Pasal 29
Laban go yap no Yakob pung go
1
Nggautep go, Kanaan woyklak idi sono Yakob go tapmasi, kekayso gemang klong.
2
Koklong go ngga, bumu meno duen so gemang ikum-nawon. Bumu ngganemot ketang sogo, kambing domba nangglik ey gemang. Bumu ngganemot no bu dedrop so, gemang sesrek-lak. gluik go Demu bata-dega golo bumu ngga, gemang kebet.
3
Kambing domba sip ngga no yam so pluep-lak gono, dombayay sogo sedue weng golo, demu ngga mea rlo. Nggano, kambing domba nogo, bu gluik go mea sre-sing. Bu yam so drop gono, demu ngga dombayay sogo sedue lo lek go tandali mea kebet.
4
Ngga ey, dombayay sogo sedue ngga sogo no, Yakob lo gemang usi: “Andua! Motnang go yakena nago?” way so nemotnang lo wa go: “Atnang ngge, yakena Haran sik sogo.”
5
Tandali Yakob lo usi go: “Nahor go danon Laban, motnang senong?” Nggano, nemotnang lo yang go: “Yang! Atnang mo senong lo!”
6
Nemot suey so susuing? Nemotnang lo yang go: “Suey seguong so wa!” Nemot go denun Rahel ngga bantugun go. Nglangin go kambing domba ey wawi go. Ngga pung-atugun go.”
7
Ngga ey, nemotnang sono Yakob lo gemang we-tenawon: “Woy maning go, menay betui ba no degut genang kumaning kua klik go. Sogo temoy no menay nogo bu kua iti? Nggano, namboy menay wawi go neguen temu dam sogo be!”
8
No, way so nemotnang lo tenguo go: “Ngge no menay naklay yam so pluep gono, bumu so kebet go demu ibe so rlo gono, menay nogo bu sre-sing go mea drop.”
9
Yakob nemotnang ey nebut so pepen gono, kambing domba ey Rahel gemang pung.
10
Nglangin go kambing domba daley ey Rahel uweng go ikum gono, bumu dagu sono Yakob klong go, bumu so kebet go demubata rlo gono, menay ngganemot nogo bu sre go, menay daley nogo bu gluik go gemang sre-nawon.
11
Ngga ey, Rahel kluguafr semu go, dabuiklum tra go sogo so u gemang kluo-nawon.
12
Nggano, Rahel sono Yakob lo gemang pen: “Genam ngge mot go aya go demanon Ribka lo tui go gabe.” Nggano, yap sono Rahel kap-bitun go, nglangin no naklay gemang pen.
13
Danon desui Yakob nebut tup gono, Laban kap-siton go Yakob ta lo teguot go, nebuemkuong tebok go, wawi go yap ba sono gemang degut. Nggano, naklay-naklay Laban no, Yakob lo gemang pen-nawon.
14
Nggano, Laban lo pu go: “Seni so lo! Mot ngge, genam go menggo lo tui go desui gabe” Banu klaya yam no, Laban go yap so Yakob got-won go.
Rahel ey Lea eygo baynag so Yakob lo pluok go
15
Ku meno no, Yakob sono Laban lo gemang pu-ton: “Kuaseni, genam go desui tang sogo so, genam no kebali mot lo tebadali sesemu go. Nggeasui go, mot tang so se pu-sando, mot go seguot duoy katayamsomot nogo at logo ya iti?”
16
Yang! Laban go duokaguit, namon ey gemang. Trang sogo Lea, sat sogo Rahel.
17
Lea nemu-a ‘teguop’f Rahel-a saysuk ey nebuemnemu eygo naklay teguop kabungnali seni.
18
Ngga ey, Yakob go dabui Rahel no mo iti. Ngga tang sogo so, Yakob lo Laban no pu go: “Nuey-a! Yagui taidisonamon yam so kebali semu-lu gono, wate lo iwat go, Rahel-a genam no ya itak!”
19
Nggano, nemot wate Laban lo pu-ton: “Ngga suey-wa! Sedue meno no itak go-a piam. No, mot-a ngge no se suing.”
20
Nggano, Rahel iti genang baynang so, yagui taidisonamon yam so kebali, Yakob lo gemang pluok. Yagui-yagui ngga, kedaso ku kalik sut-pung. Rahel so dabui naklay iti go nogo.
21
Ngga ey, Laban sono Yakob lo gemang pu: “Yagui taidisonamon yam so mo natun. Kaning so, genam nogo wate go duo wip ey ya dok?”
22
Nggano, wip ey kabung dok genang walop, Laban lo gemang iti-won. Yakena ngga sogo seduekabung naklay, glop so gemang usi-nawon.
23
No, ngganemot wadi go, Yakob sono go Rahel-a kua itak, Lea-a pay go Laban lo gemang itak-nawon. Nggano, Lea ey Yakob gemang srek-nawon.
24
Lea go koybutasemu nang so, Zilpa gemang itak dali.
25
Nggautep wadikua so, Yakob gemang senong-nawon, ‘No, Lea-a genam no wate lo ba itak-won? Ngga ey, Laban sono Yakob klong go gemang pu: “Sogo temoy no genam nogo ngga kalik wate lo semu ne? Genam baynang kebali semu go ngga, Rahel-a iti genang so seguot pung go. Sogo so genam wate lo mlue?”
26
Way so, Laban lo wa go: “Yakena ngge nogo demu, banim kabung sat-a sedue yakua iti. No, sedue nogo banim no kabung trang-a se dok.
27
Mot-a namboy se! Walop sik so i go, ku taidisonamon tete no, mot no Rahel mea itak dali. No, yagui taidisonamon yam dali so, genam nogo kebali se semu-lo!”
28
Nggano, Yakob gemang yang-nawon! Ku taidisonamon yam so suing gono, Yakob sono Rahel Laban lo gemang itak dali.
29
Rahel nogo koybutasemu so Bilha-a, Laban lo gemang itak.
30
Rahel ey Yakob srek go, Rahel nogo-a, Yakob go klum kangok dega. No, yagui taidisonamon yam dali so, Laban nogo kebali gemang semu dali.
Yakob lo tui go duo
31
Lea nogo Yakob go klum kangok kua. Ngga ikum go, Lea nogo-a Woy Wali Iram lo duo iti go gemang tui. No, Rahel-a duo kua goso got-tenatun.
32
Sedue denok-a, Lea lo gemang tui, nggano Lea lo pu go: “Genam go dabui sadui, Woy Wali Iram lo mo ikum.” Ngga tang so, Ruben so duo ngga gemang temuit.
33
Lea tandali go duo iti go, sedue denok dali-a gemang tui. Nggano, Lea lo pu-tenatun: “Yang! Genam nogo Yakob klum kua go, Woy Wali Iram mo ikum. Ngga tang so, duo ngge Nemot lo mo iti.” Ngga tang sogo so, duo ngga Simeon so gemang temuit.
34
Duo nangglik tete sogo iti-natun go sedue denok dali gemang tui. Nggano, Lea pu go: “Yang! Nangglik tete sogo duo ngge tui go tang so, genam nogo sedue mea tebok-yon.” Ngga tang sogo so, Lewi so gemang temuit.
35
Nggabu nogo, duo iti-natun go sedue dali Lea lo gemang tui. Nggano, Lea lo pu go: “Nggeasui go ngge, Woy Wali Iram go sui nogo iway mea i-iti!” Ngga tang sogo so, Yehuda so gemang temuit. Ngga sik sogo, Lea duo tandali go kua tui.