3 ¹ Рутнинг қайнонаси Наоми унга шундай деди: “Қизим, сенга яхши бўлиши учун сенга бошпана қидирсаммикин? ² Мана, Бўаз бизнинг қариндошимиздир, сен эса унинг чўрилари билан бирга бўлган эдинг. Мана, у бу кеча хирмонда арпа шопиради. ³ Ювингин, хушбўй мой суртиб, чиройли кийимларингни кийиб, хирмонга боргин, лекин у еб‑ичиб бўлмагунигача, унга кўринмагин. ⁴ У ухлашга ётганида, у ётган жойни билгин, шунда келиб, унинг оёқларини очгин ва ётгин. Шунда у сенга нима қилишинг кераклигини айтади”. ⁵ Рут унга: “Сиз менга айтганларингизнинг ҳаммасини қиламан”,- деди. ⁶ Сўнг у хирмонга бориб, қайнонаси унга қандай буюрган бўлса, ҳаммасини шундай қилди. ⁷ Бўаз еб‑ичиб тўйди, ўз кўнглини чоғ қилди ва ухлаш учун ғарам ёнига кетди. У яширинча келиб, унинг оёқларини очди ва ётди. ⁸ Бўаз ярим тунда чўчиб кетди ва туриб ўтирди – мана, унинг оёқлари ёнида аёл ётар эди. ⁹ Бўаз унга: “Сен кимсан?”- деди. У: “Мен – сизнинг чўрингиз Рутман, ўз қанотингизни чўрингиз устига узатинг, чунки сиз яқин қариндошсиз”,- деди. ¹⁰ Шунда Бўаз деди: “Қизим, сен Раббийдан барака топдинг! Сен бу охирги эзгу ишингни аввалгисидан ҳам яхши қилдинг, чунки камбағал ёки бой ёш кишилардан изламадинг. ¹¹ Шундай қилиб, қизим, қўрқма. Мен сенинг айтганларингни қиламан, чунки шаҳардаги менинг халқимнинг барчаси сенинг фазилатли аёл эканлигингни билади. ¹² Гарчи менинг яқин қариндош эканлигим ҳақиқат бўлса‑да, лекин мендан яқинроқ бўлган қариндош бор. ¹³ Бу кеча тунаб қолгин. Эртага эса у сени қабул қилса, яхши, майли қабул қилсин. Агарда у сени қабул қилишни хоҳламаса, унда мен сени қабул қиламан. Раббий тирик! Эрталабгача ухлагин”. ¹⁴ Шундай қилиб, у унинг оёқлари ёнида эрталабгача ухлади ва одам бировни таний оладиган вақтдан олдин турди. Бўаз: “Хирмонга аёл келганини билмасинлар”,- деди. ¹⁵ У яна: “Ёпинчиғингни олиб, тутиб тургин”,- деди. У тутиб турди ва Бўаз арпадан олти ўлчам ўлчаб, унга солди. Сўнгра у шаҳарга кетди. ¹⁶ Рут қайнонасининг олдига келганида, у: “Қандай бўлди, қизим?”- деди. У эса ўша одам унга қилган ҳамма нарсани айтиб берди. ¹⁷ Рут яна деди: “У менга бу олти ўлчам арпани берди ва менга: Қайнонангнинг олдига бўш қўл билан борма, деб айтди”. ¹⁸ Шунда у: “Қизим, бу иш нима бўлишини билмагунингча кутиб тургин. Чунки у одам ишни бугун тугатмагунича тинчланмайди”,- деди. 4‑боб