2 ¹ Наомининг эри томонидан қариндоши бўлмиш, Элималек оиласидан бўлган анча обрўли, Бўаз исмли бир киши бор эди. ² Мўаблик Рут Наомига: “Мен далага бораман ва кимнинг нигоҳида илтифот топсам, унинг ортидан бошоқларни тераман”,- деди. У унга: “Бор, қизим”,- деди. ³ У кетди ва далага келиб, ўроқчиларнинг ортидан бошоқларни тера бошлади. Шундай бўлдики, у келган даланинг бу қисми Элималек оиласидан бўлган Бўазга тегишли эди. ⁴ Мана, Бўаз Бейт-Леҳемдан келди ва ўроқчиларга: “Раббий сизлар билан!”- деди. Улар унга: “Раббий сени дуо қилсин!”- дедилар. ⁵ Шунда Бўаз ўроқчилар устидан назоратчи бўлган ўз хизматкорига: “Бу ёш аёл кимнинг аёли?”- деди. ⁶ Ўроқчилар устидан назоратчи бўлган хизматкор жавоб бериб: “Бу Мўаб еридан Наоми билан бирга келган мўаблик ёш аёл,- деди,- ⁷ Бу аёл: Менга ўроқчиларнинг ортидан боғламлар орасидан тушган бошоқларни теришга рухсат бер, деди. Шундай қилиб, у келиб, тонг саҳардан шу вақтгача шу ерда қолди. У уйида кам вақт бўлади”. ⁸ Шунда Бўаз Рутга деди: “Қизим, диққат билан қулоқ сол. Бошоқ териш учун бошқа далага борма ва бу ердан бошқасига ўтма, лекин шу ерда менинг чўриларим билан бирга бўлгин. ⁹ Сенинг кўзларинг улар ўраётган далада бўлсин ва уларнинг ортидан юргин. Мана, мен ўз хизматкорларимга сенга тегмасликни буюрдим. Чанқаганингда, сув идишининг олдига бориб, менинг хизматкорларим тортиб чиқарган сувдан ичгин”. ¹⁰ Шунда аёл юз тубан йиқилиб, ергача таъзим қилди ва унга: “Мен сизнинг нигоҳингизда қандай илтифот топдимки, гарчи мен ўзга ерлик бўлсам ҳам, сиз мени қабул қиляпсиз?”- деди. ¹¹ Бўаз унга жавоб бериб, деди: “Сен ўз эрингнинг ўлимидан сўнг қайнонанг учун нималар қилганингдан ҳамда ўз ота‑онангни, туғилган ерингни қолдириб, ўзинг билмаган халқнинг олдига келганингдан мен хабардорман. ¹² Раббий бу ишинг учун сени тақдирласин ва сен қанотлари остидан паноҳ излаб келган Исроилнинг Раббий Худосидан сенга тўлиқ мукофот бўлсин!” ¹³ Шунда у: “Мен сизнинг нигоҳингизда илтифот топайин, менинг ҳазратим, чунки сиз мени юпатдингиз ва гарчи мен сизнинг чўриларингизнинг бирига ярамасам‑да, чўрингизнинг юрагидагини гапирдингиз”,- деди. ¹⁴ Тушлик пайтида Бўаз унга: “Бу ёққа келиб нон егин, ўз нон бўлагингни сиркага ботиргин”,- деди. У ўроқчиларнинг ёнига ўтирди. У унга нон узатди, у еб тўйди ва яна ортиб қолди. ¹⁵ У бошоқ териш учун турганида, Бўаз ўз хизматкорларига буюриб деди: “У боғламлар орасидан тераверсин ва уни хафа қилманглар. ¹⁶ Шунингдек, ўзларинг ҳам унга атайлаб боғламлардан бошоқлар ташлаб кетинглар, у териб олсин ва уни койиманглар”. ¹⁷ Шундай қилиб, у кечгача далада бошоқ терди. Сўнгра у йиғиб олганини янчганида, эфага яқин арпа чиқди. ¹⁸ У буни олиб, шаҳарга кетди. Қайнонаси эса у йиғиб олган донни кўрди. Рут ўзи еб тўйган ноннидан қолганини қўйнидан чиқариб, унга берди. ¹⁹ Қайнонаси унга: “Бугун сен қаерда бошоқ тердинг ва ишладинг? Сени қабул қилган барака топсин!”- деди. Шунда у кимникида ишлаганини ўз қайнонасига маълум қилиб: “Мен бугун Бўаз исмли одамникида ишладим”,- деди. ²⁰ Наоми келинига: “Ўз илтифотини тириклардан ҳам, ўликлардан ҳам аямайдиган Раббийдан у барака топсин!”- деди. Наоми яна унга: “Бу одам бизга қариндош, у бизнинг яқин қариндошларимиздан бири”,- деди. ²¹ Шунда мўаблик Рут деди: “Бундан ташқари, у менга: Хизматкорларим менинг бутун ҳосилимни йиғиб тугатмагунича, улар билан бирга бўлгин, деди”. ²² Наоми ўз келини Рутга: “Қизим, сен унинг чўрилари билан юришинг яхшидир, токи бошқа даладагилар сени хафа қилмасинлар”,- деди. ²³ Шундай қилиб, арпа ва буғдой ўрими тугамагунича, Рут Бўазнинг чўрилари билан бирга бўлиб, бошоқ йиғди ва ўз қайнонаси билан бирга яшади.