¹ Ishak yam so sedueseni so mo srawe. Nemu mo kli, ikum sogo yakua. Kumeno no, danon trang Esau gemang usi: “Demsop?” Ngga ey, Esau lo wa go: “Aya!” ² Nggano, Ishak lo pu go: “Mot mo senong? Aya yam so gabe, walong so meakua got-selu. ³ Nggeasui go, mot go pleunen, pleday ey ikak go, duen no nalo go menay klaya but go. ⁴ Menay ngga, genam lo dedam go kalik, tom ey suey so suik go, iti go genam sono se weng! Dam-lu gono genam maning gono, mot blo nogo taitigualaklum tatui-lu sogo be.” ⁵ Esau no nglangin Ishak lo pen go nebut, unen Ribka gemang tup dali. Duen sono menay blang so Esau nawon gono, ⁶ Yakob sono Ribka lo pu go: “Genam tup-tu go, Esau no aya lo ngge kalik pu go: ⁷ ‘Duen no menay klaya but-nalo go, genam lo dedam go kalik, suey so tom ey suik go, iti go se weng! Ngga dam-lu gono, genam maning gono, mot blo nogo taitigualaklum tatui-lu sogo be.’ “ ⁸ Dem-sop! Nggeasui go genam lo pu go-a mot keda so se pluok! ⁹ Imot go domba betui sono keda so nalo go, kambing nok demening go saysuk bu eygo-a, namon ey kuoy go, iti go se weng. Aya lo dedam go ten kalik tom ey genam lo mea suik. ¹⁰ Nggano, aya nogo mot lo iti go degut go dam genang. Ngga dam go maning aya kua ip gono, mot blo nogo taitigualaklum tatui genang.” ¹¹ No, unen sono Yakob lo pu go: “Mia! Esau go saysuk dit ey, genam dit kua. ¹² Aya tatra go, mea senong. No, aya so genam lo ba mumlue? Genam sono piam-a mangne ya pu.” ¹³ No, unen lo pu go: “Dabui-a klaya seiti! Piam-a pu go ngga, nuey-a, genam lo piam ngga mea lek. No, genam lo pu go-a mot lo keda so se semu. Kambing nok namon ngga keda so klong go iti go weng-a!” ¹⁴ Yakob keda so klong go, kambing nok namon mlak go, unen go ta sono gemang iti. Ngga ey, Ishak go ten dedam so, tom ey suey so Ribka lo gemang suik.” ¹⁵ Esau go amka yap ba sogo teguop go, unen lo iti go Yakob sono kok-natun. ¹⁶ Ngga ey, Yakob go blindon ey ta ey dit kua goso, kambing suk lo gemang pok-natun. ¹⁷ Nggano, butu tom eygo dali unen lo semu go ngganemot, loti ey iti go Ishak go degu sono Yakob gemang degut. ¹⁸ Degut gono, nglangin so Yakob lo gemang pu: “Aya?” Ishak lo wa go: “Wa, mot nando: Esau lo? Yakob lo?” ¹⁹ Way so Yakob lo pu go: “Aya! Genam mot go duo trang, Esau! Aya lo pu go ngga, genam lo mo pluok gabe. Duen sik so iti go weng go menay ba dam. Aya ip go suing-a! Nggano, taitigualaklum genam blo nogo tatui-sando genang!” ²⁰ Tandali Ishak lo pu go: “Dem-sop! Keda seni so menay mlak-nato go be!” Yakob lo yang go: “Woy Wali Iram, aya lo dabui iti go keng go Ki Wali Iram lo, tap no dali mo tui-wa!” ²¹ Yakub sono Ishak lo gemang pu: “Ngge sono dagu no got-sando. Mot ta ya tra-lu go, mot ngge seni so Esau?” ²² Dagu sono Yakob suing gono, Nglangin lo ta tra go gemang pu: “Nebut bluem-a Yakob goso, ta-a Esau so be tra-situ.” ²³ Ishak lo Yakob kua senong, Nemot go ta Esau go kalik dit ey go nogo. No, taitigualaklum tatui sogo no, ²⁴ tandali gemang usi: “Mot ngge, seni so Esau lo?” Yakob lo yang go: “Yang, seni so lo aya!” ²⁵ Nggano, Ishak lo pu go: “Menay ngga, genam sono iti-a, ya dam go. Dam gono mot blo nogo taitigualaklum tatui sogo be.” Nglangin sono Yakob lo Menay butu ngga gemang iti. Ngga ey, anggul bu seguay so iti go gemang drop dali.” ²⁶ Nggano, nglangin lo pu-ton: “Dem sop, dagu no ngge sono got-sando. Nebuemkuong tebok-sando ya!” ²⁷ Nglangin dagu sono Yakob suing go, klugua sogo no, Esau go amka namon Ishak gemang dop-nawon. Ngga ey, Ishak lo taitigualakum tatui so pu go: “Genam go duo go kinemon kalik, duen nogo tabuwitgo,* ²⁸ ut sik sogo kebupbu Ki Wali Iram lo mea sesay. Mot go usu nemot lo say go seni ey mea tagot. Mot nogo yan ey anggur eygo Nemot lo ususomani-yapsomani. ²⁹ Saula-saula tang naklay-a, mot go koybutasemu so mea lemoy. Mot go masi ba no, saula-saula, tang-tang temu-a mea suing. Mot go mia lo tui go duo, mot go kukunu-yap naklay mot lo ta mlak go, mot go masi ba no mea unuik-sing. Nando lo mot so piam pu go, piam-a nemotnang naklay blo no mea pung. Nando lo mot blo nogo tatui go, nemotnang naklay blo no taitigualaklum-a mea pung dali.”

