¹ Yam so Abraham mo srawe-dapwon. Nemot nogo gualaklum kangok so, Woy Wali Iram lo mo taling. ² Nemot go koybutasemu sedueseni, drang ta so mlak go sono gemang pu-ton: “Genam go kebum ba sono, ta namon idi ey idi ey tui-sando! ³ Ut-nan ta so mlak go Woy Wali Iram go sui no se wa-silo! At go duo Ishak nogo, nan Kanaan ngge sik sogo kabung-a kua tong-selo. ⁴ No, genam so tui go yakena no mot-a se klong. Genam go duo-kabuisruo nesip sik sogo duokaguit-a, at go duo Ishak nogo kabung se tong.” ⁵ Nggano, koybuasemu lo pu go: “Duokaguit ngga, nemot go yap itak go, yakena ngge sono, genam no keng genang moy sogo, sogo kalik ya? Aya pung go mo weng go yakena sono go aya go duo wawi go ya klong?” ⁶ No, Ablaham lo tenguo go: “Ngga sono go, duo ngga ey wawi go kua klong! ⁷ Kua kay! Woy Wali Iram ut-nan eygo ta so mlak go. Nemot lo nan ngga sik so, aya go yap ba sik so, duo-kabuisruo nesip sik sogo, Ki Wali Iram lo usi goso, genam wawi go mo pung. Ngga ey, tanat ey Nemot lo genam nogo tegadi mo dok: ‘Ngge mot go duo-yap nogo so itak genang nan gabe!’ Woy Wali Iram ngganemot go tamot-a, Nemot lo motdak go mea weng. ⁸ Nago no, duokaguit kua keng go, ngga mot blo nogo idekeba meakua gigit. No, ngga sono go-a genam go duo kua wawi go klong! ⁹ Ngga ey, koybutasemu go ta Ablaham go kebom ba no tui go, taeynat go tegadi gemang dok. Nemot go tuiam Ablaham lo motdak go kebali, nemot lo pluok genang so. ¹⁰ Nga ey, nemot go tuiam logo, taut bumeno-bumeno, drang, yam so king go, menay unta blo no ta go, koybutasemu lo wawi go, Nahor susuing go yakena sono gemang klong. Nahor susuing go ngga, Mesopotamia go sada idi sogo yakena no gemang klong. ¹¹ Ku yam so use sono se pupung. Kabung-kabung bu gluik so uweng go woy no. Sip ngga no pung go yakena tema idi no, bumu dagu no dia idi so menay unta ey gemang suing-lak. ¹² Nggano, koybutasemu lo dewi gemang pu: “Genam go tuiam lo dabui iti go kekeng go Woy Wali Iram! Nggeasui go, genam go kebali seni ey lemoy genang, genam nogo Mot lo se tebok-kundo! Genam go tuiam Ablaham sono Mot dabui se iwot. ¹³ Bumu ngge ketang so ip go got-tugu go Mot se ikum sang. Yakena sik sogo duokaguit-tiat bu gluik so uweng go. ¹⁴ Nemotnang sik sogo meno, genam lo mea pu: “Debui-a! Mot go buot ku sono tebo go, genam bu ya drop go se!” Nggano, nemot lo mo iti go, nggano pu go: “Aya! Bu pla drop-a! Mot go menay bu drop genang, genam lo gluik go mea sre dali.” Ngga, Ishak nogo so Woy Wali Iram lo kuoy go kabung gemang. Ngga lemoy go sik so at senong genang, genam go tuiam Ablaham sono go Woy Wali Iram dabui mo iwot.” ¹⁵ Dewi ngga so maning pupu gono, duokaguit imening go-dato, Betuel go denun, yalu blo no buot kong go, bumu sono gemang kuntun. Betuel ngga, Nahor ey Milka eygo danon. Nahor ngga, Ablaham go ntaton trang. Ribka bumu ngganemot sono gemang natun, bu gluik gono, tandali klong so se. ¹⁶ Kabung ganemot naklai tegop sni,kaguitso maning maning sude ngot nang ey saisuik kwa tegu.Kabung kaguit nemot kelongo mang li bu glik so gano nemugo saula basno ga ey tandali mang kelak. ¹⁷ Nemot mit sono, Ablaham go koybutasemu kap go gemang we-tenawon: “Esang debui-sop! Mot go buot ba sik so, genam bu ya drop go se!” ¹⁸ Nggano, kaguit ngga lo pu go: “Aya dem sang, bu ba drop-a!” Ngga ey, ku sono bu buot keda so tebo-kuntun gono, Ablaham go koybutasemu sono gemang leguit. ¹⁹ Koybutasemu yam so bu drop gono, kaguit ngga lo pu-natun go: “Aya go menay nogo bu, genam lo gluik go mea sre. Menay bu drop dali genang.” ²⁰ Ngga ey, buot ba sogo bu temu menay lo bu so dedrop go sip ba sono pi-natun go. Bumu sono keda so kap-situn go, menay nogo bu mata dega so gemang