Pasal 39
Potifar go senun ey Yusuf ey
1
Mesir sono Yusuf wawi go mo klong. Nan Mesir no pung go, deguena go yap yay sogo plewengkabui Potifar sono, sedue-sedue Ismael ngga lo Yusuf gemang nay.
2
Woy Wali Iram lo Yusuf no tebok go nogo, kebali-kebali nemot lo pupluok go naklay seni ey lelemoy. Nemot go tuam sedue Mesir ngganemot go yap ba so, Yusuf gemang suisuing.
3
Nemot lo pupluok go naklay seni ey lelemoy go, Potifar, Yusuf go tuiam, ngga kalik ikum go mo senong, Woy Wali Iram lo Yusuf no tebok go nogo gabe.
4
Ngganemot nogo, Yusuf nogo Potifar go yakay kangok. Ngga tang sogo so, nemot go yap dabui ba no, tebok genang so, Yusuf gemang pay-nawon. Nemot go yap ey yaptenglam eygo ba naklay, Yusuf lo tamlak genang so, Yusuf seguong sono gemang itak.
5
Ku ngganemot sik so, Yusuf tang sogo so, sedue Mesir ngga go yaptenglam nogo, Woy Wali Iram go taitiklum kangok so gemang uweng. Nemot go yap ba sogo, usu sogo naklay, Woy Wali Iram go taitiklum gemang uweng.
6
Yusuf go ta ba sono Potifar go sogo-sogo naklay gemang itak. Ngga kalik go tang sogo so, nemot go yap ba sogo usey genang sogo naklay, Potifar tang go kua tebok. No, nemot go tendedam-a, nemot tang sogo gemang uusey.
Yusuf ngguot teguo go
7
Ngga ey, ku kata yam so suing gono, Yusuf ey srek so Potifar senun naklay mo duing-tun. Ngga ey, srek sogo so Yusuf gemang poplong.
8
No, tenguo gono, Yusuf lo gemang we-tenawon: “Esang mia, demu kua go! Genam go taba sono tuiam Potifar lo, nemot go naklay-naklay mo itak. Ngga tang so, sogo-sogo yap ngge ba sogo nogo, kunala duing kua goso mo itak.
9
Yap ngge ba nogo aya tuiam ey genam eygo don mo kerlam. Genam go ta ba no sogo-sogo kua itak go kua. No, mia tang go-a aya tuiam go, genam logo yakua mlak. Tayba kuaseni go ngga, genam yakua pluok, kuklue Ki Wali Iram nogo genam yakua pluok dali?”
10
Kuno-kuno kamso, Potifar senun lo mumlue. No, duongguot ngga nemot ey srek genang yakua.
11
Ku meno so, sedue kabung temu kua, yap ba kebali so Yusuf gemang degut.
12
Yusuf go amka no, Potifar senun lo lek gono gemang pu: “Weng-a saduikenok-mleyon sogo se!” No, tateglok go Yusuf gemang kap. Kekap gono, kabung ngga go ta temoy no amka-a gemang itak.
13
Potifar senun ikum go, Yusuf kap go amka-a ta temoy no mo itak ba?
14
Kebali sedue kabung usi gono, gemang pen-tenatun: “Ikum-a! Iblani duo ngga, yap ngge ba no, genam go sedue lo wawi go weng go. Imot nogo suongsut nemot lo taling go. Genam go degu ba sono nemot degut go, genam ey saduikenok so poplong.
15
No, wak genam lo klung go tang so, dia sono nemot gemang kap. Nemot go amka-a, genam go ta temoy no gabe itak.”
16
Nggano, Yusuf go amka ngga, Potifar senun lo tui go gigit, e…kebali sik sogo kenin gemang pung.
17
Dabuikoy-dabuikoy ey, keda so kenin sono gemang pen-natun: “Ikum-a! Iblani duo ngga, yap ngge ba no mot lo wawi go weng go. Imot nogo suongsut nemot lo taling go. Degu ba sono nemot degut go, genam ey saduikenok sogo so gemang plong.
18
No, wak genam lo klung go tang so, dia sono nemot gemang kap. Genam go ta temoy no, nemot go amka-a gabe itak.”
19
Ngga tup-nawon go, Potifar kangok so dabuipiam gemang tra.
20
Nggano, nemot lo pu goso, deguena go kebalisedue so tega go boy ba sono, Yusuf gemang betep.
21
No, Woy Wali Iram lo tebok go nogo, Yusuf nogo klum kangok so gemang taling. Boy wengkabui Yusuf nogo yakay kangok.
22
Boy ba kebali semu genang don, Yusuf go ta sono boy wengkabui lo gemang itak. Boy ba sogo sedue naklay Yusuf lo gemang tetaling.
23
Yusuf lo suey so mo sesemu go nogo, Yusuf no mo itak go kebali ngga wengkabui logo kua sesemu. Yusuf no Woy Wali Iram lo tebok go nogo, nemot lo pupluok go kebali naklay, seni ey gemang lelemoy.