Pasal 28
Laban go yap sono Ishak lo mot-ak go Yakob klong go
1
Ngga ey, Ishak lo Yakob usi go. Yakob blo no tatui gono gemang we-tenawon: “Kabung sogo, Kanaan kabung-a kua iti-selo.
2
No, Mesopotamia sono, babu Batuel go yaptenglam sono mot se klong! Mot go wate Laban go denun meno-a, kabung sogo se iti-nalo
3
Taitigualaklum, Ki Wali Kumam go-a mot blo nogo senang so mea kiking. Mot go duo-yap miam dega ey mea lemoy. Ngga tang so, saula miam eygo ay-babu so mot mea lemoy.
4
Taitigualaklum Babu Ablaham no, Woy Wali Iram lo iti go kalik dali, mot blo nogo taitigualaklum mea uweng. Nggano, mot suisuing go nan ngge, babu Ablaham nogo so Ki Wali Iram lo iti go, mot go ta sono mea itak.”
5
Mesopotamia sono Yakob, ngga kalik Ishak lo itak go gemang klong. Sedue Aram Batuel go danon Ribka go betedon Laban, Esau ey Yakob eygo nemot wate mit sono, Yakob gemang klong.
Esau kabung meno iti go
6
Yakob blo no Ishak lo tatui go, Mesopotamia no kabung wet so pu go klong go, Esau gemang tup-nawon. Nggano, Kanaan kabung Yakob logo, yakua iti genang gemang tup dali.
7
Ngga ey, Esau gemang senong: ‘unen ey nglangin eygo nebut no keng go, nan Mesopotamia no Yakob mo ip go klong ba.’
8
Esau gemang senong-nawon: ‘Kanaan kabung nogo nglagin Ishak yakay kua ba.’
9
Ngga ey, Ablaham go danon Ismael mit sono Esau gemang nawong. Nawon gono, Ismael go denun Mahalat-a, gemang iti-nawon. Mahalat ngga, Nabayot go ndengon sat.
Betel no sidi so Yakub lo ikum go
10
Yakena Bersyeba itak go, yakena Haran sono Yakub naton go,
11
woy se susut, sip meno no gemang pung. Nggano, sip ngga lo gemang to-nawon. To-nawon go demu meno-a iti go, iwonnedi so gemang sey-nawon.
12
Sidi so gemang ikum-nawon; ‘nan sik so tenglam meno kong go ut seding no gemang kling. Ngga ey, Ki Wali tamot-a, tenglam ngga blo lo klak li-klak li-netenawon.
13
Ngga ey, Woy Wali Iram nemot mit no ip go gemang pu-tenawon: “Genam ngge, Woy Wali Iram, Ablaham ey Ishak eygo Ki Wali Iram. Mot lo to-tegoy go sip ngge, mot ey mot go duo eygo tete so Genam lo iti go gabe.
14
Mot go duo-yap, sungkuim kalik miam ey mea ke lo. Tagu i genang sogo yakua. Nemotnang nogo so nan woyklak son, woysut sono, sada sono biap sono mea bata. Mot ey, mot go duo eygo logo so, kukunan blo sogo saula-saula nogo taitigualaklum mea pung dali.*
15
Kuakay! Mot nogo Genam lo mea tebok. Nggano, mot yay Genam lo mea suisuing. Nago sono mot koklong go, Genam lo tandali wawi go, nan ngge sono mea weng. Tegadi so mot no Genam lo dok go naklay maning kua lemoy go nogo, mot Genam logo ya kua itak.”
16
Ngga ey, usene sik sogo Yakob buong go, gemang pu-tenawon: “Woy Wali Iram sip ngge so gabe. No, nggeasui go genam gabe senong-tu.”
17
Yakob suali tra go gemang pu: “ngge naklay seni go sip ba? Ngge, Ki Wali Iram go yap, Ki Wali yakena nogo yataput gabe.”
18
Nggautep wadikua go, Yakob ip go, iwonendi so tui go demu iti go, tataling genang so demu ngga gemang kong-nawon. Demu ngga blo no, saytun-mlay lo pi gono, Ki Wali Iram nogo tataling genang so gemang kong.
19
Sip ngga go sui, “Betel” so gemang pu. Sip ngga go sui banim go, Lus.
20
Ngga ey, tanat ey Yakob lo gemang pu: “Seni so genam tebok go yay suisuing go Woy Wali Iram lo. Tap masi ngge ba nogo, genam nogo ten so amka so iti go.
21
Genam go aya go yap no susuoy so tandali pung genang, ‘Woy Wali Iram-a genam go Ki Wali Iram so genam lo mea keng.’
22
Ngga ey gemang punawon: "Woy Wali Iram lo genam no iti go sik sogo, taitinang so Woy Wali Iram no genam lo iti genang, 'tanamon so wasey go meno-a' Woy Wali Iram sono tandali mea iti. Yang! Demu kong-tu go sip ngge, Woy Wali Iram sono takokong iway iti genang sip gabe.”