1
Mamre sik sogo, nan Kanaan go sada idi nan Kades ey Syur eygo sono Ablaham gemang klong. Klog go, Gerar no gemang got-nawon. Gerar so suing go ku kata yam so?
2
Ngga ey, senun Sara sogo demanon so gemang we-nawon. Ngga tang so, Gerar go deguena Abimelekh lo tamot motdak go weng go, nemot nogo so, Sara gemang wawi.
3
Ku meno no, wadi sedi ba no, Abimelekh sono Ki Wali Iram lo gemang pu: “Kabung ngga, nemot go kenin gemang. Nemot iti go tang sogo so, mot mea kebong!”
4
No, Sara nogo Abimelekh "tamaning kua klak". Ngga ey, way so, deguena lo pu go: “Woy Dem! Genam logo kuklue kua pluok go, genam ey genam go blung eygo, idekeba tebadali Mot lo ya taling?
5
No, Ablaham tang golo ne pu: ‘Kabung ngga nemot go demanon.’ Ngga ey, kabung ngga logo, ngga kalik ne wa dali. Ngga naklay, genam go dabui iku no pluok go. Mo kuklue?”
6
Nggano, Ki Wali Iram lo sidi ba no pu go: “Yang! Ngga dabui iku no, mot lo pluok go. Ngga Genam mo senong! Nggatang sogo so, mot Genam lo itak go kuklue pluk genang yakua. Nggano, kabung ngga tamlak genang sogo Genam logo kua itak dali.
7
No, nggeasui go, wawi go nemot go kenin sono tandali nase itak! Kenin ngga, At lo motdakgo tamot gemang. Mot ey mot go blung naklay eygo blo nogo, nemot lo dewi nase pu. Mot, mot go blung ey kebong genaning. No, tandali kua itak go, se duing-nalo, mot ey mot go blung naklay ey mea kebong.”
8
Nggautep wadikua go, nemot go kebali sedue usi-sing go, Abimelekh go sidi ngga gemang pen-nawon. Nggano, nemotnang suali kangok so gemang tra-nenawon.
9
Ngga ey, Abimelekh lo Ablaham usi go gemang pu-tenawon: “Sogo kalik go tasam-a, atnang nogo mot lo mo pluok? Sogo-a, genam lo mot nogo mo kuklue? Ngga tang sogo so idekeba ngge genam ey genam go blung eygo blo no mo glung-to? Atnang no, mot lo ngga kalik semu genang demu kua go.
10
Sogo kalik go temoy no, ngga kalik go mo semu?”
11
Way so Ablaham lo tenguo go: “At-a pu, seduekabung ngge sogo Ki Wali Iram nogo suali kua gabe. Nago no, Ki Wali Iram nogo suali kua go seduekabung lo. Genam go kabung so duing go, genam but genaning so ngga mo pen.
12
Nemot-a, seni dali so lo, nemot ngge genam go kabuisruo, aya klaya, mia-a banom-banom. No, nemot-a kabung so gabe iti.
13
Ki Wali Iram lo pu goso, aya go yap itak go, nan-nan no koklong go. At go kabung nogo mo pen, mot genam no dabui iti go tang sogo so, nago-nago no pung go, mot logo se wa, 'Ablaham ngga genam go aka!'
14
Nggano, Ablaham go ta sono Abimelekh lo Sara tandali gemang itak. Koybutasemu, domba sapi gemang itak dali.
15
Nggano, Ablaham no deguena Abimelekh lo gemang pu-tenawon: “Ngga naklay genam go nan gabe! Mot go ba so, nago no suing sogo, ngganemot no nase suing.”
16
Ngga ey, gemang pu-tenawon Sara sono: “Mot go aka nogo drang, seribu perak mo iti gemang. Seduekabung naklay senong genang, seni so kuklue nemot logo kua pluok.”
17
Sara tang sogo so, Abimelekh go yakena sogo kabung-kabung naklay, duo ibui so Woy Wali Iram lo lemoy go.
18
Ngga ey, Ki Wali Iram sono Ablaham lo dewi pu go: Abimelekh go sadui, senun, koybutasemu kabung, kabung-kabung naklay, duo tui genang tap Ki Wali Iram lo tandali gemang pali-sing.