Pasal 32
Esau ey tegu genang so Yakob dali-dali ta-sing go
1
Sip ngga sik sogo, Yakobnang gemang ip. Koklong gono, Ki Wali tamot kata yam so, Yakob ey tegu so gemang pluep.
2
Ngga kalik ikum gono, Yakob lo pu go: “ngge, Ki Wali plesedue daley go bala.” Ngga tang sogo so, sip ngga Mahanaimz so gemang temuit.
3
Ngga sik so, banim ntatontrang Esau ey tegu genang so, tamot-tamot-a Yakop lo mot-dak go, yakena Edom sono gemang klong.
4
Nemotnang sono, Yakub lo pu: “At go aka Esau nogo, ngge kalik se pu-kenalo; “Yagui-yagui nayum go, mot go koybutasemu Yakob, wate Laban mit so suisuing. Atnang ngge, nemot lo mot-dak go sedue-sedue gabe.”
5
Nggeasui go, genam go sapi, keledai, domba, kambing nggano, koybutasemu. Aka tuiam nogo so deguo ngge weng go gabe pepen. Aka tuiam Yakob yakay ey wawi genang.
6
Tandali Yakob sono tamot-tamot weng-lak golo pu go: “Tuiam go aka Esau mit no genamnang mo pung. Nggeasui go, aya ey tegu genang so, aka Esau ngge sono tap no, sedue 400 yam ey gemang uweng.”
7
Ngga kalik tup-nawon gono, kangok dega so Yakob suali tra go, nemot ey kuikui-dapnawon. Nggano, nemot eygo sedue kabung, namon da so gemang wasey. Ngga kalik dali, domba, sapi, kambing, unta gemang wasey dali.
8
Ngge kalik duing go: “Nagono, Esau weng go, banim go da no ta betep go, da namon tete sogo-a, susuoy so pung genang.”
9
Ngga ey, ngge kalik Yakob lo dewi gemang pu: “Ya! Babu Ablaham lo, aya Ishak lo takokong go Ki Wali Iram. Genam lo wadong go se tup-kundo! Woy Wali Iram lo mo pu: “Genam go nan no, duo kabuisruo nesip sono, genam tandali weng genang so, tegadi Woy Wali Iram lo dok go; ‘genam nogo yay naklay-naklay suey so, Mot lo mea suisuing.’
10
Genam nogo, Woy Wali Iram go klum katu eygo, Nemot lo taling go ngga iti genang sogo genam don kua sang. Seni so, bu Yordan sik so genam ip go ku nogo, sogo-sogo genam logo kua iti go klong. No, teguoli-a klaya mlak go mo klong. Nggeasui go, daley namon ey tandali mo uweng.
11
Genam lo wadong go: ‘genam go aka go ta sik sogo, Mot lo se susuoy. Nemot lo weng go genam ey ple pung sogo, duo ey kabung eygo, Mot lo se susuoy sang.
12
Yang! Teguop go-a, Woy Wali Iram logo mea lemoy. Genam nogo nggano, genam go sinok miam dega ey mea ke. Sedue kabung lo i genang yakua, beap kaseglok kalik go nogo.”
13
Ngga lo srek gono, ntaton Esau no taiti so iti genang menay, Yakob lo gemang kuoy.
14
Taiti ngganemot, kambing unen 200 yam so, kambing kemsi 20 yam so. Domba unen 200 yam so, domba kemsi 20 yam so.
15
Unta unen nok min so leleguit go 30 yam so. Nggano, sapi unen 40 yam so, sapi kemsi 10 yam so. Keleday unen 20 yam so, keleday kemsi 10 yam so.
16
Menay ngga yam so wasey gono, nemot go tamot no itak go, Yakob lo gemang pu: “Motnang-a banim se koklong! Koklong go, klay gono naklay kua tebokket-ket dato lo se, nemu luiluik sogo be.”
17
Banim bisi go tamot klaya tete sogo no, Yakob lo gemang pu: “Aka Esau mot ey tegu gono mo usi go; 'motnang nago no? Mot go tuiam nando? Ngge nando go menay wawi-ketogoy?'”
18
Mot lo se pu: “Ngge naklay, mot go koybutasemu Yakob go. Naklay ngge aka Esau nogo so, nemot lo pu go, iti go weng go gabe. Mot go koybutasemu Yakob, mesip so gemang uweng.”
19
Nemot go tamot namon tete sogo ey, nangglik eygo tete sogo ey, nggano menay yay sogo eygo nogo, nebut kerlam dali go-a Yakob lo gemang pen. Yang! Yakob lo duing go: ‘Esau, nemot logo mea mlue.
20
Taiti ngga iti go logo, Esau go kunala piam go mea pay-sing. Nago no nemot ey tegu go, Esau nemot eygo ta mea luik.’
21
Nemot go taiti ngganemot-a, iti go banim gemang klong-lak. Nemot tang go-a namboy bala lo gemang srek-nawon
Pniel no Ki Wali Iram ey Yakob sok go
22
Ngganomot wadi go, Yakob ip go, senun namon ey, koybutasemu namon ey denok naklay wawi go, Yabok butuo li go gemang klak-nesawon.
23
Bu li-nesawon go, nemot go seduekabung naklay yam so, ngga sono klong gono, nemot-a tandali li go gemang sanuon
24
Nemot-a bu nggeidi lo banom gemang srek. Wadi go, Sedue Klay-duo weng go, nemot-ey gemang klasok. Wadikua sono se pupung,
25
Sedue Klayduo ngganemot lo duing go: “Yakob logo, Genam yakua itak lo! Nggatang sogo so, Yakob go wawoy but-nawon go, wawoy ey gemang kandong.
26
Nggano, sedue ngga lo pu go: “Woy keklak go se, genam ta itak-a!” Nggano, Yakob lo pu go: “Genam logo aya yakua itak. Genam blo nogo taitigualaklum-tui logo so, mea itak.”*
27
Nggano, Sedue Klayduo lo usi go: “Mot go sui nando?” Yakob lo wa go, “Genam Yakob!”
28
Sedue ngga lo pu go: “Mot go sui, Yakob so kua usi, no, Israel so gabe pu. Seni so, Ki Wali Iram ey Seduekabung ey, way-way so mot ey mo klasok. Nggatang so, Israel so gabe tetemuit.”
29
Nggano, Yakob lo usi go, Aya go sui pu-lo ya! No, Sedue Klayduo lo way so pu go: “Teguop ey mot lo Genam go sui yakua usi.” Nggano, Yakob blo nogo taitigualaklum gemang tui-nawon.
30
Nggano, Yakob lo pu go: “Suong namon so Ki Wali Iram ey genam mo tegu-tu. No, genam maning wali so gabe.” Ngga tang sogo so, sip ngganemot Pnielb so gemang temuit.
31
Woy keklak gono, Pniel itak go Yakob gemang klong. No, Yakob go wawoy mo kandong. Nemot go wawoy kedong no but go nogo.
32
Ngga tang sogo so, seduekabung Israel menay go wawoy kedon kagot so. Yakob nogo tademum wawoy no but go tang sogo so.