¹ Menay naklay Ki Wali Iram lo semu go sik sogo, kunala kalong eygo ngga lema. Ngga ey, kabung sono, lema ngganemot lo gemang usi, “Ki Wali Iram lo pu go, ‘usu ba sogo didon naklay ngge kua dam,’ ngga kalik so?” ² Way so kabung ngga lo tenguo go, "Kua, usu ngge ba sogo didon naklay tangkuapleng goso, atnang lo buo go se dam." ³ No, usu nesip sogo di sak ey Ki Wali Iram lo kok go-a, "Ta kua tra, kua buo go dam! Mo dam mo, mot mea kebong seni!" ⁴ Way so kabung sono lema lo pu go, "Kua-wa! Mot seni so, yakua kebong-wa. ⁵ No, Ki Wali Iram mo senong: mot didon ngga dam go, woy ngganemot no, mot go nemu pli go, Ki Wali Iram tang go kalik, suey go ey piam go ey mang ne ya senong." ⁶ Ngga ey, kabung ngga nemu iti-bitun go, ikum go: didon ngga dam go, suey lo tom ey, dabui ba nogo ey tra go, iguong ey plet-ak lo?” Didon ngga buo go dam-natun go, kenin klay goso nemot ey go nogo iti go gemang dam dali ⁷ Ngga sik so, nemotnamon go nemu plagum go, gemang senong: imot ulue so ba? Ngga no, di ara dop-a tung go, sedaku so gemang kut-klenatun. ⁸ Ku susuot ba lo, Ki Wali Iram usu ba lo kun-ton go masi kluim tup go, suali so usu ba sogo di ba no gemang tebok-klenatun. ⁹ No, sedue so Woy Wali Iram lo usi-siton, "Blong dem, Blong dem, mot nago so?" ¹⁰ Way so sedue lo tenguo go, "Usu ba lo, Mot koklong go masi kluim tup go, genam ulue sogo suali tra go tang so ngga ba no son go. ¹¹ Ki Wali Iram lo gemang usi, "Mot nogo, mot ulue sogo nebut, nando lo ne pen? Sak eygo didon buo go mot lo mo dam?" ¹² Way so sedue ngga lo tenguo go, "Genam mit no, Mot lo kong go kabung ngganemot lo, didon ngga iti gono, genam dam go!” ¹³ Ngga ey, kabung ngga sono, Ki Wali Iram lo pu go, "Sogo kalik so ngga mot logo mo pluok?” Ngga ey, way so kabung ngga lo tenguo go, "Lema ngga lo mlue gono, genam dam go!" ¹⁴ Nggano, lema ngganemot sono Ki Wali Iram lo pu go, "Mot lo ngga kalik semu go tang so, duen ba menay naklay sik sogo, mot nogo-a piam gabe pupu: ‘teguan lo mot mea kekatik. Mot go wali ba nogo, nansungkuim-a mea dedam. ¹⁵ Mot ey kabung ngge eygo, ya kua ngengam goso, Genam lo gabe sesemu. Nemot lo tui go duo ey, mot lo srui go nok eygo, yakua ngengam dali, e… kabung ngge lo tui go duo lo mot go wengkabui mea nedik. Nggano, nemot go masikemungdon no mot lo mea kuip. ¹⁶ Ngga ey, kabung ngga sono, Ki Wali Iram lo pu go, "Duo iti lo go nogo, sadui-sadui kangok so, mot nogo Genam lo mea tetaling. Iseng ba lo duo mea tui-togoy. No, mot go sedue nogo, mot go duiduing yakua tong. Ngga tang so, mot-a sedue go masi ba no mea suing." ¹⁷ Nggano, sedue nogo gemang pu, "Kabung go nebut no mot tup go keng go, didon sak ey At lo kok go ngga mot lo ne dam. Mot tang sogo so, nan nogo piam gabe pupu dali. Mot go wali ba nogo, ten dam sogo seguot lo mea usey-tegoy. ¹⁸ Wong diding ey nenguen eygo-a mea pung. Ngga no, duen ba didon-a mot go ten so mea lemoy. ¹⁹ Ten sogo, seguot ba lo mot mea la-daptogoy, e… tandali nan so mot mea lemoy. Seni so, ngga sik so iti go, mot semu go tang sogo so, nansung dali sono tandali mea klong." ²⁰ Ngga no, senun go sui, Kluay debui so Blong dem lo gemang temuit. Kluay debui nebuem-nebit eygo unen so, nemot lemoy go. ²¹ Nggano, menay domba suk sik so sedue ey senun eygo nogo so, amka Ki Wali Iram lo gemang semu-won. Nggano, amka ngga-a sedue ey senun ey lo gemang kok. ²² Ngga ey, Ki Wali Iram lo pu go, "Imot kalik suey go ey piam go ey, sikabung mo senong. Tasra-yon go, wali di sik sogo buo go dam-sreyon eygo. Ngga tang so, senang so nemot mea wali, ngga kua lemoy!"* ²³ Ngga tang so, usu Eden ba sik sogo, Ki Wali Iram lo sikabung yat go gemang pung. Nan sikso nemot iti go semu go, nan ngga-a nemot lo usey-tenayon sogo be. ²⁴ Usu Eden sik sogo yat go pung go, woyklak idi no nemotnang ngga Ki Wali Iram lo gemang itak. No, wali di sono go tap-a, Ki Wali tamot namon tengang kalong idop-idop eygo lo yay gemang suing. Wali di ngganemot no tandali sedue ey kabung eygo yakua pung genang so.