Pasal 26
Sedue Filistin go sip Gerar so Isak suing go
1
Nggatang sogo so, sedue Filistin go nan Gerar no suing genang so, Abimelek sono klong go, Ishak lo gemang pu.
Nan ngga nogo kluongku* banim no, Ablaham eygo no lemoy go kalik gemang pung. Ngga ey,
2
Woy Wali Iram ey Ishak tegu gono ngge kalik gemang pen: “Nan Mesir nogo kua klong.! Genam lo pu go kalik mot-a nan ngge so se suisuing, mot yay Genam lo mea suing!
3
Taitigualaklum-a kangok so, mot blo nogo mea uweng. Nan ngge naklay mot ey mot go duo eygo nogo so, Genam lo itak genang nan gabe. Mot go aya Ablaham no At lo tegadi dok go, mot blo sono, Genam lo mea lemoy!.
4
Mot go duo-yap, duomdat-yap, miam dega so uttop kalik, beap kaseglok kalik mea ke. Nggano, nemotnang go ta sono nan ngge naklay mea itak.
Ngga tang so, mot go duo no taling go taitigualaklum ngga sogo, Genam sono kukunan seduekabung logo mea wadong dali.
5
Aya Ablaham logo so, tupduk so Genam nogo mo keng. Genam logo demu ey, yay suey so dabui lo mo suing go tang so, mot nogo taitigualaklum Genam lo mea iti.”
6
Ngga ey Gerar no Ishak gemang susuing.
7
No, Ishak senun Ribka kabungnali teguop seni. Seduekabung lo Ishak but go, senun gluik eygo suali sogo so, Gerar seduekabung lo usi go sogo, Ribka so Isak lo pu go: “Ngge genam go kabuisruo wa!”
8
Ku kata yam so, Ishak ngga so suing gono, dualiput ba lo deguena Abimelek nemu iti-siwon go Ishak ey Ribka ey klugua* sogo gemang ikum.
9
Nggano, Ishak usi go gemang pu: “Ngganemot mot go kabung ba? Sogo temoy no, kabuisruo so ne pu-yo?” Wayso Ishak lo wa go: “Genam but go kebong eygo sogo so, kabuisruo so pu go!”
10
Ngga no, Abimelek lo pu go: “Sogo kalik goso atnang nogo, ngga kalik ne pu? Genam go blung sik sogo sedue meno lo mot go kabung gluik go, atnang go kuklue ngga go idekeba, mot tang golo ya lek?”
11
Nggano, nemot go blung naklay nogo Abimelek lo gemang pen: “Naklay se tup! Sedue ngge-a, nemot go senun-a, nando lo utuik go, sedue ngganemot but go mea kebong.”
12
Woy Wali Iram lo Ishak nogo taitigualaklum tetaling go nogo.Yagui ngga ba nogo, nan ngga no Ishak lo usu gemang klik. Usu klik go ngga, wasma iti go ususomani-yapsomani.
13
Nemot go taut, miam dega so se lelemoy. Nggano, taut miam eygo sedue so Ishak se lemoy dali.
14
Nemot go koybutasemu mata so, kambing domba sapi mata dega go nogo, sedue Filistin Ishak nogo dabui sadui ey.
15
Ngga tang so, Ablaham go koybutasemu lo tuet go bumu ngga sogo, nankanok lo seduekabung lo gemang puem-sing.
16
Nggano, Ishak sono Abimelekh lo gemang pu: “Mot genamnang blo sono naklay betogoy go, atnang go nan sik sogo mot nase ip go klong!”
17
Ngga tang so, Ishak klong go, Gerar no bala gemang klik. Kukata yam so, ngga sogo gemang suing.
18
Nglangin Ablaham lo tuet go bumu, sedue Filistin lo puem go ngga, tandali gemang tuet-sing. Ngga ey, nglangin lo pu go kalik sui gemang pu-sing.
19
Ishak go koybutasemu lo tuet go bumu ngga, yelung ey bu gemang pung-sing.
20
No, Gerar sogo menay yay sogo sedue lo Isak go menay yay sogo sedue ey sagui pung gono, gemang pu: “Bumu ngge atnang go.” Nggatang sogo so bumu ngga, “plesagui” so gemang temuit.
21
Ishak go koybutasemu lo bumu meno tuet goso nemotnang lo pu go: “Ngga gemamnang go bumu.” Ngga tang sogo so, bumu ngga Ishak lo “plesi” so gemang temuit.
22
Ngga ey, sip ngga sik sogo klong go nangglik tete sogo bumu gemang tuet. Ngge nogo plesagui kua teguot. Ngga tang sogo so, “taitak” so gemang pu. Nggano, gemang pu-tenawon: “Ngaeasui go, nan ngge no imot suing genang so, Woy Wali Iram lo imot ta mo itak. Sip ngge nogo, suey so ususomani-yapsomani so imot mea wali.”
23
Ngga ey, Ishak ip go e… Bersyeba no gemang pung.
24
Ngganemot wadi go, Woy Wali Iram, Ishak ey tegu gono gemang pu: “Mot go Aya Ablaham go Ki Wali Iram, Genam ngge gabe. Suali kua tra, mot yay Genam lo mea suing. Genam go tamot Ablaham no tegadi dok go tang so, mot blo nogo taitigualaklum Genam lo mea iti. Nggano, mot nogo duo-yap miam dega so mea iti.”
25
Nggano, Ishak lo demusung kong go, Woy Wali Iram nogo ta gemang kong. Ngga no, bala klik gono koybutasemu lo bumu meno gemang tuet dali.
Ishak ey Abimelekh tegadi dok go
26
Ku meno so, Gerar sik so Abimelekh, nemot no mang so kiking go Ahusa ey, plewengkabui Pikhol ey Ishak tegu so gemang weng.
27
Nggano, Ishak lo usi go: “Nggeasui go, sogo so genam ey tegu sogo motnang ne weng? Mot go sip sik sogo, plesagui lo motnang lo banim go genam mo yat.”
28
Nggano, nemotnang lo pu go: “Nggeasui go atnang mo senong, mot blo nogo taitigualaklum, Woy Wali Iram lo gabe uweng. Ngga tang sogo so, tanat ey tegadi ya dok-eyon.
29
Tanat go se pu: “Atnang mo senong, mot blo nogo taitigualaklum Woy Wali Iram lo gabe uweng! Genamnang lo yakay ey itak go klong go, mot nogo piam kua taling go kalik, genam logo motnang nogo piam meakua taling.”
30
Nggano, nemotnang nogo ten Ishak lo ta go gemang dam.
31
Ngga utep wadikua go, nemotgo-nemotgo tanat ey tegadi wa go gemang dok. Nggano, Ishak lo pu go: “Suey gemang, suey so se klong!” Andua kalik nemotnang eygo gemang suep-lak.
32
Ku ngganemot dali no, Ishak go koybutasemu lo weng go gemang pen: “Atnang lo bumu tuet go bu mo pung!”
33
Ngga ey, bumu ngga go sui Ishak lo: “tanat” so gemang pu. Yakena ngga Bersyeba so sui pu go nebutpen ngga kalik gemang.
Esau go senunnang saula meno kabung
34
Esau go yagui 40 no kabung gemang iti. Kaguit namon, tang Het sik sogo kabung gemang iti. Yangga, Beeri go denun Yudit ey, Basmat go denun Elon ey.
35
Kabung namon ngga, sesaglok eygo kabung. Nemot namon lo Ishak ey Ribka eygo wali ba nogo sesagluk dali.