¹ Nggano, Blong dem ngga, senun Kluay debui ey saduikenok go, senun duo iti go, sedue denok tui go, Kain* so gemang temuit. Ngga ey, kabung ngga lo pu go, ”Woy Wali Iram at no tebok go duo sedue denok klaya mo tui-tu.” ² Ngga bu nogo, duo sedue denok dali Kluay debui lo tui go, sui Habel so gemang temuit. Habel menay domba yay sedue so lemoy. No, Kain-a usu kebali sedue so lemoy. ³ Ngga blo idi logo, ku meno no, usu wasma sik sogo wasma temu, Woy Wali Iram sono, taitinang so Kain lo iti go gemang puit-biwon. ⁴ Ngga ey, domba sik sogo nok meno trang sogo-a klaya, Habel lo iti go tong gono taiti so, Woy Wali Iram sono gemang puit dali. Habel lo puit go ngga, teguop go suey so. Woy Wali Iram yakay ey Habel ey nemot go taiti eygo sono,* ⁵ no, Kain ey nemot go taiti eygo-a tenguo. Ngganemot sik so, dabuipiam kangok so Kain tra go, nebuemnemu naglong. ⁶ Ngga ey, Kain sono Woy Wali Iram lo pu go, ”Mot, sogo sagui so? Mot go nebuemnemu, sogo so naglong?" ⁷ Suey go-a mot pluok go, yakay-nebleng ey* mot mea. No, piam so mot lo pluok go tang so, mot go dabui ba sono, degut sogo so, kuklue mot so gemang bubung. No, mot-a don ey se suing.” ⁸ Ngga ey, ntaton sat Habel sono Kain lo pu go, ”Weng-a, imot usu sono ya klong.Ku nemotnamon usu sogo no, nemot go ntatonsat Habel Kain lo but go gemang kebong.* ⁹ Ngga ey, Kain sono Woy Wali Iram lo usi go, ”No, mot go sat Habel kay go?” ¹⁰ Ngga ey, Woy Wali Iram lo pu go, ”Tasam piam go ngga, sogo so pluok-to? Genam sono nan blo sik so 'kin way pi genang sogo so,' "mot go sat go kin lo u-usi go. ¹¹ Mot go piam tang sogo so, nan ngge piam gabe pupu dali. Mot go sat go kin pi go tang so, nan ngge lom dali ngang go gabe susuing. Nan ngge blo no usu mot lo semu go seni yakua. Sip kua go sedue kalik so, tapku lo mot-a mea uwet. ¹² Nan ngga blo no usu so mot lo usey go, sogo-sogo seni, naklay dui ey teguop so, mot nogo yakua tagot. Duenku lo nggenota-ngganota so kukunan blo lo mot-a mea teteguom.” ¹³ Ngga ey, Woy Wali Iram sono Kain lo pu go, ”Idekeba ngga naklay ide dega ey, genam logo yakua lek! ¹⁴ Nan ngge blo sik sogo, genam Mot lo yat go, sipsuing kua go sedue kalik nan blo lo mea teguom-tugu go, genam ey tegu go sedue lo genam way so but go mea kebong.” ¹⁵ No, Woy Wali Iram lo pu go, ”Kua! Kain nando lo but go? Nemot nogo way, da taidisonamon yam so idekeba mea taling.” Ngga ey, tataling genang so, Kain go saysuk no, Woy Wali Iram lo sak gemang kok. Kain but go kebong genaning.

Kain lo tui go tang

¹⁶ Ngga ey, Woy Wali Iram go suongku sik sogo, usu Eden woyklak idi sono Kain klong go, tapku lo wet go sedue kalik gemang got-tenawon. ¹⁷ Senun ey Kain saduikenok go, duo sedue denok gemang tui. Nemot go sui, Henok. Ngga tang so, yakena kangok go klaya Kain lo klik go ngga, danon go sui tang so ‘yakena Henok’ so gemang pu. ¹⁸ Henok ngga Irat go nglangin, Irat ngga Mehuyael go nglangin, Mehuyael ngga Metusael go nglangin, nggano Metusael ngga Lamek go nglangin. ¹⁹ Lamek go senun, namon ey. Ngga, Ada ey Sila ey ²⁰ Ada lo tui go, Yabal, nggano, Yabal ngga, menay so popong go, bala ba lo susuing go tang. ²¹ Yabal go ntaton sat Yubal. Yubal go tang ngga, bloma ey suling eygo so u-u go tang. ²² Sila lo tui go, Tubal-Kain. Sogo-sogo tasemu bomeno-bumeno naklay Tubal-Kain lo semu go gemang,* Tubal - Kain go demanon sat go sui, Na-ama ²³ Senun namon no Lamek lo gemang pen, "Ada ey Sila ey, at go kabungnang! At no kama se tui! Suey so se tup! At no tademun so but go, duoneguot meno, way so nemot genam lo but go mo kebong. ²⁴ Yang! Kain but go waynang so, sedue 7 dali so ya but go, no, genam but go waynang sogo 77 dali so way but go mea kebong."

Set nggano Enos

²⁵ Blong dem Adam ey senun Kluay debui Eva eygo, sedue denok dali gemang tui. Nggano, Kluay debui lo pu go, "Ki Wali Iram lo, Kain lo but go Habel way dali sogo mo iti. Ngga tang so, duo ngga go sui, Set so Kluay debui lo gemang temuit. ²⁶ Set lo tui go sedue denok, sui Enos so gemang temuit. Ngga ku sik so, kukunan blo nogo Woy Wali Iram go sui iway ta gemang kokong.