sre-natun. Menay naklay bu drop-nenawon go, bunuo ey yam so kua. ²¹ Ablaham go koybutasemu-a, nebut kua tuot goso nemu-a luik-tenawon. Seni so, Woy Wali Iram lo nemot go tap-masi seni eygo so mo lemoy, kua? ²² Menay naklay bu yam so drop gono, samon srem teguop seni go-a Ablaham go koybutasemu lo iti go, kaguit ngga go nebuem no gemang kok-nawon. Nggano, samon namon ta idi-a idi gemang kok-sing nawon. ²³ Ngga ey, koybutasemu lo usi go: “Se pen-sando! Mot ngge nando go denun? Mot go aya go yap lo genam ey genam go seduekabug ey srek genang sip gemang?” ²⁴ Ngga ey, kaguit ngga lo we-tenatun: “Aya go sui, Betuel, babu Nahor ey babu Milka eygo danon. ²⁵ Yap ba sogo sip gemang! Menay nogo ten, neguen lekuoy mata so gemang dali.” ²⁶ Ngga ey, Woy Wali Iram sono koybutasemu ta gemang kong-nawon! ²⁷ Nemot lo pu go: “Taiti suey, Woy Wali Iram at go tuiam go Ki Wali Iram. At go tuiam Ablaham nogo, Woy Wali Iram dabui mo iwat. Tuiam go ntatonnang go yap sono genam Nemot lo wawi go mo pung.” ²⁸ Ngga ey, yap sono kaguit ngga kap-bitun go, tasam ngga naklay unen no gemang pen-natun. ²⁹ Yang! Ribka betedon klaya gemang. Nemot go sui Laban. Ablaham go koybutasemu lo pen go nebut ngga, demanon lo pen go tup go. ³⁰ Demanon go saysuk no kok go srem ngga ikum gono, koybutasemu ey tegu genang so gemang kap-biwon. Ablaham go koybutasemu, bumu mit so maning got-tenawon. ³¹ Nggano, Laban lo pu go: “Mot Woy Wali Iram lo taitiklum mo iti go sedue. Dia so kua susuing ey! Atnang go yap sono weng-a. Ayanang nogo degu atnang lo dali mo semu, weng-a! Aya go menay nogo sip mo semu dali.” ³² Ngga ey, keng go yap sono koybutasemu gemang degut. Menay blo sik sogo taut naklay ku sono Laban lo yam so ta-sing gono, menay nogo ten ey neguen eygo gemang ta. Ngga ey, koybutasemu ey nemot go seduekabung eygo masibu ulu genang bu iti go gemang ulu. ³³ Nggano, ten yam so ta gono, koybutasemu lo gemang pu-tenawon: “At lo iti go weng go nebut maning kua pen go nogo, ten meakua dam!” Nggano, Laban lo pu go: “Aya dem! Pen-sando-a, sang!” ³⁴ Nggano, Ablaham go koybutasemu lo pen go: “Genam ngge, Ablaham go koybutasemu gabe! ³⁵ Genam go tuiam Ablaham nogo taitigualaklum kangok so Woy Wali Iram lo mo taling. Ngga ey taut miam eygo sedue so Ablaham mo lemoy. Nemot go menay, kambing-domba miam dega so keke. Perak ey emas ey, koybutasemu sedue ey kabung eygo mata so nemot no tetebok ³⁶ I go, sedueseni yam no, duo sedue denok-a mo tui. Ngga ey, tuiam go taut naklay danon sono at go tuiam lo mo itak. ³⁷ Tanat ey tegadi genam no nemot lo pu go: “Genam go duo nogo kabung, Kanaan kaguit-a kua tong-selo. ³⁸ No, at go aya go yap ba sogo duo-kabuisuo-a, keda so klong go, wet go, tong go wawi go se weng!” ³⁹ Nggano, nemot sono at lo usi go: “No, duokaguit ngga, nemot ey keng genang yakua go, sogo kalik ne ya?” ⁴⁰ No, tuiam lo pu go: “Genam lo dabui itigo keng go, Woy Wali Iram go Ki Wali tamot-a, Nemot lo motdak go, mot nogo mea tebok. Mot go tapmasi seni eygo so mea lemoy. At go aya go yap ba sogo, duokaguit-a, at go duo nogo kabung mea tegu-nalo. ⁴¹ No, mot nemotnang lo tenguo go. Tanat go tegadi ngge sik sogo, mot mea pledak.” ⁴² Bumu no genam pung-abatu go, dabui ba lo dewi mo pu: “Woy Wali Iram, tuiam go Ki wali Iram! Genam go tap-masi ngge Mot lo seni ey se lemoy! ⁴³ Bumu ngge mit so ip go mea got-situgu. Nago no, bu gluik so duokaguit uweng go, menoduo sono bu drop sogo wadong-lu go. ⁴⁴ Nemot lo genam nogo bu iti go. Ngga ey, menay nogo bu iti genang nemot tang so mo pu-tun. At go tuiam go danon nogo so, Woy Wali Iram lo kuoy go duokanguit ngganemot gemang. ⁴⁵ Genam go dewi ngga maning kua yam