Pasal 31
Laban sik so Yakob kap genang atuia
1
Ngge kalik Laban go danonnang lo gemang pu: “Yakob go taut naklay ngga, imot go aya go taut nemot lo mo nagluim-sing go taut.” Nemotnang lo ngga kalik pu go ngga, Yakob mo tup.
2
Nggano, banim go kalik nemot yakay kua. Nggano, Laban lo naglong go, ngga, Yakob mo ikum dali.
3
Ngga ey, Yakob sono Woy Wali Iram lo pu go: “Mot yay, Genam lo mea suing. Mot go aya go nan sono, kukunu-yap ba sono, tandali ip go nase klong!”
4
Ngganemot no, nemot go sedue kabung ey Rehel ey Lea eygo so, Yakob lo pu go: “Genam ey tugu sogo usu sono, menay so pong go sip no se weng-lak!”
5
Rahel ey Lea ey weng gono, nemotnamon no Yakob lo gemang pu-tenawon: “Genam ikum go, genam nogo mot go aya mo naglong. Banim go kalik yakay ey kua. No, genam go aya go Ki Wali Iram lo imot yay gabe suisuing.”
6
Yang, motnamon tang so mo senong. Mot go aya nogo so kebali seguot, kangok so genam lo mo pung-sanyu.
7
Nemot-a ngga kalik go. No, da tanamon yam so, genam nogo seguot iti genang, motnamon go aya lo genam mo mlue. No, genam nogo yay Ki Wali Iram lo suisuing go tang so, taybat kua semu.
8
Motnamon go aya lo genam no pu go: “Mot go seguot nang sogo drang ngga, kambing kuon-kuon sogo gemang. Ngga tang sogo so, menay naklay go nok kuon-kuon sogo-a gemang tui-sing.
9
Genam nogo, Ki Wali Iram lo ngga kalik mo tebok. Ngga tang so, mot go aya go menay genam no mo itak
10
Nggano, segue so kuadok go menay, sedi genam mo srek: ‘Segue so kuadok go kambing kemsi naklay sam-sam sogo ey kuon-kuon sogo eygo lo’.
11
Nggano, Ki Wali Iram tang go, Ki Wali tamot sukso pung gono, sedi ba no genam no gemang usi: “Yakob!” Nggano, genam lo pu go: “Wa!”
12
Ki Wali tamot lo pu go: “Seguesokuadok go kambing kemsi ikum-a, naklay samsam so, kuonkuon so, seguo ey tuk go. Ngga, mot nogo so Genam lo taling go gemang. Mot nogo so, Laban lo pluok go naklay, Genam mo ikum go tang so. Mot nogo so Genam lo ngga kalik pluok go.
13
Betel no suong mot no taling go ngga, Genam ngge Ki Wali Iram. Nggano, tataling genang sogo so, kong-nayo go demu meno, mlay lo mo pi gono, tanat ey Genam nogo so mot lo mo kong dali. Nggeasui go, tandali mot go nan no klong genang, dali-dali nase taut.”
14
Nggano, Lea ey Rahel eygo lo wa go: “Atnang tete sogo, sogo-sogo taut aya logo, yam so mo kua.
15
Atnamon ngge, saula meno kabung kalik mo lemoy dali. Atnamon ngge, nemot lo drang so mo nay go. Nggano, atnang sogo drang nemot lo ikak go ngga, yam so mo tega dali.
16
Aya go ta sik so, Ki Wali Iram lo ikak go taut naklay, atnamon ey, atnamon go duo eygo nogo sogo, aya nemot nogo so mo itak dali.”
Nan Kanaan no nglagin mit no klong genang so Yakob taut go
17
Nggano, nan Kanaan no nglagin mit no klong genang so, dali-dali Yakob gemang taut. Senun ey danonnang eygo unta blo no gemang ta.
