Pasal 2
1
Ut ey nan ey, nemot go seni, widasi-katikabot, kimdaguit-ulusemu, nemu lo ikum go kua ikum go, don naklay, ngga kalik semu go gabe.
Ku taidisonamon tete sogo
2
Ku taidisonamon tete nogo, takebali yam go, Ki Wali Kumam nim la gabe.
3
Ngga ey, tabuwit go taidisonamon tete sogo ku ngga, Woy Wali Iram tete so won kong go ku gemang. Seni so, ku ngganemot no, Nemot go takebali naklay takebuo go nim so la go ku.
Kunebut temu dali
4
aNgge, ut ey nan ey Ki Wali Kumam lo semu go nebutpen gabe.Ki Wali Kumam lo ut-nan naklay-naklay ngge semu go nogo,
5
kukunan blo sono go sa, Woy Wali Iram lo maning kua pu. Ngganemot nogo, kukunan blo nogo, wong-diding ey neguen eygo maning kua pung.
6
Uduong ey kuartkuem eygo maning kua pung dali. No, nan sik sogo kuwaw klak go, kebup bu li golo nan blo gemang say. Seni, nan blo nogo usu kebali genang sedue kua dali.
7
Ngganemot no, sedue-si nan iku sik so Woy Wali Iram lo rlang klik gono, nebuem ba lo waliwaglo-a gemang u-siwon. Ngga tang so, wali eygo so si ngga gabe wang.
8
Ngga sik so, woy klak idi sogo nan meno gemang. Ngga ba no usu Eden* Ki Wali Iram lo gemang semu. Usu yay suing genang so Nemot lo semu go sedue ngga-a gemang taling.
9
Ngga ey, ulu-semu teguop-teguop go usu damoy no gemang pung-anatun.
Se ikum: usu nesip nogo, senongduiduing eygo di namon ey gemang pung dali. Klaya nemot go seni dam go, wali-a mea suing. No, meno go seni dam go, suey go tap ey piam go tap ey naklay mea senong.
10
Ngga ey, usu Eden ngganemot sesay genang sogo so, ngga ba sik so betep go bu, tutruo namon-namon ey gemang sran.
11
Klaya tete sogo sui Pison bu, nan Hawila naklay sono betep go.
12
Sip ngga sik sogo emas ngga, teguop seni.Ngga sogo, damar nemon suey dato go ey, nggano, demu krisopras gemang dali.
13
Namon tete sogo butuo sui Gihon, ngga nan Nubia naklay sono betep go.
14
Nangglik tete sogo butuo sui Tigris bu, ngga woyklak idi nan Asyur sono betep go. Nggano, namon-namon tete sogo butuo go sui Efrat bu.
Didon sueygo-piamgo
15
Seni so, usu Eden ba no kebali semu genang so, sedue gemang nik.
16
Ngga no, sedue sono Ki Wali Iram lo gemang pu-ton: “Usu Eden ngge ba sogo didon naklay, suali kua goso buo go mot se dam-togoy!
17
No, usu nesip sogo didon, sueygo-piamgo-a, kua buo go dam-srelo, ngga kudemat! Mo buo go dam-to mo, mot mea kebong seni.”
Sedue seguong-a banom go kuaseni
18
Ngga ey, Ki Wali Iram duing-ton: Sedue seguong-a banom go kuaseni. Nemot ey kerlam dali go-a, nemot no tebok genang so mea semu-lu.
19
Ngga ey, menay naklay iseng eygo, iseng kua go, nan sik so semu go, wawi go sedue ikum genang so, nemot mit no gemang natun-lak, menay go sui sedue lo temuit-sing genang so.
20
Menay go sui ngge, sedue lo temuit go ngganemot gabe! Naklay sui yamso temuit-sing go, nemot tang gono tebok genang kua tegu-srenawon.
21
Ngga ey, usene so sedue-a Ki Wali Iram lo gemang wew. Usene so to-won gono, nemot go teglo don meno Ki Wali Iram lo sok go, sip dali-a kedong lo puem.
22
Teglo don ngganemot sik so, kabung gemang klik-Nawon. Ngga ey, sedue ngga mit sono, wawi go gemang weng.
23
Ngga ikum gono, sedue lo gemang we-tenawon, “Yang, ngge, nemot lo. At go don sik so wang go don, at go kedong sik so pung go kedong! Sedue sik so wang go tang so, ‘kabung’ so gabe temuit.”
24
Ngga tang so, sedue denok nemot go unen-ngangin itak go, senun ey kedong klaya goso mea lemoy.
25
Yang! Sikabung ngga, nemot-a ulue sogo, no, suongsut kua tra.