3 ¹ Ниҳоят, биродарларим, Раббингизда қувонинглар. Мен учун сизларга шу нарсаларни ёзиш қийин эмас, сизлар учун эса бу хавфсизликка хизмат қилади. ² Итлардан эҳтиёт бўлинглар, ёвузлик қилувчилардан эҳтиёт бўлинглар, хатна қилинишдан эҳтиёт бўлинглар. ³ Чунки асл хатна – руҳ билан Худога хизмат қилаётган, Исо Масиҳ билан мақтанаётган, танавий фазилатларимизга таянмаётган бизмиз. ⁴ Бироқ мен танавий фазилатларимга ҳам таянишим мумкин. Агар бошқа кимдир танавий фазилатларига таянса, унда мен ундан ҳам кўпроқ таянишим мумкин: ⁵ мен саккиз кунлигимда хатна қилинганман. Мен Исроил наслидан, Бенямин қабиласидан, ибронийлардан туғилган ибронийман. Мен Қонун бўйича фарзийман, ⁶ рашким бўйича Худонинг Жамоатини қувғин қилувчиман, Қонундаги ҳақлик бўйича эса бенуқсонман. ⁷ Лекин менинг ўзим учун нима манфаатли бўлса, Масиҳ учун мен буни беҳуда, деб ҳисобладим. ⁸ Шубҳасиз, Раббим Исо Масиҳни билишнинг афзаллиги ҳақи мен ҳамма нарсани беҳуда, деб ҳисоблайман. У учун мен ҳамма нарсадан воз кечдим. Масиҳга эга бўлишим учун мен ҳамма нарсани ахлат, деб ҳисоблайман. ⁹ Мен Қонундан бўлган ўз ҳақлигим билан эмас, балки Масиҳга ишонишда асосланган ҳақлик билан, яъни имон орқали Худодан бериладиган ҳақлик билан Масиҳда топилишни хоҳлайман, ¹⁰ токи Унинг Ўзини ҳамда тирилишининг қудратини таниб билайин ва Унинг азобларида иштирок этиб, Унинг ўлимига уйғунлашиб, ¹¹ ўликларнинг тирилишига эришайин. ¹² Мен буларга эришганим ёки аллақачон баркамол бўлганим учун бундай демаяпман. Лекин Исо Масиҳ менга эришгани каби мен ҳам буларга эриша олармиканман, деб интиляпман. ¹³ Биродарларим, мен ўзимни буларга эришганман, деб ҳисобламаяпман. Фақат орқамдагиларни унутиб, олдимдагиларга интиляпман. ¹⁴ Мен бир мақсад сари, яъни Исо Масиҳдаги Худонинг олий унвонининг соврини сари босиб бормоқдаман. ¹⁵ Шунинг учун, баркамол бўлган бизнинг ҳаммамиз шундай фикр қилишимиз керак. Агарда бошқача фикр қилсангизлар, унда Худо буни ҳам сизларга очиб беради. ¹⁶ Бироқ биз нимага эришган бўлсак, шундай фикр қилишимиз ва ўша қоидага биноан яшашимиз керак. ¹⁷ Эй биродарлар, менга тақлид қилинглар ва бизнинг намунамиз бўйича ҳаракат қиладиганларга қаранглар. ¹⁸ Чунки кўп одамлар Масиҳ хочининг душманлари каби яшамоқдалар. Мен сизларга улар ҳақида тез-тез айтиб турар эдим, энди ҳатто кўз ёшим билан гапиряпман. ¹⁹ Уларнинг охирати – ҳалокат, уларнинг худоси – қорин, уларнинг шуҳрати – уларнинг шармандалигидадир. Улар ердаги нарсалар ҳақида фикр юритадилар. ²⁰ Бизнинг фуқаролигимиз эса – осмондадир. Биз у ердан Нажоткор Раббимиз Исо Масиҳнинг келишини кутмоқдамиз. ²¹ У Ўзига ҳамма нарсани бўйсундирадиган куч-қудрати билан бизнинг арзимас танамизни шундай ўзгартирадики, у Унинг шуҳратли танасига ўхшаб қолади.