ribkaarsel-kmt_gen_text

Pasal 50

¹ Ngga ey, nglangin blo sono, Yusuf saysuk betep go, ta teguot go, yam so nebuemkuang tegok go, u gemang kluo-nawon. ² Ngga no, nemot go kebali sedue dokter-dokter sono Yusuf lo pu go, nglangin go nan, don ey gigit genang, mlay ey didop eygo lo gemang semu-nenawon. ³ Seni so, mlay ey didop eygo so semu go ku 40 yam no. Ku 40 ba no, yam so gemang semu-nenawon. Ngga ey, sedue Mesir lo Israel kebong go u so kluo-nenawon go, ku 70 yam no. ⁴ Genuing ngga yam so suing gono, Firaun go yaptenglam no Yusuf lo pu go: "Mot go klum genam nogo ya iti? ⁵ “Aya lo pu goso, tegadi genam lo ta ey mo nat gabe.” Ayalo pu go: "Ku Walong kua gono genam mea ip-lu! Genam go simu nan Kanaan so dali mo tuet go, ngga ba no genam klong go se tui-balo.” Ngga tang so, genam itak go se klong, genam go aya ngga no tui sogo so be. Nggano, tandali genam mea weng." ⁶ Ngga ey, Firaun lo pu go: "Ngga sono go klong-a! Nggano, aya nase tui-balo. Tanat ey mot no mo pen go kalik." ⁷ Ngga ey, nglangin tuet sogo so, Yusuf gemang klong, kerlam so nemot ey Firaun go kebali sedue ey gemang keng-lak dali. Yangga, istana sik sogo woy-woy, nggano, nan Mesir sik sogo woy-woy naklay. ⁸ Yusuf go yaptenglam ba sik sogo naklay. Ntatonnang, nggano, nglangin go yap ba sik sogo naklay. No, menay kambing-domba ey denok eygo, nggano, lembu-sapi eygo-a, nan Gosyen no gemang itak. ⁹ Kereta ey, kuda logo sedue ey naklay keng go gemang klong-lak. Kerlam so nemot ey, nggatangso liling go tala ngga kangok dega. ¹⁰ Ngga ey, nemotnang Goren-Haatad bu Yordan ngga idi no pung go nogo, u kangok so nemotnang lo gemang kluo dali. Ngga nogo ku 7 yam so, nglangin tang sogo so, Yusuf lo genuing gemang sung. ¹¹ Nan ngga sogo, seduekabung Kanaan, Goren-Haatad nogo genuing sung srek go ngga, nemotnang lo pu go: "Ngge, sedue Mesir go sikebong genuing, naklay kangok dega seni go." Ngga tang sogo so, sip ngga Abel-Mizraim* so gemang pu. Yordan bu ngga idi so, sip ngga gemang. ¹² Nemotnang no pen go itak go kalik, nemot nogo Yakob go danonnang lo, gemang pluok-nenawon. ¹³ Nan Kanaan sono, danonnang lo Yakob king go gemang klong. Nggano, demuput Makpela ba no nemotnang lo gemang tui. Nemot go simu sip so lemoy genang sogo so sedue Het, Efron sik so duoy lo Ablaham lo nay go demuput. Ngga, di Mambre woyklak idi sogo usu. ¹⁴ Ngga ey, mu no nglangin tui go, nan Mesir sono ntatonnang ey, tandali Yusuf gemang klong. Nggano, nemot ey glangin tuet so ngga sono keng go klong go, sedue kabung naklay ey, tandali gemang klong.

Ntatonnang go dabui Yusuf lo yakay go

¹⁵ Yang seni so, nemotnang go nglangin mo kebong. Yusuf go ntatonnang ikum go, nemotnang lo pu go: "Imot nogo dabuisadui way Yusuf lo mea taling-yon. Ngga, imot lo taling go taybat way mea taling-yon." ¹⁶ Ngga tang so, nemotnang lo pu go, nebut ngge pen so, Yusuf sono gemang weng: "Aya maning kua kebong go nogo, nemot mo pen-yom! ¹⁷ Ngge kalik so, Yusuf nogo motnang lo se pu-kelo: "Esang, atnang go kuklue, ngga sono ya kay-sing lo? Nggano, nemotnang go kuklue ya kay-sing. Seni so, mot nogo taybat nemotnang lo mo semu. Nggeasui go, nemotnang aya go Ki Wali Iram go tamot-tamot lo, semu go kuklue ya kay-sing lo." Ngga ey, Yusuf no ngga kalik sedue lo weng go pen go, tup gono Yusuf lo u gemang kluo. ¹⁸ Ntatonnang tang so weng go nemot go suongkuno unuik go gemang pu: "Atnang weng go, mot no koybutasemu so lemoy genang so." ¹⁹ No, nemotnang no Yusuf lo pu go: "Suali kua tra! Seni so, genam ngge, Ki Wali Iram way sogo suing go? ²⁰ Nemot-a, genam nogo kunala piam go motnang lo mo semu-kenanga. No, teguop genang sogo atuia-a Ki Wali Iram lo mo semu. Nemot go duiduing nggeasui lemoy go kalik lemoy genang so. Yangga, saula tang kangok go, meno wali yaysuing genang so mo lemoy. ²¹ Ngganemot sogo so, suali kua tra! Motnang go ten genam lo mea iti. Nggano, motnang go duo-yap nogo ten mea iti dali." Ngga kalik go nebut lo, nemotnang go dabui yakay genang nebut Yusuf lo gemang pen.

Yusuf kebong go

²² Yang, nan Mesir so nemotnang go tang ey Yusuf gemang suisuing. Nggano, Yusuf got-nawon go yagui 110 yam no. ²³ Efraim go duo-yap mamdat-yap, Yusuf mo ikum, e… mlena nangglik yam no. Makhir go mamtaton-yap, Menasye go duo, Yusuf go kebum blo no mo tui go yay mo suing. ²⁴ Mamtatonnang sono, Yusuf lo gemang pen: "Ku Walong kua gono, genam mea ip-lu. Motnang yay, Ki Wali Iram lo mea suisuing. Nggano, nan ngge sik sogo motnang wawi go mea pung. Abraham, Isak nggano Yakob eygo no, tegadi so tanat ey mo dok go nan sono, Nemot lo wawi go mea pung." ²⁵ Ngga ey, tegadi tanat ey Israel denok Yusuf lo pu go gemang dok-nawon: "Seni so, Ki Wali Iram lo motnang mea ikum. No, ku ngga nogo, ngge sik so pung go koklong go nogo, genam go tamasidon ey king go motnang se klong." ²⁶ Ngga ey, yagui 110 yam no, Yusuf gemang ip-nawon.* Nemot go temoy mlay ey didop eygo lo ut go. Nggano, sedue kebong goso tui go peti ba no, nan Mesir no gemang king.