7 ¹ Фарзийлар ва Йерусалимдан келган уламолар Исонинг олдига йиғилдилар. ² Шунда Унинг шогирдларининг баъзилари ҳаром, яъни ювилмаган қўл билан нон еяётганларини кўриб, танбеҳ бердилар. ³ Зеро фарзийлар ва барча яҳудийлар, оқсоқолларнинг удумига риоя қилиб, қўлларини яхшилаб ювмай, овқат емайдилар. ⁴ Шунингдек, бозордан келиб, қўлларини ювмай, овқат емайдилар. Улар риоя қиладиган кўп бошқа нарсалар бор – пиёлалар, косалар, қозонлар ва хонтахталарни ювиш удуми ҳам бор. ⁵ Сўнг фарзийлар ва уламолар Ундан: “Нима учун шогирдларинг оқсоқолларнинг удумларига риоя қилмасдан, ювилмаган қўллар билан нон ейдилар?”- деб сўрадилар. ⁶ Исо жавоб бериб уларга деди: “Ишаъё сизлар, иккиюзламачилар ҳақингизда яхши башорат қилган, худди ёзилганидек: Бу халқ Мени тили билан иззат қилади, лекин уларнинг юраклари Мендан узоқда. ⁷ Лекин одамларнинг таълимотлари ва амрларини ўргатиб, Мени бекорга иззат қилмоқдалар. ⁸ Чунки сизлар Худонинг амрларини қолдириб, одамларнинг удумларига: косаларни, пиёлаларни ювиш ва кўплаб шунга ўхшаш нарсаларни бажаришга риоя қиласизлар”. ⁹ Сўнгра яна уларга деди: “Ўз удумларингизга риоя қилиш учун Худонинг амрини рад қилишингиз яхшими? ¹⁰ Зеро Мусо: Ота-онангни ҳурмат қилгин, ва: Ким отасини ёки онасини лаънатласа, ўлим билан ўлсин,- деб айтган. ¹¹ Сизлар эса: Агар одам ўз отаси ёки онасига: Мана – Корбан, яъни сиз мендан фойдаланишингиз мумкин бўлгани Худога инъом,- деса, ¹² унда ўша одам ўз отасига ёки онасига ҳеч нарса қилмаслиги мумкин,- дейсизлар. ¹³ Сизларнинг ўзларингиз ўрнатган ўз удумларингиз билан Худонинг Сўзини бекор қилиб, яна шунга ўхшаш кўп ишларни қиласизлар-ку!” ¹⁴ Кейин Исо бутун халқни чақириб уларга: “Ҳаммаларингиз Менга қулоқ солинглар ва англаб етинглар,- деди,- ¹⁵ Одамнинг ичига ташқаридан кирган ҳеч нарса уни ҳаром қилмайди, лекин унинг ичидан чиққан нарсалар уни ҳаром қилади. ¹⁶ Кимнинг эшитишга қулоғи бўлса, эшитсин!” ¹⁷ Исо халқни қолдириб, уйга кирганида, Унинг шогирдлари Ундан масал ҳақида сўрадилар. ¹⁸ У эса уларга: “Наҳот сизлар ҳам шунчалик бефаҳмсизлар?- деди,- Ташқаридан одамнинг ичига кирган ҳеч нарса уни ҳаром қила олмаслигини наҳот тушунмасангизлар? ¹⁹ Чунки бу нарсалар унинг юрагига эмас, балки қорнига киради ва ташқарига чиқиб кетади”. Шу билан ҳамма таомлар тозаланади. ²⁰ Кейин У деди: “Одамнинг ичидан чиқадигани одамни ҳаром қилади. ²¹ Чунки ичидан, одамнинг юрагидан ёвуз фикрлар, зино, фоҳишабозлик, қотилликлар, ²² ўғирликлар, тамагирлик, бетавфиқлик, маккорлик, ҳирс, ҳасадли кўз, куфрлик, мағрурлик, аҳмоқлик чиқади. ²³ Ана шу ёмонликнинг барчаси ичидан чиқиб, одамни ҳаром қилади”. ²⁴ Сўнг у ердан жўнаб, Исо Тир ва Сидўн ҳудудларига келди. У бир уйга кирди ва буни ҳеч ким билмаслигини истаган эди, лекин яширин қола олмади. ²⁵ Чунки қизини нопок руҳ чалган бир аёл У ҳақида эшитиб қолди-да, келиб Унинг оёғига йиқилди. ²⁶ Бу аёл Суриянинг Финикия юртида туғилган бўлиб, юнон эди. У қизидан жинни қувиб юборишини Исодан ўтиниб сўради. ²⁷ Лекин Исо унга: “Аввал болалар тўйишсин, чунки нонни болалардан олиб, итларга ташлаш яхши эмас”,- деди. ²⁸ Аёл эса Унга жавоб бериб: “Худди шундай, Ҳазратим, бироқ итлар ҳам хонтахтанинг тагида болалардан тушган ушоқлардан ейишади”,- деди. ²⁹ Шунда Исо унга: “Шу сўзинг учун боравер, жин сенинг қизингдан чиқиб кетди”,- деди. ³⁰ Аёл бориб уйига келганда, жин чиқиб кетганини ва қизи тўшакда ётганини кўрди. ³¹ Исо Тир ва Сидўн чегараларидан чиқиб, Декаполис ҳудудлари орқали яна Галиле денгизига келди. ³² Унинг олдига кар ва тутилиб гапирадиган бир одамни олиб келиб, Исодан унга қўлини қўйишини сўрадилар. ³³ Исо уни халқдан четроққа олиб ўтиб, унинг қулоқларига бармоқларини қўйди ва тупуриб унинг тилига тегинди. ³⁴ Сўнг осмонга қараб чуқур хўрсинди-да, унга: “Эффата!”- деди. (Эффата эса “Очилгин” демакдир). ³⁵ Шу заҳоти унинг қулоқлари очилиб, унинг тилининг боғлангани ечилиб кетди ва у аниқ гапира бошлади. ³⁶ Исо эса унга буни ҳеч кимга айтмасликларини буюрди. Лекин У одамларга қанча кўп тақиқласа ҳам, улар шунча кўп овоза қилар эдилар. ³⁷ Шунда барча ҳаддан ташқари ҳайратланиб: “У ҳамма нарсани яхши қиляпти: карларни эшитадиган ва гунгларни гапирадиган қиляпти”,- дер эди.