Pasal 25
Abraham go senun meno lo tui go danonnang
1
Abraham lo iti go kabung meno gemang, nemot go sui Ketura.
2
Senun ngganemot lo tui go duo,Zimran,Yoksan,Dedan,Midian,Isybak,nggano Suah.
3
Yoksan lo tui go Syeba ey Dedan eygo. Dedan lo ke go ngga seduekabung Asyur, seduekabung Letus, nggano seduekabung Leum.
4
Midian go danonnang ngga,Efa,Efer,Henokh,Abida,nggano Eldaa.
Nemotnang ngga, Ketura lo tui go saula tang naklay gemang.
5
Yang! Abraham go sogo-sogo naklay danon Ishak sono gemang itak.
6
No, maning Ablaham eygo no, senunnang temu lo tui go danonnang nogo taiti, mata so nglangin lo mo wasey dali. Ngga ey, woyklak idi no suing genang so nemotnang pu go gemang klong-lak. Ishak ey klay gono suing genaning so.
Srong so Ablaham pedueng go mu no tui go
7
Abraham go yagui 175 no pung gono, srong so gemang pedueng.
8
Abraham nembem nimbit ugo minsik sniso gano mang kebung yagui,naklai blo sni so,nemugo yagui-yaguino,ga ei nemot klai go sno mang yaluim babu asi nang ei.
9
Demuput Makhpela Mamre go woyklak idi sogo usu, banim no sedue Het, Zohar go danon Efron go ta sik so,
10
Ablaham lo drang lo king go nan ngganemot no. Danonnang Ishak ey Ismael eygo lo nglangin Ablaham gemang tui. Senun Sara tui go mit no.
11
Abraham ip gono, Ablaham go danon Ishak nogo taitigualaklum mata so Ki Wali Iram lo gemang iti. Ku ngganemot nogo buput “Genam nogo Senang Wali lo gabe i-ikum”c so Ishak susuing.
Ismael lo ke go tang
12
Ismael ngga Abraham go duo. Nan Mesir sik sogo kabung, Sara go koybutasemu Hagar lo tui go.
13
Ismael go duo 12 yam so. Nemotnang tui go sik so i go: Nebayot,Kedar,Adbeel,Mibsam,
14
Misyma,Duma,Masa,
15
Hadad,Tema,Yetur,Nafis
nggano Kedma.
16
Danonnang ngganemot, saula tang 12 yam so. Nemotnang go yakena ey tang eygo sui, nemotnang go sui tang so gemang pu-sing.
17
Ismael go yagui 137 no Ismael gemang kebong.
18
Nemot go tang; Hawila ey Syur eygo,
Mesir go woyklak idi lo gemang suing-lak. Ablaham go danonnang temu ey klay go nogo, nemotnang kua suing.
Esau ey Yakob ey tui go
19
Ablaham go danon Ishak go nebutpen, ngge kalik gabe.
20
Sedue Aram Mesopotamia sogo, Betuel denun Ribka, Laban go demanon, Ishak no itak go nogo, Ishak go yagui 40 yam no.
21
Ribka duo ibui sogo so, senun sogo dewi Ishak lo gemang pu. Dewi pu gono, Woy Wali Iram lo nemot go dewi tup go, senun Ribka duo gemang iti.
22
Nemot go duo namon ey gemang. Maning kua tui gono, sani ba no danon namon ngga, tangeng gemang semu. Ngga no, Ribka lo pu go: “Sogo temoy no tasam ngga, genam go saysuk nogo lemoy?” Nggano, Woy Wali Iram sik sogo senong gemang, wadong.
23
Ngga ey, nemot sono Woy Wali Iram lo pu go:
“Saulatang namon mot go sani ba so gemang;
Way-way so sagui pupung go saula namon-a, mot lo mea tui lo;
Ntaton sat-a ntaton trang sik sogo don dega ey;
Trang-a ntaton sat go kebali sedue so mea;*
24
Duo tui genang ku pung gono, sedue denok namon Ribka lo gemang tui.
25
Trang-a saysuk buom-buom so. Nemot go suk amka dit-dit eygo kalik. Ngga tang sogo so, Esau so gemang temuit.
26
Sat sogo tui go nemot go ta Esau go masiwisi no gemang mlak. Ngga tang sogo so Yakob so gemang temuit. Nemotnamon tui go nogo Ishak go yagui 60 yam no.
Trang go sipsuing Esau lo nay-won go
27
Danon namon ngganemot yam so gemang babu-dapketon. Esau-a menayple naklay go sedue so lemoy. Duen lo susuing sogo nemot yakay ey. No, Yakob-a sup-sup sogo sedue, yap ba kebali-a nemot yakay ey.
28
Esau logo menay dedam go nogo, nglangin Ishak, Esau nogo-a klum kangok. No, unen Ribka, Yakob nogo-a klum kangok.
29
Ku meno so, yen buom-buom sogo so Yakob gemang susuik. Ngga ey, duen menay blang sik sogo Esau pung go, ten piam so mo tra.
30
Yakob sono Esau lo gemang we-tenawon: “At tentra-tu go se! Buom-buom sogo yen ngga, seguay so iti-sando-a!” Nggatang sogo so, Edom* so gemang pu.
31
Nggano, Yakob lo pu go: “Ngga suey! No, mot go sipsuing trang dega-a, genam sono ya itak-sando?”
32
Esau lo pu go: “Sipsuing trang ngga, genam nogo seni kua-wa! Naklay ten tra-tu go se!”
33
Nggano, tandali Yakub lo pu go: “Mot go trang ngga, genam sono iti genang, tanat-a!” Esau lo tanat ey trang go sipsuing ngga, Yakob sono gemang itak-won.
34
Nggano, loti ey yen buom-buom ey Yakob lo iti go, Esau dam go gemang klong.
Esau lo nemot go sipsuing trang ngga kalik gemang paysing-nawon.