¹ Ngga ey, Yakub nemu iti go gemang ikum-siwon: 'Sedue 400 ey, aka Esau gemang uweng! Ngga tang sogo so, danonnang, senun namon ey, senun koybutasemu eygo sono, gemang wasey. ² Senun koybutasemu namon-a danonnang ey pu go, banim temu no gemang bisi. Nemotno, senun Lea danonnang ey keng. Nggano, senun Rahel ey danon Yusuf eygo-a mesip so gemang keng. ³ Ngga ey, Yakob tang go, banim gemang bisi. Yang! Ntaton trang, Esau mit sono klong sogo nogo, Yakob lo da taidisonamon yam so, isegabuem gemang unuik-siton. ⁴ No, Esau kap-siton go, Yakob tegu go, tateguot go nebuemkuong tebok-nawon go, u so, wayso iwot-klenawon. ⁵ No, Yakob go duokabung ikum go, Esau lo gemang usi: “Mot eygo nggenemot nandonang?” Nggano, Yakob lo pu go: “Nemotnang ngge, Ki Wali Iram go taitigualaklum genam no iti go, yangga, genam go duo-yap.” ⁶ Nggano, senun koybutasemu namon, danonang ey klong go Esau go suongku no, isegabuem unuik. ⁷ Ngga ey, senun Lea danonnang ey weng go, isegabuem gemang unuik dali. I go sogo, senun Rahel danon Yusuf ey, nemotnang mit sono weng go, isegabuem gemang unuik dali. ⁸ Ngga ikum go, Esau lo usi go: “Nemotgo da-nemotgo da so genam ey ngge kalik so tegu go, ngge nemot go seni sogo kalik?” Yakob lo pu go: “Aka dabui, yakay genang sogo so pluok go.” ⁹ No, Esau lo pu go: “Genam go taut mo miam! Teguop ey, genam nogo taiti mot logo yakua ikak!” ¹⁰ No, way so Yakob lo tenguo go: “Ngga kalik kua! Aka go dabui genam lo mo yakay go, genam logo taiti aka nogo so dali ta go ngge, kua tenguo! Yang! Aka ey tegu go ngge, genam lo tra go, Ki Wali Iram ey genam tegu go kalik gabe. Seni so, genam nogo aka lo teguop so yakay ey mo taling. ¹¹ Aka nogo so taiti dali genam lo ta go ngge se iti. Ngge naklay Ki Wali Iram go dabui, genam nogo suey go tang sogo so, kangok so taitigualaklum genam no, Nemot lo mo taling. Yang, sogo so genam lo duing go, genam nogo Nemot lo naklay mo tebok.” Yakob lo poplong, nemot logo taiti ngga Esau lo gemang iti-nawon. ¹² Nggano, Esau lo pu-tenawon: “Weng-a imot taut go ya klong-lak. Genam-a banim temu no mea bisi go koklong.” ¹³ No, way so Yakob lo pu go: “Yang! Aka mo senong, denok ngge don kua. Nggano, menay mata so nok min sogo gemang dali. Nemotnang ey yakot so kunala temoy no, genam mea koklong. Ku klaya go ba no keda so kuek go, menay mea leguot-sing? ¹⁴ Aka-a banim se yu! Genam mesip so mea keng. Atnang mea koklong, e… aka go yakena Edom no mea pung.” ¹⁵ Ngano, Esau lo pu go: “Ngga kalik go suey lo! Genam go kebali sedue temu-a mea itak, mesip so motnang ey se klong.” No, Yakob lo way so pu go: “Nuey-a! Aka kunala kua duing. Genam lo duing go, aka go dabui yakay genang-a be.” ¹⁶ Ngga kalik so, ku ngganemot no, Esau tandali yakena Edom sono gemang ip go klong.” ¹⁷ No, Sukot sono Yakob gemang-nawon. Nggano, nemot go yap ey, menay suing genang yap ey, ngga no gemang klik-nawon. Ngga tang sogo so, sip ngga go sui, Sukot so gemang pu. ¹⁸ Mesopotamia sik sogo, tapmasi ngganemot susuoy so, yakena Sikhem nan Kanaan sogo no, gemang pung. Nggano, Yakena dagu no, duen ba no bala gemang klik-nawon. ¹⁹ Bala so klik go sip ngganemot, tang Hemor, Sikhem go nglangin sik so, 100 perak lo nay go iti-nawon go.* ²⁰ Ngga ey, ngga nogo demusung gemang kong-nawon, nemot go sui: “El, sedue Israel go Ki Wali Iram.” gemang temuit-nawon.