Pasal 22
Ablaham go dabui iti go Ki Wali Iram lo yatrang go
1
Ablaham dabui iti go keng go senong genang so, ku meno no, Ki Wali Iram lo gemang usi: “Ablaham!”
Ngga ey, Ablaham lo wa go, “Ya, Woy Dem, genam ngge go!”
2
Ki Wali Iram lo pu go: “Mot go duo klaykim duo dabuidalip ngga, wawi go Genam lo taling genang medium meno nan Moria sogo no, se klong! Nggano pung gono, demusung blo no taitinang so, mot go duo ngga, Genam nogo so se puit!”
3
Nggautep wadikua go, taitipuit genang, koydi dali tegek go, keleday blo no dok go. Ishak ey koybutasemu namon ey wawi go, Ki Wali Iram lo pu go sip ngganemot sono, Ablaham gemang klong.
4
Ku nangglik tete no, ket sik so, Ablaham lo sip ngganemot gemang ikum.
5
Ngga ey, koybutasemu namon no gemang pu-tenawon: “Ngge no, motnamon-a keleday ey se suing! Ngga sono at ey duo eygo-a keselu go, Woy Wali Iram nogo takong go taiti puit gono, motnamon mit sono mea kesandu.”
6
Koydi taitipuit genang, Ishak go yalu blo no, Ablaham lo iti go gemang tui. Ablaham tang golo, koy negu ey tengangbiso eygo-a iti. Nemotnamon koklong gono,
7
Ishak lo gemang usi: “Ayah!”Nggano, nglangin lo wa go: “Dem, sogo kalik?” Ishak lo usi go: “Koy negu ey koydi eygo gabe. No, taitipuit genang domba nok kay ne?”
8
Way so, Abraham lo pu go: “Domba nok Ki Wali Iram lo dali mo tui!” Ngga ey, nemotnamon gemang klong.
9
Nemotnamon, Ki Wali Iram lo pu go sip no pung go, demusung Ablaham lo kong go. Ngga blo no koydi yam so sey gono, danon Ishak tegan lo dok go, demusung blo no gemang lo-nawon.
10
Ngga ey, danon uluk genang so tengangbiso sok go!
11
Ngga temu ey, nemot sono Ki Wali Iram lo gemang usi-kunuon: “Ablaham! Ablaham!” Nggano, Ablaham lo wa go: “Ya, Woy Dem!”
12
Woy Dem lo pu go: “Duo ngga nogo iseng kua taling-senalo! Nggeasui go, genam mo senong. Seni so, Genam nogo mot tupduk ey takong don ey dabui iti go mot gabe kekeng. Mot go duo dabuidalip klaykim taiti so Genam no iti genang, mot logo kua gluik, lek-luik eygo kua.”
13
Nggano, Abraham nemu iti go, danon way sogo domba nok tegan diding no matu glung go gemang ikum. Domba ngga-a Woy Wali Iram nogo taiti so, Ablaham lo iti go gemang puit.
14
Sip ngga go sui, “Woy Wali Iram lo dali mo tui” so gemang pu. Nggeasui go, maning gemang pupu, “Imot nogo so dali meduim blo no, Woy Wali Iram lo mo tui.”
15
Ngga ey, ut sik so Woy Wali tamot lo gemang pu:
16
“Genam tang go sui no gabe pu-situgu: “Tasam ngge mot lo mo semu kua teguo-sreto. Mot go duo dabuidalip klaykim-a At nogo so mo iti.
17
Tong-kua tong goso, mot nogo Gualaklum kangok go mea uweng. Ngga ey, miam dega so ut top ey beap kaseglok eygo kalik, mot go duo mea ke. Duono-duono, plesi nemotnang go masi ba no pedueng go mea ta-sing.
18
Mot ey mot go duo-yap eygo no taling go gualakum kalik taling genang so, saula-saula lo Genam sono mea wadong-netogon. Seni so, Genam lo pu gono, mot lo dabuiiti go tupduk go tang so gabe.
19
Ngga ey, tandali koybutasemu namon mit no danon ey Ablaham gemang kenawon. Kerlam so, nemotnang Bersyeba no gemang klong. Ablaham Bersyeba so gemang susuing.
Nahor sik so pung go tang
20
Moria meduim no lemoy go blo idi lo, Ablaham gemang tup-nawon: “Nahor go senun Milka duo sedue 8 yam so mo tui.” Nahor ngga Ablaham go ntaton trang.
21
Nahor go danonnang, trang sogo Us, sat sogo Bus, Kemuel sedue Aram go nglangin,
22
Kesed, Hazo, Pildas, Yidlaf, nggano, Betuel,
23
Betuel ngga Ribka go nglangin. Ngga Nahor nogo so Milka lo 8 yam so tui go duo.
24
Koybutasemu senun so Nahor lo iti go Reuma lo tui go, Tebah, Gaham, Tahas nggano Maakha.