3 ¹ Соат тўққизда ибодат вақти бўлганида, Петъёр Юҳанно билан бирга маъбадга бораётган эдилар. ² У ерда онасининг қорниданоқ шол бўлган бир киши бор эди. Маъбадга кираётганлардан садақа сўраш учун уни ҳар куни маъбаднинг “Гўзал”, деб аталган дарвозаси олдига келтириб қўяр эдилар. ³ У маъбадга кириб бораётган Петъёр ва Юҳаннони кўргач, улардан садақа сўради. ⁴ Аммо Петъёр ва Юҳанно унга тикилиб қараб: “Бизга қара!”- дедилар. ⁵ У эса улардан бирор нарса олишни кутиб, уларга диққат билан қаради. ⁶ Шунда Петъёр унга: “Менда кумуш ва олтин йўқ, аммо нимага эга бўлсам, шуни сенга бераман: нозарий Исо Масиҳ номидан ўрнингдан туриб юр!”- дея, ⁷ уни ўнг қўлидан ушлаб кўтарди. Дарҳол унинг тўпиқлари ва тиззалари мустаҳкамланиб қолди. ⁸ У сакраб ўрнидан турди-ю, юра бошлади. Худони мақтаб, сакраб-сакраб юриб, улар билан бирга маъбадга кирди. ⁹ Шунда бутун халқ унинг юраётганини ва Худони мақтаётганини кўрди. ¹⁰ Шу орада улар маъбаднинг “Гўзал” деган дарвозаси ёнида садақа сўраш учун ўтирган одам ўша эканини танишгач, у билан содир бўлган воқеадан таажжубландилар ва ҳайратда қолдилар. ¹¹ Шифо топган шол Петъёр билан Юҳаннонинг ёнида тургани учун бутун халқ ҳайратланиб, уларнинг олдига “Сулаймонники”, деб аталган равоққа югуриб келди. ¹² Буни кўргач, Петъёр халққа деди: “Эй, Исроил эркаклари! Нима учун бунга ҳайрон бўляпсизлар? Гўё биз ўз қудратимиз ёки диёнатимиз билан уни юргизганимиздай, нимага бизга қараяпсизлар? ¹³ Мана, Иброҳим, Исҳоқ ва Ёқубнинг Худоси, оталаримизнинг Худоси Ўзининг Қули Исони улуғлади. Сизлар эса Унга хиёнат қилдингизлар ва Пилат Уни қўйиб юборишга қарор қилганида, Пилатнинг олдида Уни рад этдингизлар. ¹⁴ Шундай қилиб, сизлар муқаддас ва ҳақ Бўлганни рад этдингизлар, қотил одамнинг эса сизларга бахш этилишини сўраб, ¹⁵ Ҳаёт Сарварини ўлдирдингизлар. Аммо Худо Уни тирилтирди, бунга эса биз гувоҳмиз. ¹⁶ Мана, Исонинг номига ишониш орқали Унинг номи бу сизлар кўрган ва билган одамни қувватлантирди. Раббийдан бўлган имон ҳаммаларингизнинг олдингизда унга шифо берди. ¹⁷ Энди, биродарлар, мен биламанки, бошлиқларингиз каби сизлар ҳам буни билмасдан қилдингизлар. ¹⁸ Худо эса Ўзининг ҳамма пайғамбарларининг оғзи билан Масиҳнинг азоб чекишини олдиндан қандай хабар қилган бўлса, шундай бажо келтирди. ¹⁹ Шунинг учун гуноҳларингиз ўчириб ташланиши учун тавба қилинглар ва Худога ўгирилинглар, ²⁰ токи Худонинг ҳузуридан сизларга ором вақтлари келсин ҳамда Худо аввалдан тайинлаган Исо Масиҳни олдингизга юборсин. ²¹ Худо қадимдан бери Ўзининг барча муқаддас пайғамбарлари томонидан айтганларининг ҳаммасини тиклаш вақтигача осмон Масиҳни қабул қилиши керак эди. ²² Мусо оталаримизга айтган эди: Раббий сизларнинг Худойингиз сизларга биродарларингиз орасидан мен каби бир Пайғамбарни кўтаради. У сизларга нимаики айтса, ҳаммасига қулоқ солинглар. ²³ Шундай бўладики, ўша Пайғамбарга қулоқ солмаган ҳар бир жон халқ орасидан қириб ташланади. ²⁴ Шунингдек, Шомуил пайғамбардан бошлаб, ундан кейин гапирган барча пайғамбарлар ҳам шу кунлар ҳақида башорат қилганлар. ²⁵ Сизлар эса пайғамбарларнинг ҳамда Худо оталарингиз билан тузган аҳднинг фарзандларисизлар, чунки Худо Иброҳимга: Ер юзидаги барча миллатлар сенинг уруғингда барака топадилар,- деди. ²⁶ Худо Ўзининг Қули Исони тирилтириб, сизларнинг ҳар бирингизни ёвуз ишларингиздан қайтариш ва сизларга барака ато қилиш учун Уни биринчи навбатда сизларга юборди”.