¹ Ku ngganemot nogo, ntatonnang itak go Yehuda-a gemang klong. Yakena Adulam so Hira ey gemang suisuing. ² Ngga sogo, kabung denok meno gemang. Nan Kanaan sik sogo Sua go denun, Yehuda ey ta keduik go. Nggano, Yehuda lo gemang iti. ³ Keduong so nemotnamon lo tui go duo, Er so nglangin lo gemang temuit. ⁴ Namon tete sogo sedue dali tui go, Onan so gemang temuit. ⁵ Nggano, Kezib so Yehuda suisuing gono, nangglik tete sogo sedue dali tui go, Syela so gemang temuit. ⁶ Danon trang Er nogo so, Tamar-a Yehuda lo gemang tong. ⁷ Er go taybat kangok dega seni. Ngga tang sogo so Woy Wali Iram dabui piam go, Er-a gemang kebong. ⁸ Nggano, ntaton Onan so Yehuda lo pu go: “Mot ngge Er go sat. Klong-a! Aka logo kabung nalo mot lo duk-a! Aka go duduing mot lo se lemoy. Ngga tang so, mot go aka nogo duo tui genang.” ⁹ No, Onan mo senong, ‘nemot logo duo nggga nemot go sui no mea kua degut.’ Ngga tang sogo so, kabung ngga ey Onan saduikenok go nogo, nemot go nenbu dia sono gemang pipi. Ntaton trang nogo duo tui genaning so. ¹⁰ Tasam ngga tang sogo so, Woy Wali Iram dabui piam go, Onan gemang kebong dali. ¹¹ Nggano, denun duo go Tamar so, Yehuda lo gemang pu: “Klong-a, mot go aya-mia mit so se suisuing, e.. genam go duo Syela babu gono.” Ngga kalik pu go ngga, Yehuda suali tra go, Syela kabung ngga iti go, ntaton namon kalik mangne ya kebong dali. Ngga ey, nemot go unen nglangin go yap no Tamar gemang klong. ¹² Ngga blo idi lo, Yehuda senun gemang kebong. Genuing yam so suing gono, nemot andua Hira, Yehuda lo pu go Adulam sik sogo, Timna no, nemot go domba dit so ndok go sip sono, gemang kenawon. ¹³ Tamar tup-natun go, siomasi Yehuda, nemot go domba dit ndok so, Timna sono mea weng. ¹⁴ Sedue mo kebong go amka-a sok go, way so amka meno-a kok go, nebuemnamu-a amka meno lo kebet. Ngga ey klong go, Timna sono koklong go, yakena yataput Enaim so gemang got-tenatun. Yang! Tamar mo senong: ‘Yehuda go danon sat Syela mo kangok’ duonguot ngga eygo nemot maning kua tong ne. ¹⁵ Yehuda koklong go, Tamar ikum-nawon go, nemot lo duing go: ‘ngge kamea kabung gabe!’ Amka lo nebuemnemu mo kebet go nogo. ¹⁶ Ngga ey, dagu sono Yehuda klong gono, gemang usi-tenawon: “Drang kata yam so ya pu lo?” Seni so, Yehuda kua senong, ‘ngge nemot go duokabung tang go.’ Nggano, Tamar lo pu go: “Aya go ba so lo!” ¹⁷ Nggano, Yehuda lo pu: “Kambing nok meno-a, mot nogo so ya tong-kundu!” Way so Tamar lo pu go: “Ngga suey lo! No, namboyna go taut-a se itak lo, e… aya logo kambing ngga, genam go ta no iti gono taut ngge tandali mea idok.” ¹⁸ Nggano, Yahuda lo gemang usi: “Namboyna go sogo-a ya iti?” Way so Tamar lo pu go: “Genam no mot go stempel nemot go tegan ey teguoli eygo-a se iti-sando.” Nggano, taut ngga nemot sono Yehuda lo gemang ikak. Ngga ey, saduikenok-kenatun go, Tamar duo ey gemang nenguon. ¹⁹ Tamar yap sono klong gono, nebuemnemu no kut go amka truk go, sedue mo kebong go amka-a way so kok go, gemang got-tenatun. ²⁰ Ku kata yam so suing gono, Hira, Yehuda lo mot-dak go gemang klong. Nemot go menay ey iti gono, nemot go taut ngga tandali ikak genang so. No, Hira logo kabung ngga kua tegu-srenawon. ²¹ Enaim sogo sedue kabung no Hira lo usi go: “Kamea kabung ngge sogo, nago so suisuing?” Ngga sogo sedue kabung lo way so pu go: “Ngge sogo, kamea kabung kua suisuing” ²² Nggano, tandali Yehuda mit no Hira klong gono gemang pu: “Kamea kabung ngganemot, genam kua tegu go se. Ngga sogo, sedue kabung lo pu go: “Ngge sogo kamea kabung kua.” ²³ Yehuda lo pu go: “Nuey-a taut ngga-a nemot nogo so itak-a! Imot nogo suongsut-a kua taling. Nemot nogo drang iti genang so, genam lo mo usey. No, nemot kua tegu go sogo so kua iti.” ²⁴ Banu nangglik yam no, Yehuda deguo gemang tup: “Mot go duokabung tap duo gabe mo nenguon.” Nggano, tamot motdak go Yehuda lo gemang pu-tenawon: “Nemot wawi go weng go, koy no nemukiki so puit-dak go se kebong!” ²⁵ Tamar wawi go koklong gono, nglangin siomasi Yehuda sono, nebut gemang pung. Tamar lo pu go: “Duo ngge so lemoy go nglangin, taut ngge go sedue, ngge nemot logo duo gabe. Se ikum, stempel tegan ey, teguoli ey. Nando go mo, genam nemot logo duo gabe.” ²⁶ Yehuda lo taut ngga nemu so kling gono, gemang we-tenawon: “Kabung ngga kua kuklue sang. Nemot nogo, genam go idekeba kua taling go nogo. Nemot-a genam go duo Syela no genam lo itak genang sogo.” No, Tamar eygo Yehuda tandali go sadui kua kenok. ²⁷ Duo tui genang ku pung gono, Tamar lo duo namon ey gemang tui. ²⁸ Duo tui sogo no, duo meno go ta-a banim gemang pung. Nggano, nemot so tebok go kabung lo, ta ngga mlak gono, buom-buom sogo dan lo gemang dok. Tebok go kabung lo pu go: “Ngge banim tui go duo gabe.” ²⁹ No, duo ngga lo tandali nemot go ta gemang lek. No, duo meno dali-a banim gemang tui. Nggano, nemot so tebok go kabung lo pu go: “Pung sogo so, ngga kalik mot lo motdak goso be!” Banim tui go du ngga go sui, Pereso so gemang temuit. ³⁰ Ngganemot no, ntaton sat ta no dan buom-buom ey dok go gemang tui dali. Nemot go sui, Zerahp so gemag temuit.