18
Nggano, nemot go menay, kambing domba daley-a, masi lo gemang wawi klong. Kambing domba eygo daley ngga naklay, nan Mesopotamia sik so nemot lo ikak go
19
Ku ngganemot nogo, usu so domba miam eygo dit so Laban ndok gono. Ku nganemot no, nglangin go yaptenglam yay so suing go duosanasana-au, kekaytap so Rahel lo gemang tebok-natun.
20
Yakob klong genang sogo atuia ngga kekaytap so semu go, Laban nogo kua pen.
21
Nemot go taut naklay ikak go, bu Efrat keda-keda so li go meduing Gileat sono gemang koklong-lak.
Yakob Laban lo truik go
22
Nemotnang koklong go, ku nangglik tete no, Laban nogo, deguo ngga gemang pen: “Ye, maning! Yakob mo kap.”
23
Ngggano, nemot go seduekabung Laban lo yaluim go, Yakob gemang truik. Kumeduim Gileat sogo no, ku taitisonamon tete no, nemotnang no gemang keng.
24
No, wadi go sedi ba no, Laban sono Ki Wali Iram pung go gemang pu: “Nebut piam so saguinang sogo klayanang go Yakob nogo kua pu-srebalo! Mot go ba so gemang.”
25
Ku ngganemot nogo, medium meno blo no Yakob lo bala klik go. Ngga ey, meduim idi sogo meno blo no Laban go seduekabung nogo bala gemang klik-nawon dali.
26
Nggano, Yakob so Laban lo pu go: “Sogo temoy no, ple sogo no wawi go seduekabung kalik, genam mlue go, genam go duo wawi go, kekeytap so kekap?
27
Nebut kua pu goso yakot so ne kekap? Suey so tap lo mot lo pu go, tap lo yakay ey sek ey usam ey wawi go mot klong go gemang mo itak.
28
Genam go duo ey mamdat-yap eygo, mla kua semu gono, mot lo wawi go ne kekap? Puplu seni so, pluok-to go be!
29
Mot no piam taling genang sogo, genam go don kua? No, mot go aya lo kekeng go Ki Wali Iram lo wadi pung go, mot nogo sagui ya kua semu genang so mo pu be.
30
Mot ip go ngga, yakena no klong genang so mot naklay duing go tang so. No, genam go yaptenglam yay so suisuing go, duosanasana sogo so wom so ne iti?”
31
Nggano, Yakob lo pu go: “Wate go duonang gluik eygo sogo so, genam yakot so kap go.
32
Nando go keba ba so, mot go duosanasana ngga iti go, kebong genang sogo idekeba-a, genam lo mea iti. Wet go ikum-a! Ngge sogo, wate go taut ngga gabe? Gemang go se iti, imot go seduekabung lo ibe no ikum sogo be: “Duosanasana Rahel lo iti go. No, Yakob kua senong.”
33
Yakob go bala sono klong go, nemot go bala ba naklay Laban lo gemang wet-nawon. Nggano, Lea go bala ey nemot go koybutasemu go bala nogo klong go gemang wet dali. No, kua ikum-srenawon.
34
No, duosanasana ngga Rahel lo iti go, Unta go dabuikaba ba sono gemang king. Ngggano, keba ngganemot blo no nemot tang go-a, gemang got-natun. Rahel go bala ba naklay yam so Laban lo wet go. No, duosanasana ngga kua ikum.
35
Nggano, nglangin no Rahel lo gemang we-natun: “Aya sagui kua! Aya wawi sogo genam ip go kua senatu go, genam mluew ba so be.” Nggano, suey so Laban lo wet go, no, duosanasana ngganemot kua ikum-nawon.
36
Nggano, Yakob dabui piam go sagui gemang kong go, gemang usi: “Sogo piam kuklue-a genam lo pluok goso, genam wate logo ne truik?
37
Bala ba naklay yam so mo wet-to go, mot go yap ba sogo, sogo taut-a mo tegu-to? Taut ngganemot-a iti go keda so nase tui! Ibe ikum sogo, nemotnang lo pu genang, nando-a seniso?
38
Wate go yap so yagui seduesiklaya yam so genam suing go. Ngga tang sogo so, wate go menay, kambing domba naklay suey so mo miam. Wate go kambing kemsi sik sogo klayanang go genam logo kua dam gabe.
