13 ¹ У маъбаддан чиқаётганида, Унинг шогирдларидан бири Унга: “Устоз, қара, қандай тошлар ва қандай бинолар-а!”- деди. ² Исо унга жавобан: “Бу буюк биноларни кўряпсанми? Буларнинг ҳаммаси шундай барбод қилинадики, тош устида тош қолмайди”,- деди. ³ Сўнг Исо Зайтун тоғида, яъни маъбаднинг қаршисида ўтирганида, Петъёр, Ёқуб, Юҳанно ва Андер Ундан алоҳида сўрадилар: ⁴ ”Бизга айтгин, булар қачон содир бўлади? Буларнинг ҳаммасининг амалга ошишининг аломати нима бўлади?” ⁵ Исо уларга жавобан гапиришни бошлади: “Эҳтиёт бўлинглар, ҳеч ким сизларни аврамасин. ⁶ Чунки кўплар Менинг номимдан келиб: Бу менман,- дейдилар ва кўпларни аврайдилар. ⁷ Уруш ва урушлар ҳақидаги овозаларни эшитганингизда даҳшатга тушманглар, зеро булар содир бўлиши керак, бироқ бу ҳали охири эмас. ⁸ Чунки халқ халққа ва шоҳлик шоҳликка қарши кўтарилади. Айрим жойларда зилзилалар бўлади, шунингдек, очарчиликлар бўлади. Бу эса дарднинг бошланишидир. ⁹ Лекин ўзларингизни эҳтиёт қилинглар, чунки сизларни суд маҳкамаларига топширишади ва синагогаларда калтаклашади. Шоҳлару ҳокимларга гувоҳлик беришингиз учун сизларни Мен туфайли уларнинг олдиларига олиб боришади. ¹⁰ Бироқ аввал бутун халқларга Хушхабар воизлик қилиниши шарт. ¹¹ Сизларни олиб бориб, маҳкамаларга топширганларида, нимани гапирсам экан, деб олдиндан хавотир олманглар ва ўйланманглар. Аммо ўша вақтда сизларга нима берилса, шуни сўзланглар, чунки буни сизлар эмас, Муқаддас Руҳ сўзлайди. ¹² Биродар биродарини ва ота ўғлини ўлимга топширади, болалар оталарига қарши кўтарилиб, уларни ўлдирадилар. ¹³ Менинг номим учун барча одамлар сизлардан нафратланадилар, аммо охиригача чидаган нажот топади. ¹⁴ Сизлар ҳувиллаш жирканчлигининг керак бўлмаган жойда турганини кўрганингизда, ўқиётганнинг ўзи англасин: Яҳудияда бўлганлар тоққа югурсинлар, ¹⁵ томнинг тепасида бўлганлар уйга тушмасинлар ва уйдан бирор нарсани олиш учун у ерга кирмасинлар, ¹⁶ далада бўлганлар кийимларини олиш учун орқага қайтмасинлар. ¹⁷ Ўша кунларда ҳомиладор ва эмизикли аёлларнинг ҳолига вой! ¹⁸ Сизларнинг қочишингиз қишга тўғри келмаслиги учун ибодат қилинглар. ¹⁹ Чунки ўша кунларда, Худо яратган мавжудот бошланишидан буён ҳозиргача бўлмаган, келажакда ҳам бўлмайдиган қайғу бўлади. ²⁰ Агар Раббий ўша кунларни қисқартирмаганида эди, ҳеч ким нажот топмас эди. Аммо Раббий танлаб олган Ўзининг танланганлари учун ўша кунларни қисқартирди. ²¹ Ўшанда, агар бирортаси сизларга: “Мана, Масиҳ бу ерда”, ёки: “Мана, у ерда”,- деса, ишонманглар. ²² Чунки сохта масиҳлар ва сохта пайғамбарлар пайдо бўлиб, иложи бўлса, танланганларни ҳам авраш учун аломату мўъжизалар кўрсатадилар. ²³ Сизлар эса эҳтиёт бўлинглар. Мана, Мен сизларга ҳаммасини олдиндан айтдим. ²⁴ Аммо шу кунларда, ўша қайғулардан сўнг қуёш қоронғилашади ва ой ҳам ўз нурини бермай қолади. ²⁵ Осмондаги юлдузлар ҳам қулаб тушади ва осмоннинг кучлари тебранади. ²⁶ Шунда буюк қудрат ва шуҳрат билан булутларда келаётган Инсон Ўғлини кўрадилар. ²⁷ Ўшанда У фаришталарини юбориб, Ўзининг танланганларини тўрт шамолдан: ернинг ҳудудидан, осмоннинг ҳудудигача йиғиб олади. ²⁸ Анжир дарахтидан қиёс олинглар: унинг новдалари юмшоқ бўлиб, барг ёзганида, ёз яқинлашганини билиб оласизлар. ²⁹ Худди шундай, сизлар ҳам буларнинг содир бўлаётганини кўрганингизда – бунинг яқин эканлигини, яъни эшик олдида турганлигини билиб олинглар. ³⁰ Сизларга ростини айтаманки, бу воқеаларнинг ҳаммаси содир бўлмагунча, бу насл ўтиб кетмайди. ³¹ Осмон ва ер ўтиб кетади, аммо Менинг сўзларим ўтиб кетмайди. ³² Лекин ўша кун ва соат ҳақида бирон одам ҳам, Осмондаги фаришталар ҳам, Ўғил ҳам билмайди, фақат ёлғиз Менинг Отам билади. ³³ Ҳушёр ва бедор бўлиб, ибодат қилинглар, чунки бу вақт-соат қачон келишини сизлар билмайсизлар. ³⁴ Бу худди сафарга кетаётган одамга ўхшайди: у ўз уйини тарк этаётганида, ўз хизматкорларига ҳокимият бериб, уларнинг ҳар бирига ўз ишини тақсимлайди ҳамда дарвозабонга бедор бўлишни амр қилади. ³⁵ Шундай қилиб, бедор бўлинглар, чунки уйнинг эгаси қачон келишини – оқшомдами, ярим тундами, хўроз қичқирадиган вақтдами, ёки тонгдами – сизлар билмайсизлар, ³⁶ токи у кутилмаганда келиб, сизларни ухлаб ётган ҳолда топмасин. ³⁷ Сизларга айтаётганимни эса, ҳаммага айтаман: Бедор бўлинглар”.