2 ¹ Шундай қилиб, агар Масиҳдаги бирон юпанч, севгининг бирон тасаллиси, Руҳнинг бирон мулоқоти ҳамда меҳр-муҳаббат ва шафқат сизларда бор бўлса, ² унда менинг қувончимни мукаммал қилинглар: бир хил фикр қилиб, бир хил севгига эга бўлинглар, якдил ва ҳамфикр бўлинглар. ³ Ҳеч нарсани Рақобат ва шуҳратпарастлик бўйича қилманглар, лекин онгингиздаги камтарлик бўйича бир-бирингизни ўзингиздан аълороқ, деб ҳисобланглар. ⁴ Ҳар ким фақат ўз манфаатини эмас, балки бошқаларнинг манфаатини ҳам кўзласин. ⁵ Чунки Исо Масиҳда бўлган худди ўша фикр юритиш сизларда ҳам бўлиши керак. ⁶ Масиҳ Худонинг қиёфасида бўла туриб, Худога тенг бўлиш ҳурматини ўлжа қилмади. ⁷ Аксинча, У Ўзини паст олиб, қулнинг қиёфасига кирди ва инсонларга ўхшаб, кўринишида инсон каби бўлди. ⁸ У то ўлимгача, ҳатто хочдаги ўлимгача итоатли бўлиб, Ўзини бўйсундирди. ⁹ Шунинг учун Худо Уни жуда юксалтирди ва Унга ҳар қандай исмдан юқори бўлган исмни ато этди, ¹⁰ токи Исонинг номи олдида самодаги, ердаги ва ер остидаги ҳар қандай зот тиз чўксин, ¹¹ ва ҳар қандай тил Худо Отанинг шуҳратига Исо Масиҳни Раббий, деб очиқ иқрор этсин. ¹² Шундай қилиб, менинг севганларим, сизлар доимо итоаткор бўлганингиздек, энди нафақат мен сизларнинг ёнингизда бўлганимда, балки менинг йўқлигимда ҳам янада кўпроқ қўрқув ва титроқ билан ўз нажотингизни амалга оширинглар. ¹³ Чунки Худо Ўзининг илтифоти бўйича сизларнинг ичингизда хоҳишни ҳам, ҳаракатни ҳам туғдиради. ¹⁴ Ҳамма нарсани нолимай ва шубҳаланмай қилинглар, ¹⁵ токи сизлар бу қайсар ҳамда бузуқ насл орасида Худонинг беғубор, пок ва бенуқсон фарзандлари бўлиб, бу дунёда уларнинг орасида юлдузлар каби порланглар ¹⁶ ва ҳаёт Сўзини маҳкам тутинглар, токи менинг югурганим ва меҳнат қилганим беҳуда бўлмасин. Шу тариқа, Масиҳнинг кунида сизлар менинг мақтовим бўласизлар. ¹⁷ Агар мен имонингизнинг қурбонлиги ва хизмати учун қурбон бўлаётган бўлсам, унда мен қувоняпман ва ҳаммаларингизнинг қувончингизга шерик бўляпман. ¹⁸ Худди шундай сизлар ҳам қувонинглар ва менинг қувончимга шерик бўлинглар. ¹⁹ Сизларнинг аҳволингизни билиб, кўнглим тасалли топиши учун мен яқин орада сизларнинг олдингизга Тимўтийни юборишга Раббий Исода умид қиламан. ²⁰ Чунки сизлар ҳақингизда шундай самимийлик билан ғамхўрлик қиладиган унга тенг одамим йўқ. ²¹ Зеро ҳамма Исо Масиҳнинг эмас, балки ўз манфаатини излайди. ²² Лекин Тимўтийнинг содиқлиги сизларга маълум: у менга ўғил ўз отасига хизмат қилгандай, Хушхабарни ёйишимда хизмат қилди. ²³ Шундай қилиб, менга нима бўлишини билган заҳотиёқ сизларнинг олдингизга уни юборишга умид қиламан. ²⁴ Раббийдан аминманки, ўзим ҳам яқин орада сизларнинг олдингизга бораман. ²⁵ Бироқ сизларнинг юборган элчингиз ҳамда муҳтожлигимдаги хизматкорингиз, менинг биродарим, ҳамкорим ва сафдошим Эпафродитни сизларнинг олдингизга қайта юбориш кераклигини кўрдим. ²⁶ Чунки у ҳаммаларингизни соғинган ва унинг касаллиги ҳақида эшитганингиздан қаттиқ қайғурган эди. ²⁷ Ҳақиқатан ҳам, у касал бўлиб, ўлимга яқин эди. Лекин Худо унга раҳм қилди. Аммо нафақат унга, балки ғамимга ғам қўшилмаслиги учун менга ҳам раҳм қилди. ²⁸ Шундай қилиб, сизлар уни кўриб, янада қувонишингиз учун уни тезроқ олдингизга юбордим, токи мен ҳам камроқ қайғурай. ²⁹ Уни Раббийда бутун қувонч билан қабул қилинглар ва бундай кишиларни ҳурмат қилинглар. ³⁰ Чунки у Масиҳнинг иши учун ўлишига сал қолди. Сизларнинг менга қиладиган хизматингизнинг камчилигини тўлдириш учун у ўз ҳаётини хавфга солди.