Taitigualaklum so nglangin no Esau lo wadong go

³⁰ Taitigualaklum Yakob blo nogo Ishak lo tui gono, keda so Yakob gemang klong. Demening, duen sik so ntaton trang Esau pung go. ³¹ Teguop so menay suik go, iti go gemang degut. Ngga ey, gemang pu-tenawon: “Aya ip go suing-a! Genam lo iti go menay ba dam-a! Nggano, taitigualaklum genam blo nogo tatui sogo. ³² Ngga tup gono, Ishak lo usi go: “Mot nando?” Esau lo wa go: ‘Genam mot go duo trang Esau.’ ³³ Ishak go saysuk naklay bubueng ey se king. Nggano, pu-tenawon: “Ngga kalik go, mot maning kua pung gono, menay but go genam no iti go degut go ngga nando? Nemot blo no taitigualaklum ta mo tui-tu! Senang so nemot blo no gigit genang so, taitigualaklum ngga mo iti-tu.” ³⁴ Ngga kalik Esau tup gono, dabuisadui tra go kangok dega so u gemang kluo. Ngga ey, gemang pu-tenawon: “Aya! Taitigualakum genam nogo tatui dali-a!” ³⁵ Nggano, Ishak lo pu go: “Taiti seni teguop go mot no itak genang sogo, mot go sat weng go genam mlue gono, nemot lo iti go.” ³⁶ Nggano, Esau lo pu go: “Yakob sui so pu go nogo, ngge lo danamon tete sogo wamoy mlue genam nogo gabe mlue. Genam go sipsuing trang, wamoy mlue lo guik go. Nggesui go, taitigualaklum genam nogo so tatui genang, nemot lo mo gluik dali. Aya logo taiti menonang, genam no iti genang kua?” ³⁷ Way so Ishak lo pu go: “Nemot-a, mot blo nogo tuiam so genam lo mo bit-tu. Nggano, nemot go ntatonnang naklay, nemot nogo koybutasemu so mo temuit-tu. Gandum ey anggur ey naklay, nemot no genam lo mo iti. Sogo-sogo teguop go, mot no iti genang, nggeasui go kua go se, dem sop!” ³⁸ Senang so Ishak sono Esau lo gemang plong-ton: “Aya go taitiklum ngganemot seguong-a? Taitiklum genam blo nogo, iti-silo dali-a, aya!” Nggano, u tandali gemang kluo-tenawon.* ³⁹ Ngga no, Ishak lo we-tenawon: “Ut sik sogo kebupbu mot blo nogo meakua sang. Mot nogo nan seni eygo kua.* ⁴⁰ Ple ey-tengang eygo don sik so mot mea wali. No, mot go sat go koybutasemu so mea lemoy. No, nemot go ta don sik sogo, mot lo sagui pung go sik so mot ta mea itak.” ⁴¹ Ntaton Yakub nogo Esau dabui piam so. Nemot nogo taitigualaklum ntaton Yakob blo no nglangin lo iti go tang so. Nggano, dabui ba lo atuia gemang duing-won: “Yang! Ku walong kua gono aya mea ip-yon. Genuing sung-itak gono, Yakob kekayso mea but-lu!”

Laban mit sono Yakub kap go

⁴² Esau go kunala Yakob kekayso but genang ngga, Ribka gemang tup-tun. Nemot lo pu gono, Yakob usi gono gemang pu-tegun: “Mot go aka Esau, way dali so, mot but go kebong genang atuia mo semu gemang. ⁴³ Genam lo pu go ngge-a keng go mot se pluok. Nan Haran sono, genam go kemdet Laban mit no, Mot-a keda so se kap! ⁴⁴ Nemot ey, ngga no se suisuing! Mot go aka go dabuisadui kua gono, ⁴⁵ kunala ngga naklay kay gono, genam lo pu gono klong go mot wawi go mea weng. Ku klaya gono, genam go duo kekay so namon ey nega genang, genam moy so. ⁴⁶ Nggano, Ishak sono Ribka lo gemang pu-tenatun: “Saula meno kabung Esau go senunnang ikum sogo, genam mo ikle gabe! Saula Het sik sogo kabung dali-a Yakob lo iti go, genam-a ngga sono mea kebong.”