¹ No, Rahel duo maning kua iti. Ngga tang so, ndengon trang Lea nogo nemot nelenele so. Yakob so Lea lo gemang pu: “Genam nogo duo iti lo ya! Kua go, genam-a ngga sono mea kebong.” ² Ngga kalik tup gono, sagui nebut so Rahel sono, Yakub lo gemang we-nawon: “Genam ngge, Ki Wali Iram got-tegu? Mot nogo, duo, Nemot lo kua iti goso got-togoy?” ³ Nggano, Rahel lo pu go: “Ngge genam go koybutasemu, Bilha ey mot srek-a! Genam tete sogo duo, nemot lo tui genang. Ngga tang sogo so, genam mia so usi genang.” ⁴ Nggano, kenin sono Bilha-a, gemang itak. Rahel go koybutasemu ngganemot ey Yakob saduikenok go, ⁵ Bilha duo iti go, sedue denok genang tui. ⁶ Nggano, Rahel lo pu go: “Nemudi so genam nogo, Ki Wali Iram lo mo taling. Genam lo pupu go dewi, Nemot lo mo tup. Genam nogo so, sedue denok-a Nemot lo mo iti.” Ngga tang so, duo ngga go sui Dan so gemang temuit. ⁷ Nggabu nogo, Bilha duo iti go, sedue denok dali gemang tui. ⁸ Nggano, Rahel lo pu go: “Aka kenok genang sogo so kebali, kangok so genam lo mo usey. Nggeasui go, genam don ey mo suing.” Ngga tang so, duo ngga Naftali l so gemang temuit. ⁹ Lea senong tun go, genam tandali go duo yakua tui ba? Nggano, nemot go koybutasemu, Zilpa Yakob sono gemang itak-natun go, kabung so Yakob lo gemang iti dali. ¹⁰ Nggano, sedue denok-a Zilpa lo gemang tui. ¹¹ Ngga ey, Lea lo pu go: “Genam nogo seni gabe!” Ngga tang sogo so, Gadm so gemang temuit. ¹² Nggabu nogo, sedue denok meno Zilpa lo gemang tui dali. ¹³ Nggano, Lea lo pu go: “Genam go yakay kangok dega! Genam sogo kabung-kabung naklay lo, Yakay eygo so mea we-netogon.” Ngga tang so, duo ngga Asyern so gemang temuit. ¹⁴ Usu wasma seni go ku no, Ruben usu sono gemang klong. Nggano, usu so didopo meno Ruben lo gemang ikum. Nggano, iti go weng go, unen Lea no gemang iti. Ngga ey, Lea sono Rahel lo didop ngga so gemang uwadong: “Mot go duo logo didop ngganemot ey seguay so at no iti-a!” ¹⁵ No, way so Lea lo tenguo go: “Genam go sedue mot lo guik go, ngga kua nemot? Nggeasui go, at go duo logo didop ey ne uwadong?” Nggano, Rahel lo pu go: “Mot go duo logo didop ngga, genam no iti goso, nggeasui wadi go mot ey Yakob mea srek.” ¹⁶ Use go, usu sik so Yakob uweng go, Lea lo tap no wawi go gemang pu: “Nggeasui wadi go genam ey ngge lo mea srek-mleyon. Genam go duo logo didop lo Rahel nogo genam mo iti.” Nggano, wadi go Yakob ey Lea ey saduikenok go. ¹⁷ Lea go dewi, Ki Wali Iram lo gemang tup. Duo iti-tun go, taidi tete sogo sedue denok gemang tui. ¹⁸ Lea lo pu go: “Yang! Genam go seguot Ki Wali Iram lo mo iti. At go sedue no Zilpa at lo iti go tang so.” Ngga tang so, Isaskarp so duo ngga gemang temuit. ¹⁹ Nggabu nogo, Lea duo iti-tun go, taidiklaya tete sogo sedue denok gemang tui. ²⁰ Nggano, Lea lo pu go: “At no teguop seni go taiti-a, Ki Wali Iram lo mo iti. Sedue denok taidiklaya yam so genam lo tui go tang so, teguop so genam nogo, genam go sedue logo mea taling.” Ngga tang so, duo ngga Zebulonq so gemang temuit. ²¹ Zebulon tui go bu nogo, kabung denok-a Lea lo gemang tui. Kabung denok go sui Dina so gemang temuit. ²² Ngga ey, Rahel go dewi tup go, Rahel duo tui genang sogo, Ki Wali Iram lo gemang iwat. ²³ Nggano, sedue denok-a Rahel lo gemang tui. Rahel lo pu go: “Genam so uwayang go naklay, Ki Wali Iram lo mo suep. ²⁴ Genam nogo sedue denok dali-a, Woy Wali Iram lo mo iti.” Ngga tang sogo so, Yusuf rso gemang temuit.

