Pasal 35
Nemot go seduekabung daley ey Betel sono Yakub klong go
1
Ngga blo idi logo, ku meno no, Yakob no Ki Wali Iram lo gemang pu: “Aka Esau suali so kekap gono, mot no suong taling go ngga, Genam gabe. Nggeasui go, keda so mot Betel no se klong. Betel no Genam nogo demusung se kong!”
2
Ngga ey, nemot go seduekabung ey nemot go yaptenglam eygo no, Yakob lo gemang pu: “Ngge sik sogo imot ip go Betel no ya klong. Ki Wali Iram nogo demusung, Betel no klik balu sogo be.
Seni so, aka Esau suali so kekap gono, Ki Wali Iram lo genam mo tebok.
3
Ngganemot nogo, nago-nago no genam koklong go, Nemot lo mo tebok.
Ngga tang sogo so, motnang go blue-blue, saula-saula logo gemang go, ngga sono se tega. Wali ey saysuk eygo, bu se ulu. Nggano, konkua go amka-a se kok-sing.”
4
Ngga ey, nemotnang go blue-blue, duosana-sana, nguoydan srem saula-saula logo, Yakob go ta sono gemang ikak. Nggano, di kangok go nuik, yakena Shikem dagu sogo no gemang tuet-nawon.
5
Ku Yakob nemot go yaptenglam daley ey koklong go nogo, Ki Wali Iram lo saula-saula, ngga sogo suali so kukui go, nemotnang lo Yakobnang daley truik genang yakua.
6
Nggano, nan Kanaan, Yakena Betel no nemotnang gemang pluep-lak. Yakena nggganemot go sui banim go, Lus.
7
Sip ngganemot no, Yakob lo demusung kong gono, El-Betel” so gemang pu-nawon. Ntaton suali so Yakob kekap gono, nemot ey Ki Wali Iram tegu go tang so.
8
Sip ngga dali no, Ribka no tetebok go kabung ngga, Debora kebong go, yakena ngga sogo di kangok go ba no gemang tuet dali. Ngga tang sogo so, di ngga go sui “Uyawi di” so gemang temuit.
Betel no taitigualaklum Yakob no Ki Wali Iram lo iti go
9
Mesopotamia sik so, tandali Yakob weng go nogo, Ki Wali Iram ey Yakob tegu gono, Yakob blo nogo taitiklum gemang tui-nawon.
10
Ki Wali Iram lo nemot no gemang pu: “Mot ngge, Yakob so yakua usi. No, Israel so gabe pupu!” Ngga kalik so Israel sogo gemang temuit.*
11
Nggano, Ki Wali Iram lo tandali pu go: “Genam ngge, Ki Wali Kumam. Sinok miam dega so, mot lo se ke-singdap lo. Mot ba sik sogo saula-saula ey deguena-deguena ey mea pung dali.
12
Ablaham ey Isak eygo no itak go nan ngge, mot ey mot go duo eygo sono gabe itak-situgu.
13
Nggano, Yakob itak go, Ki Wali Iram-a gemang klong.
14
Yakob no Ki Wali Iram lo nebut pen go sip no, demu meno tataling genang so Yakob lo gemang kong. Demu ngga blo nogo anggulbu ey saytun mlay eygo pi gono Ki Wali Iram nogo so gemang itak.
15
“Betel” so sip ngga gemang temuit.
Rahel kebong go
16
Ngganemot no, seduekabung daley ey Betel Yakob itak go. Nemotnang Efrata yakena maning ket dato sogo no, Rahel duo tui genang ku gemang pung.
No, duo ngga tui genang diding ba lo.
17
Nemot go iseng kangok so tra gono, duo tasomlak go kabung lo gemang pu: “Debui don se kok! Duo ngge sedue denok dali gabe!”
18
No, Rahel i go yam so kebong yam no se. Dabuiwalong so, duo ngga go sui Ban-Onif so gemang pu-natun. No, Yakob lo Banyaming so gemang pu-nawon.
19
Rahel kebong go, Efrata tap ketang no gemang tuet-nawon. Nggeasui go Betlehem so gemang pu.
20
Tataling genang sogo ngga no Yakub lo demu gemang kong. Nggeasui go demu ngga lo, Rahel ba sik so pung go logo gemang tetaling.
21
Ngga blo idi logo, Yakob go tapmasi koklong go, bala sip meno "menara” Eder no gemang klik.
22
Nemotnang sip ngga so maning gono, nggangin go senun koybutasemu Bilha ey Ruben gemang srek. Nglangin Yakob ngga tup-nawon go, dabuipiam kangok soh gemang tra-nawon.
Yakob go danonnang 22b Yakub go danonnang 12 yam so.
23
Yangga, Lea lo tui go:trang sogo Ruben,Simeon,
Lewi,Yehuda,Isakhar,nggano Zebulon.
24
Rahel lotui go:Yusuf eyBenyamin ey.
25
Rahel go koybutasemu Bilha lo tui go:Dan ey Naftali ey.
26
Lea go koybutasemu Zilpa lo tui go:Gad ey
Asyer ey.Duo ngge Mesopotamia no tui-sing go gabe.
Ishak srong so pedueng go.
27
Nggano, Yakub nglangin Ishak go sip Mambre Hebron dagu no gemang pung. Banim go nemot babu Ablaham ngga dali so gemang suisuing.*
28
Yam so sedue seni so mo lemoy, yagui 180 yam no mo pung.
29
Isak ip* go Esau ey Yakob eygo lo gemang tuet-klenawon.