Pasal 21
Ishak tui go
1
Nggano, tegadi so dok go kalik, Sara nogo taitiklum, Woy Wali Iram lo gemang lemoy.
2
Ablaham yam so srewe go, Ki Wali Iram lo pu go ku no, Sara duo iti go sedue denok gemang tui.
3
Duo ngga, Ishak so Ablaham lo gemang temuit.
4
Ishak tui go sik so i go, ku 8 yam no, Ablaham no Ki Wali Iram lo tegadi pu go dok go kalik, Ishak go “saduisuk” Ablaham lo gemang tong.
5
Ishak tui go nogo, Ablaham go yagui 100 yam no.
6
Ngga ey, Sara lo gemang we-tenatun: “Genam neblengklikm genang tasam kangok go, Ki Wali Iram lo mo taling. Seduekabung temu tasam ngge tup go, yakay sogo so, genam ey kerlam so nebleng mea klik dali.”
7
Nggano, Sara lo gemang pu-natun dali: “Genam go sedue no nando lo wayang go, ‘mot go kabung logo duo min ya kok?’ Yang! Nemot-a genam go sedue yam so mo sarawe seni go, nggeasui go genam duo mo tui dali.”
8
Ngga ey, duo ngga babu-dapton go, suikekatik go yam no, walop kangok go Ablaham lo gemang iti.
Ismael ey Hagar yat go
9
Ku meno so, Ablaham go danon Ismael unen nan Mesir sik sogo kabung Hagar ey, Sara go danon Ishak ey rlam so sosok,
10
Sara lo ikum gono, Ablaham no sara lo genang we-tenatun: “Koybutatsemu kabung ngge, danon ey yat-a! Sogo sogo mot logo, at go duo Ishak nogo sogo, duo ngga eygo yakua wasey gabe!”
11
Ismael ngga, Ablaham go duo dali. Nggatang sogo so, Sara lo pu go ngga, Ablaham go dabui ba nogo suey so kua tra.”
12
No, Ablaham no Ki Wali Iram lo pu go: “Mot go koybutasemu danon eygo sogo, mot suali kua! Sara go duduing-a mot se keng. Ishak logo tang so, Genam lo tegadi so dok go duo-yap mea lemoy.
13
Hagar go duo, ngga kalik dali, duo ke go saula tang kangok goso mea lemoy dali. Nemot ngga, mot go duo dali.”
14
Nggautep wadikua go, Hagar tap no dam genang ten, keba no king go, menaysuk ba no bu sre go, Ablaham lo iti go Hagar go beto no gemang glung. Nggano, kabung ngga itak go gemang klong. Hagar ip go, udong Bersyeba lo gemang wet-tenatun.
15
Nemot go bu ngga yam so kua go, danon-a diding ba no itak go,
16
nemot-a klong go, 100 meter yam no suing go, dabui ba lo gemang we-tenatun: “Genam go duo kekebong go ikum sogo, genam don kua.” Ngga so, u gemang kukluo.
17
Ismael go ukayang Ki Wali Iram lo gemang tup. Ngga ey, ut sik so Hagar sono Ki Wali tamot lo gemang pu: “Sogo dabui so mot tra-togoy, Hagar? Suali kua tra! Mot go duo go ukayang Ki Wali Iram lo mo tup.
18
Nggeasui go, duo mit sono se nalo! Tang babu goso nemot go duo, Genam lo mea lemoy-lu.”
19
Nggano, Hagar go nemu Ki Wali Iram lo pli go, buput gemang ikum-natun. Hagar klong go, busip ba nogo bu gemang sre-natun. Nggano, danon bu iti go gemang drop-nawon.
20
Ki Wali Iram ey, Ismael gemang klong-weng. Duo ngga kangok-dapwon go, nenguen pay Paran no gemang got-nawon. Menayple kangok go sedue so, gemang lemoy-nawon.
21
Nggano, Mesir kabung-a nemot nogo so unen lo gemang tong.
Ablaham ey Abimelekh ey tegadi dok go
22
Ngganemot ku nogo, deguena Abimelekh ey Pikhol nemot go plewengkabui ey Ablaham sono weng go gemang pu-tenawon: “Mot lo pluok-teguoy go naklay, Ki Wali Iram lo mot nogo kangok so tetebok go
23
Ngga tang so, nggeasui go, Ki Wali Iram go suongku no tegadi ya dok-mleyon. Yansi go, genam nogo mot logo, yakua plesing genang. Genam go duo-yap nogo, nggano duoyap lo tui go duo nogo yakua plesing. Genam go dabui mot nogo suey go kalik dali, genam ey yakena ngge eygo sip ngge so mot susuing go nogo se pluok-togoy.”
24
Ngga ey, Ablaham lo pu go: “Ya! Ta ey genam gabe nat-situgu!”
25
No, ngga blo idi lo, Abimelekh go koybutasemu lo Ablaham lo tuet go buput gluik goso dabui gemang lek.
26
No, Abimelekh lo pu go: “Genam kua senong! Nando lo ngga mo pluok? Mot lo genam nogo maning kua pen ne. Ngge da klaya tete sogo genam tup-tu go gabe?”
27
Nggano, domba ey sapi ey Abimelekh no, Ablaham lo gemang ikak-sing go, tegadi gemang dok-klewon.
28
Domba nok taidisonamon yam so, banom so Ablaham lo gemang ta-sing,
29
nggano, Abimelekh lo usi go: “Sogo-nang so ngga kalik go semu-to?”
30
Ablaham lo wa go: “Dombanok taidisonamon ngga iti-a! Nggatang so, aya yang genang: ‘Seni so bumu ngge genam lo tuet go gabe.’”
31
Nggatang so, sip ngga Bersyeba so gemang pu. Sedue namon ngga, sip ngganemot no, ta ey nat-kenawon go tegadi gemang dok.
32
Tagadi Bersyeba dok gono, Abimelekh ey Pikhol ey nan Filistin no tandali gemang klong.
33
Nggano, Ablaham lo di Tamariska klaya gemang kuali. Ku ngganemot sik so, sip ngga, Woy Wali Iram, Senang Wali Iram no ta kokong sip so gemang lemoy.
34
Ngga blo idi logo, sedue Filistin go nan sogo, walong so Ablaham gemang got-nawon.