beap kaseglok kalik go tang sogo nogo, Yusuf lo tagu i genang yakua. ⁵⁰ Seni so, kluongku ngga, maning kua pung gono, duo sedue denok namon ey, Yusuf senun Asnat lo gemang tui-natun. ⁵¹ Nggano, Yusuf lo pu go: “Genam go dabui sadui-iseng, genam go aka-yap nogo, Ki Wali Iram logo tang so, mo kay seni gabe.” Ngga tang sogo so, sedue denok trang sogo, “Menasye”q so gemang temuit. ⁵² Nggano, tandali Yusuf lo pu go: “diding ba logo ku no, genam nogo duo, Ki Wali Iram lo mo iti.” Sedue denok namon tete sogo sui, “Efram”r so gemang temuit ⁵³ Nan Mesir nogo senginku, yagui taidisonamon yam sogo ngga, gemang lung-sing. ⁵⁴ Ngga blo idi logo, kluongku yagui taidisonamon dali, gemang pung. Yusuf lo pen go kalik gemang lemoy-anatun. Kukunan blo naklay, kluongku ten kua go ku, gemang pung-anatun. No, nan Mesir naklay nogo, dali-dali mo ta go ten gemang. ⁵⁵ Nan Mesir sogo blung, yam so ten lo se …, deguena no weng go, nemotnang lo ten gemang wadong. Nggano, deguena lo pu gono, ‘Yusuf sono nemotnang gemang weng-lak.’ Nggano, Yusuf lo pen go naklay no, nemotnang gemang keng-netenawon.* ⁵⁶ Kangok so naklay kluongku ngga se lelemoy. Nan Mesir naklay sono, deguo gemang dayap-anatun: ‘yakena-yakena sogo ten yap, Yusuf lo mo tenuing-sing. Nggano, Mesir sikabung nogo so, ten gemang nay-sing. ⁵⁷ Kukunan seding-seding sik sogo, Yusuf sono weng go, duoy lo ten king-netenawon. Seni so, kluongku tenkuago ngga, naklay kangok dega seni. Kukunan naklay nogo, nago-nago nogo ten yam so, se kua-anatun.