Pasal 37
Yusuf ey ntatonnang ey
1
Nan Kanaan nglangin Isak logo yakena no, Yakub gemang got-nawon.
2
Yakob go yaptenglam no lemoy go nebutpen ngge kalik gabe.
Danon Yusuf go yagui 17 yam no ntaton trangnang ey, kambing-domba yay sogo gemang keng. Yangga, Bilha lo tui go ey Silpa lo tui go danon, nglangin go senun koybutasemu lo tui go duo-yap. Ntatonnang lo pupluok go taybat-taybat, Yusuf lo klong go, nglangin nogo gemang pepen
3
Seni so, Yusuf ngga sedueseni yam no, tui go nogo nglangin go klum Yusuf nogo kangok dega. Danonang temu nogo klum ey kua kerlam.
Ku meno no, amka teguop seni gok, Yusuf nogo so Yakob lo gemang semu-nawon.
4
Ntaton trang-yap ikum go: “Yusuf nogo-a aya klum kangok ba? Atnang nogo ey kua kerlam?” Ikle-ikle so Yusuf nogo gemang semu-netenawon. Yusuf eygo suey so nemotnang kua ngengam.
5
Ku meno so, wadisedi so Yusuf lo gemang srek. Sedi ngga ntatonnang no pen go, ntatonnang dabuipiam kangok so Yusuf nogo gemang tetra.
6
Wadisedi ngga, ntatonnang sono Yusuf lo ngge kalik gemang pen: “Tup-kelo ya!
7
Wadisedi so, usu so imot naklay sagot ibot go, imotgo-imotgo pluoso-pluoso gemang dok-sing. Genam lo dok go tete-a kong go wisi so ip. Motnang lo dok go tete weng go, genam lo dok go mit lo wok teguot go, ngga ey, genam lo dok go sagot sono gemang unuik-sing.”
8
Sedi ngga tup gono, ntatonnang lo way so tenguo go: “Mot lo duing go, atnang nogo deguena so mot-a ya lemoy lo?” Sedi ngga ey nglangin no nebut pepen go tang so, ntatonnang dabui ikle kangok so gemang tra.
9
Nggano, wadisedi meno srek go, ntatonnang no gemang pen dali: “Wadisedi so genam lo ikum go: ‘woy ey banu ey, nggano ut top 11 yam so weng go genam go suongku no gabe unuik-sing.”
10
Sedi ngga klong go nglangin no gemang pen dali. Nggano, nglangin lo gemang bebat: “Sogo kalik go sedi yabung? Mot lo duing go, genam ey mia ey, nggano mot go akanang naklay weng go mot no susubu ya wit?”
11
Yusuf nogo, ntatonnang logo dabui ikle-seguong so. No, nglangin-a dabui ba lo sedi ngga go seni tega-tenawon.
Yusuf duoy so nay go nan Mesir no wawi go klong go
12
Ku meno no Shikem sono, nglangin go kambing-domba yay so, Yusuf go akanang lo wawi go klong gono,
13
Yusuf so Yakob lo gemang we-tenawon: “Nan Shikem no imot go kambing-domba yay so, akanang suisuing go mit no mot se klong!” Nggano, Yusuf lo yang go: “Ngga suey lo aya!”
14
Nglangin lo pu go: “Akanang ey kambing-domba eygo ikum sogo be. Nemotnang suey seguong so? Nggano, genam nogo weng go se pen.”
Ngga ey, Hebron pay itak go Yusuf gemang klong. Ku walong kua luik gono, Shikem no Yusuf gemang pung.
15
Nggesono-nggasono, ntatonnang so maning uwet gono, sedue meno gemang tegu-nawon. Nggano, sedue ngga lo usi go: “Sogo so wet-togoy?”
16
way so Yusuf lo wa go: “Akanang, kambing-domba yay so suisuing goso, wet-tugu go se. Nemotnang aya mo senong?”
