¹ Glop so Ablaham no pung go, Ki Wali tamot namon-a kekay so, Sodom yakena no kenawon. Kuklik ba lo Sodom nogo gemang pung-klenawon. Woy ngganemot nogo, Yakena yataput sogo Lot-a got-tenawon. Nemotnamon ikum gono, wawi sogo so Lot ip go, takong sogo so, nemotnamon go suongkuno gemang unuik-nawon. ² Ngga ey, Lot lo gemang pu-tenawon: “Ayanamon weng-a! Genam go yap sono, yap no masibu ulu go, genam go yap lo mea srek. Utep wadikua so, mot go tapmasiku nogo mea klong.” No, nemotnamon lo way so tenguo go: “Taiti suey! Nuey-a! Atnamon ngge lo yakena go seboydia lo mea srek.” ³ No, Lot lo poplong gono, Lot go yap ba sono nemotnamon gemang degut. Degut gono, ten tom eygo Lot lo suik go, loti dam genang yam so duik go, ten ta go gemang dam-nenawon. ⁴ No, glopnamon ngga, maning usene kua srek gono, sedue Sodom lo, Lot go yap wok gemang teguot. Yakena ngga sogo sedue seguaygo-babugo naklay, yamso ngga no mo pluep-lak. ⁵ Ngga ey, Lot sono nemotnang lo gemang bebega: “Mot go yap lo srek so weng go sedue-sedue ngga nago so? Ngge sono wawi-a! Nemotnang ey tawaluk atnang ya pluok-elu go se!” ⁶ Ngga kalik tup gono, yap ba sik sogo Lot pung go yataput kaduin gono, ⁷ gemang pu-tenawon: “Anduasi-yap dabui lo at gabe pu-situgu, taybat kuaseni go ngga, kua-pupluok ey. ⁸ Motnang namboy se tup! Genam go duokaguit namon ey gabe. Nemot namon-a motnang no ya itak lu? Sogo so motnang lo duing go, nemotnamon no se pluok-kenalo. No, glop nogo yakua pluok seni gabe.” ⁹ No, way so Lot sono sedue Sodom lo tenguo go: “Ngge sik sogo, mot se ip! Mot saula meno duo logo atnang yakua taling! Se klong! Kua go atnang lo ide dega ey mot-a mea taling-elu. Glop namon ngga no taling genang ey meakua kerlam.” Ngga ey, nemotnang lo Lot momot e… yatap ey truong so se. ¹⁰ No, glop namon ngga lo tasra go, yap ba sono Lot mlak go, yatap gemang kaduin. ¹¹ Dia sogo sedue naklay-a, kekay so Nemotnamon lo nemupung-sing go takasa so, yatap ikum sogo yakua.*

Sodom yakena Lot itak-nawon go

¹² Ngga ey, Lot no glop namon lo gemang pu: “Mot go duo, sedue, kabung, duokenin-yap, duokabung-yap, aka-yap, sat-yap yakena ngge ba sogo gemang go, yakena ngge sik sogo wawi go nase pluep-lak! ¹³ Yakena ngge, Atnamon lo koy lo mea puit. Yang! Yakena ngge so, seduekabung lo, Woy Wali Iram go kama sono, nebut rli go Nemot mo tup. Ngganang so Atnamon motdak go weng go gabe. Yakena Sodom koy lo puit-ak genang so.” ¹⁴ Ngga ey, Lot klong go, denunnamon go yamdali baynang pugo sedue pu-nawon go: “Yakena ngge koy lo puit genang so Woy Wali Iram mo pu, sip ngge sik sogo keda so imot ya pung go klong!” Nemotnang-a pu, ngge nebutsemu so Lot pen-aton. ¹⁵ Kukluk no se, Ki Wali tamot namon lo Lot senglok go gemang pu: “Kedaso pung go klong-a! Mot go kabung, duokaguit namon ey wawi go, keda so ngge sik sogo kap-a. Yakena ngge koy lo puit go, motnang ey kuim genaning.” ¹⁶ Lot tang go lek-luik so maning. No, nemot nogo, Woy Wali Iram klum ey. Ngga tang sogo so, nemotnang Ki Wali tamot namon lo wawi go, yakena sik sogo dia sono gemang pung. ¹⁷ Ngga ey, Ki Wali tamot meno lo gemang pu: “Susuoy so mot se kap! Taton sono go kua lekek! Kumeduim sono se kap, butuo pay no kua sing. Motnang kebong genaning!” ¹⁸ No, wayso Lot lo pu go: “Aya sang! Kumeduim sono atnang pu go kua kuek ey? ¹⁹ Nemot-a, atnang no tebok go, Aya lo wali mo susuoy gabe. No, kumeduim ngga ket-dega sogo. Tap maning kekap gono, koy lo atnang kuim eygo se! ²⁰ Ikum-a, yakena seguay go ngga git-satun go. Ngga sono pu go ya kuek-esalu, atnang susuoy genang?” ²¹ Ki Wali tamot lo pu go: “Yang! Yakena seguay go ngga yakua puit lo!” ²² Keda so kap-a! Mot maning kua pung go nogo, sogo-sogo Genam maning yakua semu-srelu.”i Yakena seguay goso Lot lo pu goso, Zoar so yakena ngga gemang pu.

