Pasal 40
Boy ba sogo sedue lo srek go sedi Yusuf lo seni pen go
1
Ngga blo idi lo, Mesir go deguena nogo kuklue, bu so iti go ey, ten so iti go sedue eygo lo gemang pluok.
2
Ngga tang so, kebali sedue namon ngga nogo, deguena go dabuipiam kangok.
3
Nemotnamon, plesedue wengkabui go yap ba sogo boy, Yusuf eygo ba sono gemang betep.
4
Boy ngga ba sogo, nemotnang walong so mo suing. Boy ba nogo kebali tetaling genang so, Yusuf-a boy wengkabui lo gemang taling.
5
Ku meno wadi go, deguena no bu so iti go ey ten so iti go eygo lo, sedi bukerlam go gemang srek-klenawon. No, nemot go seni-a banom-banom.
6
Ngga utep go, nemotnang mit no Yusuf weng go, nebuemnemu usukso, nemotnamon gemang ikum-nawon.
7
Nggano, Yusuf lo usi go: “Nggeasui go, sogo temoy no, motnamon go nebuemnemu, u suk-a ne?”
8
Nemotnamon lo wa go: “wadi atnamon sedi srek go. Nemot go seni senong go pen genan sedue, kua go.” Nggano, Yusuf lo pu go: “Yang! Ki Wali Iram seguong logo so, sikabung go sedi senong go, seni mea pen. Sedi nemot-a, pen-klesando ya!”
9
Nggano, deguena no bu so iiti golo gemang pen-nawon: “Genam go suong ku no, anggul nuik pung go, sedi so gemang ikum-tu.
10
Anggul nuik ngga temoy nogo kali-kali, nangglik ey pung-sing. Nemot go kali temoy nogo, dop demening pupung go, un ey pung go kekayso bata. Nggano, seni tagot-anatun go, kekayso mo sengin dali.
11
Woy ngganemot nogo, deguena go bu so dedrop go tegun, genam lo iti go susuing. Anggul sengin ngga, genam lo buo go, deguena go tegunbu ba sono gemang sik-tu. Nggano, deguena lo drop genang so gemang iti.”
12
Ngga ey, Yusuf lo pu go: “Sedi go seni ngge kalik: ‘nanglik ey kali wo go ngga, ku nanglik.
13
Ku nangglik ngge ba no, boy ba sik sogo, deguena lo mot taitak go mea pung. Nggano, kebali banim go dali no, mot mea kebali. Banim go kalik, deguena nogo bu iiti genang so mea pu.
14
No, mot mo suey go nogo, genam sogo kua kay, se duing dali! Deuena nogo, genam sogo nebut nase pen dali. Boy ba sik sogo, genam pung dali genang.
15
Yang! Genam ngge, sedue Iblani, wawi go weng go. Nan Mesir ngge nogo, genam kuklue kua semu. No, boy ba nogo genam tebadali betep go.”
16
Deguena go ten so iiti go senong go: “Bu so iiti go sedue go sedi, nomot go seni suey.” Nggano, Yusuf no nemot lo gemang pu-tenawon: “Sedi so genam lo srek dali go: ‘loti kala nangglik ey wengkabui blono, genam lo kong gono gemang koklong.
17
Blo da sogo kala ba nogo, sukmeno-sukmeno sogo muk gemang king. No, mukseney ngga, wi lo weng go gemang dedam.”
18
Ngga ey, Yusuf lo pu go: “Sedi go seni ngge kalik: ‘kala nangglik ngga, ku nangglik.
19
Ku nangglik ngge ba no, deguena lo pu go mot go wengkabui, sedue lo mea tong. Nggano, di no nglung go, mot go saysuk kedong wi lo mea dam.”
20
Ku nangglik dali no, deguena tui go ku mea pung. Nemot go kebali sedue naklay nogo so, walop kangok go gemang kong-nawon. Nemot lo pu go, bu so iiti go sedue ey, ten so iiti go sedue ey, boy ba sik sogo gemang pung. Wawi go, kebali sedue go nemuku sono gemang weng.
21
Bu so iti go sedue-a, nemot go kebali banim go dali sono gemang taling-nawon.
22
No, ten so iiti go sedue-a, kebong genang sogo idekeba gemang pu-nawon. Ngga naklay, Yusuf lo pen go kalik se lemoy-anatun.”
23
No, bu so iti go sedue ngga, Yusuf nogo kunala kua duing. Naklay seni, Yusuf sogo kunala nemot se kay-sing.