4 ¹ Шундай қилиб, менинг севикли биродарларим – менинг қувончим ва тожимсизлар: эй, севганларим, Раббийда шундай мустаҳкам тураверинглар! ² Эводиядан ўтиниб сўрайман, Синтихиядан ўтиниб сўрайман: Раббийда ҳамфикр бўлинглар. ³ Сендан ҳам, эй, самимий ҳамкорим, сўрайман: ўша аёлларга ёрдам бер. Чунки улар мен ва Климент билан шунингдек, исмлари ҳаёт китобида ёзилган бошқа ҳамкорларим билан бирга Хушхабарни ёйишда курашган эдилар. ⁴ Раббийда доимо қувонинглар. Сизларга яна айтаман: қувонинглар. ⁵ Сизларнинг мулойимлигингиз барча одамларга маълум бўлсин. Раббий яқиндир. ⁶ Ҳеч нарса ҳақида ташвиш қилманглар, лекин ибодат, илтижо ва миннатдорчилик билан ҳамма нарсада ўз тилакларингизни Худога билдиринглар. ⁷ Шунда ҳар қандай тушунчадан юқори бўлган Худонинг тинчлиги сизларнинг юракларингизни ва фикр-мулоҳазаларингизни Исо Масиҳда сақлайди. ⁸ Ниҳоят, биродарларим, нима ҳақиқат, нима рост, нима адолатли, нима пок, нима ёқимли, нима шарафли, нима фазилатли ва нима мақтовли бўлса, шулар ҳақида фикр юритинглар. ⁹ Сизлар мендан нимани ўрганган, қабул қилган, эшитган ҳамда кўрган бўлсангизлар, шуни бажаринглар ва тинчлик Худоси сизлар билан бирга бўлади. ¹⁰ Энди сизлар яна менга ғамхўрлик қилишни бошлаганингиздан Раббийда жуда қувондим. Сизлар илгари ҳам ғамхўрлик қилар эдингизлар, аммо буни кўрсатишга фурсатингиз йўқ эди. ¹¹ Мен буни муҳтож бўлганим учун гапирмаяпман, чунки менда бори билан қаноатланишга ўрганиб қолдим: ¹² мен етишмовчиликда ҳам, мўлчиликда ҳам қандай яшашни биламан. Ҳар ерда ва ҳамма нарсада тўқ бўлишни, очликка тоқат қилишни, мўлчилик ва муҳтожликда бўлишни ўргандим. ¹³ Мени қўллаб-қувватлаётган Масиҳда мен ҳамма нарса қила оламан. ¹⁴ Бироқ менинг қайғуларимда иштирок этиб, сизлар яхши иш қилдингизлар. ¹⁵ Эй, Филиппиликлар, сизлар биласизларки, мен Хушхабарни воизлик қилишни бошлаб Македониядан чиққанимда, сизлардан бошқа ҳеч қайси Жамоат менга эҳсон ва меҳмондўстлик билан хизмат қилмаган эди. ¹⁶ Сизлар Салоника шаҳрига ҳам бир-икки марта менинг муҳтожликларимни қондириш учун менга ёрдам юборган эдингизлар. ¹⁷ Мен ҳадяни изламаяпман, лекин сизларнинг ҳисобингизга кўпаядиган ҳосилни излаяпман. ¹⁸ Мен ҳамма нарсани қабул қилдим ва мўлчиликда бўлдим. Сизларнинг хушбўй тутатқингизни, яъни Эпафродит орқали юборган Худога маъқул бўлган ёқимли қурбонлигингизни олиб, мен тўқ бўлиб юрибман. ¹⁹ Менинг Худойим эса сизларнинг ҳар қандай муҳтожликларингизни Ўз шуҳратининг бойлиги билан Исо Масиҳда қондиради. ²⁰ Худога ва бизнинг Отамизга абадулабад шон-шуҳрат бўлсин! Омин. ²¹ Исо Масиҳдаги ҳар бир муқаддасга салом айтинглар. Мен билан бирга бўлган ҳамма биродарлар сизларга салом айтмоқдалар. ²² Барча муқаддаслар, айниқса, императорнинг хонадонидагилари сизларга салом айтмоқдалар. ²³ Бизнинг Раббимиз Исо Масиҳнинг инояти сизларнинг руҳингиз биландир. Омин.