Pasal 34
Lea logo denun Dina kameatap so gluik go
1
Ku meno so, Yakob ey Lea eygo denun kaguit Dina, nemot andua Kanaan kaguit mit no gemang natun.
2
Nggano, saulatang Hewi go deguena, Hemor go danon Sikhem lo Dina gemang ikum. Tap no Sikhem lo Dina sagon go sikamea tap so gemang gluik-nawon.
3
Sikhem go dabui Dina so naklay mo duing. Nggano, nemot lo mlue go, dina go dabui mo iti dali.
4
Ngga ey, nglangin sono Sikhem lo gemang pu: “Genam nogo so kabung ngge-a, aya lo se tong. Nemot-a iti sogo so, naklay genam mo duing gabe!”
5
Yakub tup-nawon go: “Nemot go denun nogo taybat mo pluok ba?” No, nemot go menay yay so duen sono, danonnang klong go maning kua pung. Ngga tang so, sogo-sogo kua pluok-srenawon.
6
Ngga ey, Sikhem go nglangin Hemor, Yakob sono kunuon go, nebut gemang pu-klenawon.
7
No, ku nggganemot dali no, duen sik sogo Yakob go danannang gemang pluep. Nebut ngga tup-nenawon go, saduibong ey gemang pling. Ngga ey, dabuipiam kangok dega so gemang tra-nenawon. Yakob go denun ngga kamea-kamea so pluok go. Ngga seduekabung Israel so wayang go tasam Shikem lo mo taling.
8
Hemor lo pu go: “Genam go duo Shikem mot go duo Dina so duing go se! Nemot-a, genam go duo no ya dok?
9
Ngganang sogo, imot tegadi ya dok-eyon. Mot saula ey, atnang saula ey kabung way-way so iti genang.
10
Nggano, nan ngge no kerlam so imot ey mea suisuing. Ngge nogo, motnang nay mea nenay. Nggano, miam dega so taut se yaluim dali.”
11
Nggano, nglangin sono Shikem lo pu dali go: “Dina ey betedonnang eygo, genam go duiduing ngge-a se lemoy. Nemotnang lo sogo-sogo so duiduing go, nemotnang nogo genam lo mea lemoy.
12
No, motnang go duiduing-a se pen-kesando. Nggano, nemot go drang yam se pu kesando dali. Motnang lo sogo so pu go, mea iti-salu. Nemot-a se pen-kesando! No, Dina-a genam lo iti genang so se iwat.”
13
Nemotnang go kabuisuo go blong, Shikem lo kenip go tang sogo so, wamoy so ngglangin ey Sikhem eygo no gemang pu-nenawon
14
Nemotnamon no nemotnang lo pu go: “Atnang suongsut ey, saduisuk kua tong go sedue no, atnang go kabuisruo itak genang.
15
Mot go nebut ngga atnang yang genang, tap klaya seguong gabe. Atnang kalik motnang-a se lemoy. Motnang sik sogo sedue naklay-naklay saduisuk se ibut-sing!
16
Ngga sogo so, motnang lo usi go, imot wayway so kabung bluot-bluot so mea iti. Nggano motnang ey klay gono, tang klaya go sogo mea lemoy.
17
No, genam lo pu go ngge motnang moy sogo, genamnang go kabuisruo-a tandali wawi.”
18
Hemor ey Sikhem eygo lo duing go, ngga kalik go ngga suey wa.
19
Dina no dabui mo iti go nogo. Shikem lo duing go, ngga keda so mea keng. Yang! Nemot go yakena ngga nogo Shikem go nebut don kangok dega.
20
Nggano, Hemor ey Sikhem ey klong go, seboy dia nebut so pupu go sip yakena yataput no, yakena sedue kabung no ngge kalik gemang pen:
21
“Seduekabung Israel ngga imot go andua gemang. Nemotnang ngga itak go imot ey yakena ngge so mea suisuing. Nago-nago no koklong sogo sak imot logo kua kok. Ngge no imot ey nemotnang suing genang sogo, sip maning bata dega gabe. Imot logo nemotnang sik sogo kaguit mea iti, nemotnang logo imot sik sogo kabung mea iti dali.
22
No, seduekabung ngga klay gono, imot ey nemot ey suing genang, nemot go demu klaya gabe. Yangga, imot sik sogo sedue naklay saduisuk nemotnang kalik dali so se ibot-sing.
23
Nemotnang logo menay daley ey, taut ey naklay imot go so mea lemoy dali. Nggeasui go, imot-a, nemotnang lo pu go nebut-a ya keng go pluok-eyon. Nemotnang imot ey suisuing sogo be.”
24
Yakena sedue kabung pluep-lak go ngga naklay, Hemor ey Shikem eygo lo pu go nebut yang go gemang keng-nenawon. Sedue seguong-a naklay saduisuk genang ibot-sing.
25
Saduisuk tong go iseng so sedue naklay, maning sesrek gono, ku nangglik tete no, Yakob go danonnamon, Dina go betedonnamon, Simeon ey Lewi eygo lo tengang iti go, yakena sono kekayso degut go, yakena ngga sogo sedue seguong-a gemang tuk-sing.
26
Hemor ey Sikhem eygo but go gemang kebong dali. Nggano, Shikem go yap ba sik so, Dina wawi go gemang klong.
27
Ngga kalik so yam so tuk-sing gono, Yakob go danonnang temu lo yakena ngga sogo taut naklay gemang king. Demanon go blong Shikem lo mo kenip go tang sogo so.
28
Nemotnang go kambing domba, sapi, keledai nggano, yakena ngga ba sogo ey, usu sogo ey naklay yam so gemang king.
29
Taut teguop-teguop blong eygo naklay, nemotnang lo gemang ikak. Kabung-kabung ey, denok ey yam so mlak-sing go ta tegan dok go. Yap ba sogo sogo-sogo naklay nemotnang lo gemang king.
30
Nggano, Simeon ey Lewi eygo so, Yakob lo pu go: “Genam nogo ide-a, motnamon lo be taling-kleto! Nggeasui go, seduekabung Kanaan, seduekabung Feris, nggano, nan ngge sogo seduekabung naklay, genam nogo dabuipiam so mea. Imot ngge miam kua go. Klaya so seduekabung ngge naklay lemoy go, genam sono plepung go, imotnang tang ey naklay mea buin seni,”
31
No, way so nemotnang lo tenguo go: “Genamnang go kabuisruo sikamea kabung kalik pluok go ngga, yakua itak.”