17
Sedue ngga lo pu go: “Ngge sik sogo nemotnang mo klong. Nemotnang lo pu gono, genam tup go: “Dotam sono” nemotnang gemang klong-lak.” Nggano, Dotam sono mesip so, ntatonnang mit sono keng go, Yusuf koklong go nemotnang gemang ikum.”
18
Nemotnang mit no maning kua pung gono, ket sik so nemotnang lo Yusuf mo ikum. Nggano, Yusuf but genang klay gemang pen.
19
Ngge kalik nemotnang goso gemang pen: “Ikum-a! Sedi so sesrek go sedue ngga uweng go.
20
But-eyon gono, bumu ba no nemot go temoy mea betep. Ngga no mea pu: ‘menay iseng eygo lo uluk go mo dam.’ Nemu luik genang, nemot lo srek go sedi ngga, sogo kalik so ya lemoy?”
21
Nemotnang go atuia ngga, Ruben tup gono Yusuf susuoy genang so, gemang pu: “Nemot-a kua but!
22
Bumu ngge ba sono mea betep-eyon. No, nemot demun kua but, kin kua pi.” Ngga kalik Ruben lo pu go, duiduing: ‘susuoy so itak go yap no Yusuf pu go klong genang so.’
23
Nemot go akanang mit no Yusuf pung gono, Yusuf go amka teguopl go ngga, nisno so gemang sok.
24
Nggano, ku lo lek go, bumu ba sono gemang betep.
25
Ten so nemotnang dedam gono, tang Ismael sik sogo amble duo, yakena Gelead sik so nan Mesir no, nay so koklong go gemang ikum. Nemot go menay unta blo nogo, ‘rempah-rempah’ ey ‘kismis’ eygo naynang so king go koklong.
26
Nggano, ntatonnang no Yehuda lo gemang pu: “Imot go sat but-eyon gono yakot so suing go, nemot go seni sogo kalik ya?
27
Ngga sedue tang Ismael no ya nay go! Nemot nogo iseng-a kua taling! Nemot ngga imot go sat gemang.” Ngga ey, Yehuda lo pen go nebut no, ntatonnang gemang keng.
28
Nan Midianm sik sogo sedue-sedue nay sogo ngga koklong go. Ngga ey, bumu ba sik so Yusuf tandali sok gono, sedue Ismael no 20 keping perak lo gemang nay-nenawon. Nggano, nay sogo sedue-sedue nggan lo nan Mesir sono Yusuf king go gemang klong.
29
Ruben kua senong, bumu ngga no Ruben tandali pung go, Yusuf kua ikum-srenawon. U sogo so, nemot go amka gemang tegrok-nawon.
30
Tandali ntatonnang mit no klong gono, gemang we-tenawon: “Bumu ba sogo denok ngga kua go. Nggeasui go, sogo kalik ya semu-lu?”
31
Nggano, kambing meno nemotnang lo tong go, Yusuf go amka kambing kin ba no gemang yuom.
32
Yusuf go amka ngga ey, nemotnang lo motdak go iti go, nglangin sono gemang klong. Ngge kalik gemang pen-nenawon: “Amka ngge tap so atnang lo iti go, ngge aya go duo go amka?”
33
Yakub amka ngga kekay so nemu so se kling-nawon. Ngga no gemang pu-tenawon: “Yang! Ngge genam go duo go amka lo. Menay iseng eygo lo nemot mo uluk. Esang! Menay iseng eygo lo, Genam go duo Yusuf sruep go mo dam. Nemot mo kebong sang.”
34
Yakob go amka teglok-nawon go, genuing amka-a kok go got-tenawon. Kuno-kuno Yusuf u so kukluo.
35
Nemot go danonnang ey denun eygo lo weng go nemot umlue go. No, nemotnang lo umlue go nogo kua tup-srenawon. Nemot lo pu go: “Genam kebong go nogo, genam go duo ngga u-a senang so mea kukluo.” Yusuf tang sogo so, Yusuf genuing-a Yakob got-tenawon.
36
No, Yusuf-a deguena go yap yay sogo, plewengkabui Potifar sono sedue Midian ngganemot lo Yusuf gemang nay.