Kapitulo 3

1 Ita, adda Fariseo nga agnagan iti Nicodemo a maysa a pangulo dagiti Judio. 2 Napan daytoy a tao kenni Jesus iti rabii ket kinunana kenkuana, "Rabbi, ammomi a sika ti manursuro a naggapu iti Dios agsipud ta awan ti makaaramid kadagitoy a pagilasinan nga inaramidmo malaksid no adda kenkuana ti Dios." 3 Simmungbat ni Jesus kenkuana, "Pudno, pudno, malaksid no maysa ket maiyanak manen, saanna a makita iti pagarian ti Dios." 4 Kinuna ni Nicodemo kenkuana, "Kasano a maiyanak ti tao no lakayen isuna? Saan a mabalin nga agsubli isuna iti mamindua iti uneg ti tiyan iti inana ken maiyanak manen, kabaelanna kadi?" 5 Simmungbat ni Jesus, "Pudno, pudno malaksid no maysa ket maiyanak iti danum ken iti Espiritu, saanto isuna a makastrek iti Pagarian iti Dios." 6 Ti maiyanak iti lasag ket lasag, ken ti maiyanak iti Espiritu ket espiritu. 7 Saanka nga agsiddaaw iti imbagak kenka, 'Masapul a maiyanakka manen.' 8 Agpuyot ti angin no sadino ti kayatna, mangngegmo ti unina ngem saanmo nga ammo no sadino ti naggapuanna ken ti papananna. Kasta met ti isu amin a naipasngay iti Espiritu." 9 Simmungbat ni Nicodemo ket kinunana, "Kasano a mapasamak dagitoy a banbanag?" 10 Simmungbat ni Jesus kenkuana, "Manursuroka kadi iti Israel ta saanmo pay a naawatan dagitoy a banbanag? 11 Pudno, pudno ibagbagami no ania ti ammomi, ken panpaneknekanmi no ania ti nakitami. Ngem dakayo a tattao saanyo nga awaten dagiti pammaneknekmi. 12 No ibagak kadakayo ti maipanggep kadagiti naindagaan a banbanag ken saanyo a patien, kasanokayo a mamati no ibagak kadakayo dagiti nailangitan a banbanag? 13 Awan ti siasinoman a nagpangato idiay langit malaksid kenkuana a nagpababa manipud langit, ti Anak iti Tao. 14 Kas iti panangipangato ni Moises iti uleg idiay let-ang, masapul a maipangato met uray pay ti Anak iti Tao 15 tapno amin a mamati kenkuana maaddaan iti biag nga agnanayon. 16 Gapu ta kasta unay ti panagayat iti Dios iti lubong, intedna ti kakaisuna nga Anakna, nga siasinoman a mamati kenkuana ket saan a mapukaw no diket maaddaan iti biag nga agnanayon. 17 Saan nga imbaon iti Dios ti Anakna tapno ilunodna ti lubong no diket tapno maisalakan ti lubong babaen kenkuana. 18 Saan a mailunod ti mamati kenkuana, ngem ti saan a mamati ket nailunoden gapu ta saan a namati babaen iti nagan iti kakaisuna nga Anak iti Dios. 19 Daytoy ti makagapu iti pannakaukom :Immay ti lawag ditoy lubong ket inayat dagiti tattao ti sipnget imbes a ti lawag gapu ta dagiti aramidda ket dakes. 20 Ta ti amin nga agar-aramid iti dakes ket kagurada ti lawag ken saan nga umay iti lawag tapno saan a makita dagiti ar-aramidna. 21 Nupay kasta, ti siasinoman nga agaramid iti pudno, umasideg iti silaw tapno maipakita dagiti aramidna ket naaramid para iti Dios. 22 Napan ni Jesus ken dagiti adalanna idiay Judea kalpasan daytoy. Inusarna idiay ti tiempona kadakuada ken nangbaubautisar isuna. 23 Mangbaubautisar met ni Juan ita idiay Enon nga asideg iti Salim ta ad-adu ti danum sadiay. Mapmapan dagiti tattao kenkuana ken nabautisaranda 24 ta saan pay idi a naibalod ni Juan. 25 Nangrugi ditoy ti saan a pagkinnaawatan dagiti dadduma nga adalan ni Juan ken ti maysa a Judio maipapan iti seremonia iti pannakaugas. 26 Napanda kenni Juan ket kinunada kenkuana, "Rabbi, ti kadwam idi a pinaneknekam, adda isuna idiay bangir iti karayan Jordan, kitaem mangbaubautisar isuna ken mapmapanda amin kenkuana." 27 Simmungbat ni Juan, "Saan a makaawat iti aniaman a banag ti tao malaksid no maited daytoy kenkuana manipud iti langit. 28 Mabalinyo a paneknekan ti imbagak 'Saan a siak ti Kristo' ngem iti imbagak, 'Naibaonak sakbay Kenkuana.' 29 Isuna nga addaan iti nobia ket isu ti nobio. Ti agtaktakder ken agdengdengngeg ita a gayyem iti nobio ket agrag-o iti kasta unay gapu iti timek iti nobio. Daytoy met ti nangan-anay iti pagragsakak. 30 Masapul a maitan-ok isuna, ket masapul a maipababaak. 31 Isuna nga immay a naggapu idiay ngato ket isu ti kangatoan iti amin. Isuna nga adda iti daga ket nagtaud iti daga ken agsasao kadagiti naindagaan a banbanag. Isuna nga immay a naggapu idiay langit ket isu ti kangatoan iti amin. 32 Panpaneknekkanna no ania ti nakitana ken nangngegna ngem awan ti mangawat iti pammaneknekna. 33 Isuna a nangawat iti pammaneknekna ket pinaneknekanna a pudno ti Dios. 34 Ta ibagbaga iti maysa nga imbaon iti Dios dagiti sasao iti Dios. Saanna nga it-ited ti Espiritu babaen iti panangrukod. 35 Ay-ayaten iti Ama ti Anak ken intedna amin a banbanag iti imana. 36 Isuna a mamati iti Anak ket maadaan iti biag nga agnanayon ngem isuna a saan nga agtulnog iti Anak ket saanna a makita ti biag ngem agnaed ti pungtot iti Dios kenkuana."