Yakena Sodom ey Gomora ey koy lo kuim go

²³ Woy demening se keklak, yakena Zoar no Lot gemang pung. ²⁴ Nggga temu ey, kekayso ut blo sik sogo demukoy ey kuadonkoy ey, yakena Sodom ey Gomora eygo blo sono sa kalik gemang pu. ²⁵ Yakena namon ngga koy lo yamso se dasing. Sodom pay ngga naklay, unusruem kim-daguit naklay, yam so koy lo gemang dam. Ngga sogo seduekabung tang ey se buin. ²⁶ No, Lot senun-a, taton sono lekek go, beapdi so se demu-dapnatun.* ²⁷ Ngga utep wadikua go, Ablaham keda so nawon go, Woy Wali Iram go suongkuno suing go, sip ngga no ip go, ²⁸ Yakena Sodom sono nemu iti go, nan ngga naklay sik so koyndop keklak go, demusung kangok dega go ba sik so ndop pupung go kalik gemang ikum-siwon. ²⁹ Abraham no duing go tang sogo so, Lot Ki Wali Iram lo tebok go gemang susuoy. Sodom pay sogo yakena-yakena Ki Wali Iram lo ngga kalik koy logo, gemang sayap-nangum.

Sedue Moap ey sedue Amon eygo mlena

³⁰ Zoar no suing genang suali sogo so, denunnamon wawi go, kumeduim sono Lot gemang klong. Demuput meno ba so gemang got-netenawon. ³¹ Ngga sogo no, ndengon sat so trang lo gemang we-tenatun: “Sip ngge sogo imot iti go, duo tui-mleyon genang sedue kua go. Nggano, aya yamso srawe, mo seni-dapwon sang! ³² Aya no anggulbu-a iti-mleyon go, budrop go, aya bu lo mawo-dapyon gono, nemot ey srek go, duo tui-mleyon sogo be.” ³³ Nggaku wadi go, anggulbu nglagin no iti go gemang drop. Nglangin yam so mawo go, ndegon trang-a degut go, nglangin ey gemang srek. Anggul bu lo mo mawo go nogo, nglangin kua senong, “Sogo-a mo lemoy-atun?” ³⁴ Nggautep go, ndengon sat so trang lo gemang we-tugun: “Wadi go genam aya ey mo srek go. Nggeasui wadi go, anggul bu aya nogo iti dali go, way so mot eygo se srek! Imot go-imot go duo tui-mleyon sogo be! ³⁵ Ngga wadi go, nglangin no anggul bu iti-kletun go. Lot mawo gono, ndengon sat degut go, nglangin ey gemang srek dali. Anggul bu lo mo mawo go nogo, nglangin kua senong, “Sogo-a mo lemoy-atun?” ³⁶ Nggano, Lot go denunnamon ngga, nglangin tang go logo duo nenguon go, ³⁷ Trang sogo lo sedue denok tui go, Moabk so gemang temuit. Ngga, Moab saula nggeasui go mamui gemang. ³⁸ Sat sogo lo sedue denok dali tui go Ben-Amil so gemang temuit. Ngga, Amon saula nggeasui go mamui gemang.