Yakob ey Laban way-way so rlek go

²⁵ Yusuf, Rahel lo tui gono, Laban no Yakob lo pu-ton: “Itak lo go, genam go yakena no genam ya klong go se? ²⁶ Genam go kabung namon ey denok ey ikak go, at go nan no ya klong. Wate no, kebali seguot kangok so genam lo mo pung. Ngga tang so, nemotnang ngge genam no mo itak, ngga wate mo senong.” ²⁷ Nggano, Laban lo pu go: “Ngge-a namboy se tup: Genam senong go, mot tang sogo so, Woy Wali Iram lo genam nogo taitigualaklum gabe uweng! ²⁸ Pu-a! Sogo-a, genam sik sogo mot ya pu lo?” ²⁹ Way so Yakob lo pu go: “Wate tang go mo senong, genam seguot kangok so mo pung. Nggano, genam lo yaysuing go tang so aya go menay mo miam dega.” ³⁰ Genam maning kua weng go nogo, wate go taut ngge kalik miam ey kua. No, nggeasui go, Woy Wali Iram lo taitigualaklum iti go, aya go taut genam eygo tang sos miam dega so mo lemoy. Nggeasui go, genam go yaptenglam nogo so kebali semu genang ku gabe mo pung-atun.” ³¹ Laban lo pu go: “Ngga kalik go, sogo-a mot nogo genam lo ya itak-lu?” Yakob lo wa go: “Nuey-a sogo sogo genam nogo aya logo yakua tenguo. No, genam lo pu go ngge-a, aya se yang. Genam lo aya go menay yay mea suisuing. ³² Nggeasui go sik so, wate go kambing domba genam lo yay suing go, dit seguo sogo-a at tete so mea kuoy-singt. Nggano, sam-sam sogo ey, kuon-kuon sogo ey, genam nogo sogo gemang. Genam go seguot nang sogo, ngga dato-a gabe wadong-tugu. Genam go duduing ngga kalik so. ³³ Nago no wate nemu luik go ikum genang, genam seni so, dabui lo nemudi so kebali mo sesemu? Wate weng go genam nogo sedue iti go ikum go nogo, mea ikum. Kaming kuon-kuon sogo ey, sam-sam sogo ey. Nggano, domba seguo sogo ey nenguon so mea ikum. Ngga sik so wate nenguon so senong genang. Nago-a wate go genam lo mo nagluim go be.” ³⁴ Laban lo wa go: “Yang! Mot lo pu go kalik so imot mea semu lo!” ³⁵ No, ku ngganemot no, Laban lo kambing kemsi samsam eygo, kambing unen samsam eygo, kuon-kuon ey tuk go, suk meno ey tuk-sing go. Nggano, domba seguo sogo banom dali so gemang kuoy-sing. Nggano, nemot go danonnang no pu go: “Menay ngga, banom so yay se suing!” ³⁶ Nggano, nemay ngga ey Yakob sik sogo, ket sono nemotnang gemang klong. Tapmasi walong, ku nanglik yam no. No, temu itak go-a itak go Yakob lo yay gemang suing. ³⁷ Ngga ey, di hawar, badam, berangan go kali kiki sogo, Yakob lo ibot go nemot go suk temu-a kluok go, sam-sam so gemang lemoy. ³⁸ Dikali ngganemot iti go, kambing domba daley go suongku no, bu so dedrop go sip ba no gemang king. ³⁹ Nago no, bu drop sogo no, dikali ngganemot go suongku no, kambing domba ngga segue kukuadok, nemot go nok, seguo so, samsam so, kuonkuon so mea tui-sing. ⁴⁰ Nggano, domba-domba, kambing-kambing samsam ey seguo sogo ey, Yakob lo wawi go di king go suong temu lo gemang pung dali. Ngga kalik go tang sogo so, nemot tete sogo kambing domba, banom so gemang pung-sing, Laban go ey bluot sogo yakua. ⁴¹ Nago no, menay don eygo, segue so kukuadok gono, Yakob lo kluok go dikali ngga, bu drop sip ba no nemotnang go suongku no tui go gemang. ⁴² No, suong ku nogo ngga, menay don kua go-a yakua tui. Ngganemot nogo, dit ibam suk sogo menay ngga don kua. Don kua go ngga, Laban tete sogo gemang. Menay seguo sogo, samsam sogo, kuonkuon sogo, ngga don eygo-a Yakob tete sogo. ⁴³ Ngga kalik go tap lo, Yakob taut mata sogo sedue so, gemang lemoy-dap nawon. Nemot go kambing domba daley ey, unta ey, keleday ey, nggano, koybutasemu mata dali so gemang.