¹ Dewi so pu go sip nebutpen eygo di Mamre mit no, Ablaham ey Woy Wali Iram gemang tegu. Ku ngganemot nogo kunay sogo so, bala yataput no nebit ku so Ablaham gemang susuing. ² Nemu iti-siwon go, nemot go nemuku lo sedue nangglik koklong go gemang ikum-siwon. Nemotnang wawi sogo so, keda so Ablahan kap-siwon go, unuik gono gemang pu-tenawon ³ “Ayanang! Genam go bala itak go, kekay so kua koklong ey! Namboy degut-a, genam go yap no nim la gono se koklong!” ⁴ Motnang go masi bu ulu genang bu ya iti! Nggano, di nuik ngga ba no nim gemang la-nenawon. ⁵ Genam nogo klum tang so, Ayanang mo degut-keto go, ten-dato ta-lu go dam kelo gono, motnang go tap masi se klong. Nemotnang lo pu go: “Taiti suey lo sang! Mot go dabui suey go tang so, Atnang gabe ya degut.” ⁶ Bala ba sono, keda so Ablaham degut go Sara no gemang pu: “Keda so, tepung suey go-a iti go, muk segluong so muong-muong so se duik!” ⁷ Ngga ey menay betui no kap go, sapi nok keduong teguop kangok go-a iti go, nemot go koybutasemu no gemang iti, keda so se suik. ⁸ Nggano, min-ip ey wengkabui ip ey Ablaham lo iti go, menay suik go ngga ta go gemang dam-nenawon. Nemotnang nogo ten, Ablaham tang golo wasey go, di nuik ba no ta go gemang dam-nenawon. ⁹ Ngga ey, Nemotnang lo gemang usi: “Mot go kabung Sara kay?” Ablaham lo wa go: “bala ba so ngga go!” ¹⁰ Nemotnang sik sogo Meno lo pu go: “Banu 9 dali no, Genam mea weng. Genam pung-alu go nogo, mot go kabung Sara sedue denok mea tui-yun.” Woy ngganemot nogo, Sara bala yataput idi sik so glop ngga go taton sik so mo tup dali. ¹¹ Yang! Ku ngganemot nogo, Ablaham ey Sara eygo yam so mo nalo. Banuno-banuno go kabung go sadui, Sara mo kua. ¹² Ngga tang sogo so, dabui ba lo nebleng klik-natun go Sara lo gemang pu: “Genam ngge kalik mo nalo go sogo kalik so duo ya iti-lu? Sedue ey srek sogo kunala mo kua. Nggano, Ablaham tang go yam so don mo kua dali?” ¹³ Ngga no, Ablaham so Woy Wali Iram lo usi go: “Sogo tang so Sara neblengklik go ne usi, genam mo nalo go, duo ya tui lu?” ¹⁴ Se duing! Woy Wali Iram nogo, sogo sogo yakua go kua. Genam lo pu-tu go kalik: “Banu 9 dali no Genam ngge sono tandali mea weng. Ku ngganemot no sedue denok-a Sara lo mea tui-yun.” ¹⁵ Suali tra-tun go sogo so, Sara lo gemang sayam-tun: “Genam nebleng kua klik-wa.” No, Woy Wali Iram lo pu go: “Mot nebleng mo klik-to wa!”

Sodom so Ablaham lo wadong go

¹⁶ Ngga ey, glop nangglik ngganemot gemang klong-lak. Tap sono Ablaham lo wawi go gemang-nawon. Nggano, sip meno no gemang pung. Sodom yakena nemu ngga sik so luik genang so. ¹⁷ Dabui ba lo Woy Wali Iram gemang duing-ton: “Sodom yakena no idekeba taling genang, Ablaham nogo meakua kok, Ablaham na senong dali. ¹⁸ Nemot go duo lo sinok ke-ayun go-a don eygo, saula tang kangok goso mea lemoy. ¹⁹ Nemot-a Genam lo mo kuoy. Ablaham go duo-yap nogo genam go nebut pen go suey so tamlak genang. Suey sogo, senieygo, nemudi sogo, nemotnang lo mea pluok-netegon. Tasam ngga naklay, seni so nemotnang lo pluok go, Genam go tegadi naklay nemotnang nogo mea lemoy seni.” ²⁰ Nggano, Ablahan sono Woy Wali Iram lo gemang pen-won: “Sodom ey Gomora eygo taybat sogo nebutkluim, kangok so Genam go kama no mo rli. Yang, nemotnang go kuklue kangok dega.” ²¹ Ngganemot nemu-luik genang so, Genam li go gabe. Genam lo tup go ngga seni so?” ²² Nggano, glop namon dali-a banim ip go Sodom sono gemang klong. No, Woy Wali Iram-a Ablaham ey maning got-tenawon.” ²³ Woy Wali Iram dagu no Ablaham suing go, gemang usi-tenawon: “Seni so, kuklue kua go seduekabung nogo idekeba, Ki Wali Iram logo ya iti? ²⁴ Yakena ngga ba sogo, kuklue kua go seduekabung 50 yam so gemang go, yakena ngga nogo idekeba ya taling? Sedue 50 kuklue kua go tang sogo yakena ngga yakua susuoy? ²⁵ Kuklue kua go seduekabung ngga, kuklue eygo seduekabung ey kerlam so idekeba kua taling sang. Nago so mo Ki Wali Kumam lo ngga kalik so ya semu?” ²⁶ Woy Wali Iram lo pu go: “Sodom yakena no sedue 50 At lo ikum go, yakena klaya ngga, nemotnang 50 tang so, idekeba meakua taling.” ²⁷ Tandali Ablaham lo pu go: “Esang Woy Wali Iram! Genam go nebut ngge tandali pu-bilu sogo, sagui kua kong sang. Genam ngge seduekabung seguong be. Nebut pu genang sogo don kua go sang. ²⁸ No, senieygo sedue 45 yam so gemang go, Woy Wali Iram logo yakena ngganemot ya puit? Woy wali Iram lo pu go: “Senieygo sedue 45 gemang go, nemotnang tang so, yakena ngga Genam logo meakua puit.” ²⁹ Ablaham lo tandali pu go: “Senieygo sedue 40 yam so gemang go, ya puit lo? Woy Wali Iram lo pu go: “Sedue 40 tang sogo so Genam lo duing go ngga, mea kua pluok.” ³⁰ Tandali Ablaham lo pu go: “Woy Wali Iram sagui kua sang! Genam lo tandali go tete usi go, senieygo sedue 30 yam so gemang go?” Woy Wali Iram lo pu go: “Senieygo sedue 30 gemang go, Genam lo duing go ngga namboy mea itak.” ³¹ Tandali Ablaham lo pu go: “Esang, genam lo pu go ngge sang se kay lo Woy Wali Iram, senieygo sedue 20 gemang go, sogo kalik ya?” Woy Wali Iram lo pu go: “Senieygo sedue 20 yam so gemang go, yakena ngga yakua puit-dak.” ³² Igo seni sogo, Ablaham lo pu go: “Esang! Woy Wali Iram sagui kua sang! Daklaya dali mea pu-bilu sang. Senieygo sedue tanamon yam so gemang go, ya puit?” Woy Wali Iram lo pu go: “Sedue tanamon kuklue kua go gemang go, idekeba meakua iti.” ³³ Yam so Ablaham ey nebut pen gono, Woy Wali Iram klong go, Ablaham-a yap no gemang nawon.