¹ Ita, idi naammoan ni Jesus a nangngeg dagiti Fariseo nga ad-adu ti baubautisaranna ken ar-aramidenna nga adalan ngem kenni Juan ² (nupay saan nga isuna ti mangbaubautisar, no diket dagiti adalanna), ³ pinanawanna ti Judea ket nagsubli manen isuna idiay Galilea. ⁴ Ita, kasapulan a lumabas isuna idiay Samaria. ⁵ Isu a napan isuna idiay Sikar nga ili iti Samaria. Asideg daytoy iti bassit a daga nga inted ni Jacob iti anakna a ni Jose. ⁶ Adda sadiay ti bubon ni Jacob. Nagtugaw ni Jesus idiay bubon agsipud ta nabannog isuna manipud iti panagdalyasatna. Umadanin idi ti katengngaan iti aldaw. ⁷ Immay ti babai a Samaritano tapno agsakdo iti danum. Kinuna ni Jesus kenkuana, "Ikkannak iti danum nga inumek." ⁸ Daytoy ket agsipud ta napan dagiti adalanna idiay ili tapno gumatang iti taraon. ⁹ Ket kinuna iti babai a Samaritano kenkuana, "Apay a sika a Judio ket dumawdawat kaniak, a babai a Samaritano iti mainum?" Daytoy ket agsipud ta saan a makikadkadua dagiti Judio kadagiti Samaritano. ¹⁰ Sinungbatan ni Jesus isuna, "No naammoam ti sagut iti Dios, ken no siasino ti mangibagbaga kenka, 'Ikkanak iti mainum,' mabalinmo't dumawat ket mabalin nga ikkannaka iti sibibiag a danum." ¹¹ Simmungbat ti babai, "Apo, awan ti timbam, ken nauneg ti bubon. Sadino ti pangalaam iti dayta a sibibiag a danum? ¹² Saanka a nabilbileg, wenno nabilbilegka kadi ngem ti amami a ni Jacob a nangted kadakami iti bubon ken imminom manipud iti daytoy a kas iti inaramid dagiti annakna ken tarakenna? ¹³ Simmungbat ni Jesus, "mawawto manen ti amin nga uminom iti daytoy a danum, ¹⁴ ngem saanto pulos a mawaw ti siasinoman nga uminum iti itedko a danum kenkuana. Ngem ketdi, agbalinto nga ubbog ti danum kenkuana a mangpataud iti agnanayon a biag." ¹⁵ Kinuna iti babai kenkuana, "Apo, itedmo kaniak dayta a danum tapno saannakto a mawaw ken saannakton nga umay ditoy tapno agsakdo iti danum." ¹⁶ Kinuna ni Jesus kenkuana, "Mapanka ket ayabam ti asawam ken agsublikayo ditoy." ¹⁷ Simmungbat ti babai kenkuana, "Awan ti asawak." Simmungbat ni Jesus, "Umiso ta imbagam, 'Awan ti asawak,' ¹⁸ agsipud ta addaanka iti lima nga asawa ken ti adda kenka ita ket saanmo nga asawa. Pudno ta imbagam." ¹⁹ Kinuna iti babai kenkuana, "Apo, makitak a sika ket profeta. ²⁰ Nagdayaw dagiti ammami iti daytoy a bantay. Ngem imbagayo nga sadiay Jerusalem ti lugar a rumbeng a pagdayawan dagiti tattao." ²¹ Simmungbat ni Jesus kenkuana, "Mamatika kaniak babai, umadanin ti oras nga no agdayawkayonto iti Ama, saanton nga iti daytoy a bantay wenno idiay Jerusalem. ²² Agdayawkayo iti saanyo nga am-ammo. Agdaydayawkami iti am-ammomi agsipud ta ti pannakaisalakan ket naggapu kadagiti Judio. ²³ Nupay kasta, umadanin ti oras, ken itan ti tiempo, no agdayaw dagiti pudno nga agdaydayaw iti Ama iti espiritu ken kinapudno, ta agbirbiruk ti Ama kadagiti tattao nga agdayaw kenkuana. ²⁴ Ti Dios ket Espiritu, ket dagiti tattao nga agdayaw kenkuana masapul nga agdayaw iti espiritu ken kinapudno." ²⁵ Imbaga iti babai kenkuana, "Ammok nga umayto ti Mesias, ti maaw-awagan a Kristo. Ilawlawagnanto ti amin kadatayo inton umay isuna. ²⁶ Kinuna ni Jesus kenkuana, "Siak a makisarsarita kenka, siak isuna." ²⁷ Nagsubli dagiti adalanna iti dayta a kanito. Masmasdaaw ita dagiti adalanna no apay a makikatkatungtong isuna iti babai, ngem awan ti nangibaga iti, "Ania ti birbirokem?" wenno "Apay a makikatkatungtongka kenkuana?" ²⁸ Ket imbati iti babai ti timba iti danum. Nagsubli isuna idiay ili ket imbagana kadagiti tattao, ²⁹ "Umaykayo, kitaenyo ti lalaki a nangibaga iti amin nga inaramidko. Saan a mabalin nga isuna ti Kristo, mabalin kadi? ³⁰ Pinanawanda ti ili ken napanda kenkuana. ³¹ Iti daytoy a kanito, al-alukuyen isuna dagiti adalan, "Rabbi, umayka manganen." ³² Ngem kinuna ni Jesus kadakuada, "Adda ti taraonko a saanyo nga ammo ti maipapan iti daytoy." ³³ Kinuna dagiti adalan iti tunggal maysa, "Awan ti siasinoman a nangted iti aniaman a kanenna, adda kadi?" ³⁴ Kinuna ni Jesus kadakuada, "Ti taraonko ket ti mangaramid iti pagayatan iti nangibaon kaniak ken mangleppas iti trabahona. ³⁵ Saanyo kadi nga ibaga, 'Adda pay ti uppat a bulan ket umayen ti panagaapit'? Ibagbagak kadakayo, tumangadkayo ken kitaenyo dagiti taltalon agsipud ta naluomen dagitoy ken mabalinen a maapit! ³⁶ Makaawat iti tangdan ti agap-apit ken agur-urnong iti bunga a maipaay iti biag nga agnanayon tapno agmaymaysa nga agrag-o ti nagmula ken ti nagapit. ³⁷ Iti daytoy a pagsasao ket pudno, 'Maysa ti agmulmula ken sabali ti mangap-apit.' ³⁸ Imbaonkayo tapno mangapit iti saanyo a trinabaho. Nagtrabaho ti dadduma ken simrekkayo iti trabahoda." ³⁹ Adu kadagiti Samaritano iti dayta a siudad ti namati kenkuana gapu iti imbaga iti babai a mangpanpaneknek, "Imbagana amin kaniak nga inaramidko." ⁴⁰ Idi napan dagiti Samaritano kenni Jesus, nagpakpakaasida kenkuana a makipagtalinaed pay laeng isuna kadakuada isu a nagtalinaed isuna sadiay iti dua nga aldaw. ⁴¹ Ket adu pay dagiti namati gapu iti saona. ⁴² Imbagada iti babai, "Mamatikami saan laeng a gapu kadagiti sasaom, nangngegmi met ken ammomi pay a daytoy ti pudno a mangisalakan iti lubong." ⁴³ kalpasan iti dua nga aldaw, pimmanaw isuna sadiay ket napan isuna idiay Galilea. ⁴⁴ ta imbaga ni Jesus nga awan ti dayaw iti profeta iti bukodna a pagilian. ⁴⁵ Idi napan isuna idiay Galilea, pinasangbay isuna dagiti taga Galilea. Nakitada dagiti amin a banbanag nga inaramidna idi fiesta iti Jerusalem, agsipud ta napanda met laeng idiay fiesta. ⁴⁶ Ita, nagsubli manen ni Jesus idiay Cana a lugar iti Galilea a nangaramidanna iti arak manipud iti danum. Adda ti opisial iti ari, masakit ti anakna a lalaki nga adda idiay Capernaum. ⁴⁷ Idi nangngegna a pimmanaw ni Jesus idiay Judea ken nagsubli idiay Galilea, napan isuna kenni Jesus ket nagpakpakaasi kenkuana a bumaba isuna ken agasanna ti masakit nga anakna a dandanin a matay. ⁴⁸ Imbaga ni Jesus kenkuana, "Malaksid no makakitakayo a tattao kadagiti pagilasinan ken pagsiddaawan, saankayo a mamati." ⁴⁹ Kinuna iti opisial kenkuana, "Apo, umaykan sakbay a matay ti anakko." ⁵⁰ Kinuna ni Jesus kenkuana, "Mapankan, agbiag ti anakmo." Namati ti lalaki iti imbaga ni Jesus kenkuana ket napan isuna iti dalanna. ⁵¹ Kabayatan a bumabbaba isuna, sinabat isuna dagiti adipenna ket kinunada nga nabiagen ti anakna. ⁵² Dinamagna kadakuada no ania nga oras a nangrugi nga immimbag ti anakna. Simmungbatda kenkuana, "Pinanawan isuna iti gurigorna idi maikapito nga oras idi kalman." ⁵³ Naamiris iti ama nga isu ti oras idi imbaga kenkuana ni Jesus, "Agbiag ti anakmo." Namati ngarud isuna ken ti amin a pamiliana. ⁵⁴ Daytoy ti maikadua a pagilasinan nga inaramid ni Jesus idi rimmuar isuna idiay Judea nga agpa- Galilea.