gono, buot ey yalu no kong go Ribka-a gabe pung. Bumu sik sogo bu guik-batun gono, nemot sono genam lo pu go: “Debui-a, genam no bu iti-a, bu ya drop go.” ⁴⁶ Kekay so, yalu blo sik sogo buot keda so tebuo gono gemang pu: “Aya, budrop-a! Aya go menay nogo bu at lo mea guik dali. Genam drop gono, menay nogo nemot lo gemang sre-batun dali. ⁴⁷ Ngga ey, genam lo usi go: “Mot go aya sui nando?” Nemot lo pu go: “Genam go aya Betuel, babu Nahor ey babu Milka eygo danon.” Ngga kalik tup gono, samon logo srem nemot go nebuem no gemang glung-batu. Nggano, ta temoy nogo samon, namon ey ta idi-a idi gemang kok dali. ⁴⁸ Nggano, genam takong so isegabuem unuik go, Ki Wali Iram genam go tuiam lo keng go Woy Wali Iram sono. Nemot lo wawi go genam ngge sono nemot go duo-kabuisruo nesip sono mo weng. Duokaguit ngge-a tuiam go danon nogo so mo tegu-tu ⁴⁹ Nggeasui go, ayanang lo duing go, genam go tuiam, motnang go kukunu Ablaham nogo tasuey taling genang. Genam sono se pu-kesando. Ya kua go, se pu-kesando dali. Genam senong go tap wet dali genang.” ⁵⁰ Laban ey Betuel eygo lo wa go: “Ngga, Woy Wali Iram lo mo lemoy go! Sogo-sogo atnang logo yakua pu. ⁵¹ Ngge, Ribka gabe lo! Nemot-a aya ey keng go mea klong! Woy Wali Iram tang golo pu go kalik, mot go tuiam go danon go senun so wip ey gabe ya dok.” ⁵² Ablaham go koybutasemu, nemotnang go nebut tup gono, masi unuik go suey takong go, ⁵³ keba ba sik sogo, amka, srem, perak ey samon ey, nsuong go naklay Ribka sono gemang ikak. Nggano, betedon ey unen eygo nogo drang kangok go gemang king dali. ⁵⁴ Nggano, Ablaham go koybutasemu ey nemot go sedue-sedue ey ten dam go, gemang to-nenawon. Ngga utep go, buong go gemang pupu: “Atnang tandali at go tuiam sono, klong-lak so gabe?” ⁵⁵ No, betedon ey unen eygo lo pu go: “Ribka-a, minggu klaya so, kua go ku tanamon yam so atnang ey namboy ya suing. Ngga ey nemot mea klong.” ⁵⁶ No, koybutasemu ngga lo pu go: “Ngge nogo, walong so genam kua gluik! Woy Wali Iram lo genam go tap-masi seni ey mo lemoy go. Itak go at go tuiam nogo genam se klong!” ⁵⁷ Nggano, nemotnang lo pu go: “Ribka tang go-a imot usi-a, nemot sik so mea tup-eyon.” ⁵⁸ Nggano, nemotnang lo Ribka pu go gemang usi: “Sedue ngge no keng sogo, mot duing-togoy?” Ngga ey, duokaguit ngga lo wa go: “Yang! Genam keng so lo!” ⁵⁹ Ngga ey, nemotnang gemang iwat dali. Ribka Ablaham go koybutasemu ey klong genang sogo. Nggano, Ribka so tebok go kabung-kabung ey koybutasemu ey gemang keng-lak dali. ⁶⁰ Nggano, nemotnang lo Ribka blo nogo, tabubluim genang so ngge kalik gemang pu: “Sikabung miam dega go unen so, Ribka mot se lemoy! Plesi go yakena-yakena naklay, mot go duo-yap lo ta mea mlak!” ⁶¹ 61 Nggano, Ribka taut king go, nemot go koybutasemu duokaguit temu ey, menay no klak go gemang ip-nenawon. Ablaham go koybutasemu no gemang keng. ⁶² Ku ngganemot nogo, Ishak tang go, duen sik so, bumu: “Genam nogo Nemot lo gabe i-ikum”a lo nawon go, nan Negepb so got-tenawon ⁶³ Use go, nemot go bala ba sik so pung go, masi-masi so usu sono gemang naton. Nggano, menay uweng go gemang ikum-siwon. ⁶⁴ Ishak ikum-bitun gono, nemot go menai blo sik so Ribka li gono, ⁶⁵ Ablaham go koybutasemu ngga sono gemang usi: “Usu sogo sedue imot mit sono uweng go ngga nando?” Ngga ey, koybutasemu lo pu go: “Ngga genam go tuiam lo.” Nggano, amka iti go, Ribka nebuemnemu gemang kebet-natun. ⁶⁶ Nggano, naklay-naklay lemoy go ngga, Ishak sono koybutasemu lo gemang pen-nawon. ⁶⁷ Ngga ey, Ishak lo Ribka wawi go, unen Sara logo bala ba sono gemang degut. Nin-senun so gemang got-kletenatun. Unen kebong go u ey uwet go, Ishak go unebu Ribka lo drok go, dabui gemang yakay.