39
Iseng eygo duen menay lo uluk go, wate nogo genam logo kua iti go weng. No, genam lo way dali sogo-a gemang iti. Kuklik gono, kublong sogo no wom so iti go, wate lo usi go nogo, way dali-a genam lo gabe iti.
40
Yang! Wabedong go genam go saysuk nengkoy ey, wadi go genam kudalip lo mo piam. Nggano, suey sogo usene kua srek dali.
41
Wate nogo kebali ngga kalik genam lo mo semu. Yagui seduesinamon yam so naklay. Yagui 14 yam so, mot sogo baynang so genam lo kebali iguok go. Nggano, yagui taidisoklaya yam so, menay kambing domba yaluim genang so pluok-yu go. No, da tanamon yam so genam go seguot tete sogo wate lo mo paysing.
42
Genam go babu lo keng go Ki Wali Iram logo genam yay kua suing go, taulue so genam wate lo yat go gabe mo koklong? Babu Ablaham ey aya Ishak eygo lo keng go Ki Wali Iram lo yay mo suing. No, genam go ide Ki Wali Iram lo mo tebok. Nggano, genam lo kebali pluok go. Nggano, wadi go, Nemot lo mo pu-won.”
Laban ey Yakob ey tegadi dok go
43
Nggano, Yakob sono Laban lo pu go: “Mot go kabung namon ngga, genam go duo. Nggano, nemotnamon go danonnang ngga genam go dali. Nggano, kambing domba daley ngga, genam go dali. Ngge naklay ikum togoy go ngge genam go seguong. No, genam logo genam go duo ey mamdat eygo gluik genang, genam don kua.
44
Nggatang sogo so, nggesui go, tegadi-a ya dok-kleyon go. Nggano, tegadi dok go tataling genang so, sip ngge no demu-a mea kong.”
45
Nggano, tataling genang so damu meno Yakob lo iti go gemang kong.
46
Ngga ey, nemot go seduekabung usi go demu ta go, sip ngganemot no ten semu go ta go gemang dam.
47
Demu yaluim go sip ngganemot Yegar-Sahadutav so Laban lo gemang pu-nawon. No, Galedw so Yakob logo gemang pu-nawon
48
Yakob sono Laban lo gemang pu-tenawon: “Imotnamon nogo ta, demu ta go ngge lo mea teteling. Ngga tang sogo so, sip ngge Galed so gabe tetemuit.”
49
Laban lo pu dali go: “Imot ket sogo nogo yay Woy Wali Iram lo mea suisuing. Ngga tang sogo so sip ngge, Mizpax so gabe pupu dali.”
50
Nggano, Yakob sono Laban lo pu go: “Genam go duo no piam so mot lo semu go. Kabung meno-a mot lo iti go, nemot-a genam kua senong go. No, se duing! Ki Wali Iram lo imot yay gabe suisuing.
51
Ngge, genam lo yaluim go demu gabe. Demu ngge lo ta mea teteling.
52
Sangyam demu ngge lo gabe tutui. Mot ngge sono go ya kua degut. Genam ngga sono go yakua pung dali. Mot nogo ple pung genang sogo, genam ey ple way-way sogo yakua tui.
53
Imotnamon nesip nogo nemudi so, Ablaham ey, genam go aya Nahory eygo lo keng go Ki Wali Iram lo mea tetaling. Nggano, Ishak lo keng Ki Wali Iram go sui no Yakob lo tanat go gemang pu: “Nemot go don no, tegadi ngge mea lemoy.”
54
Nggano, menay klaya tong go, taiti so demu ngga blo no gemang puit. Ngga ey, nemot go seduekabung usi go, gemang dam-nenawon. Yam so ten dam gono, meduim ngga blo lo nemotnang gemang to-nenawon.
55
Nggautep wadikua go, suep-lak go klong genang sogo so, nemot go duo ey mamdat-yap eygo Laban lo nebuemkuong gemang tebok-sing.