26 ¹ Агриппа Повулга: “Ўзинг учун гапиришингга рухсат берилади”,- деди. Шунда Повул қўлини узатиб, ўзини ҳимоя қила бошлади: ² “Подшоҳ Агриппа! Бугун сизнинг ҳузурингизда яҳудийларнинг менга қўйган ҳамма айбларидан ўзимни ҳимоя қила олишим учун ўзимни бахтиёр, деб ҳисоблайман. ³ Бунинг устига, сиз яҳудийларнинг барча одатларини ва масалаларини яхши биласиз. Шунинг учун мени сабр билан тинглашингизни илтимос қиламан. ⁴ Энг бошида менинг ёшлигимдан ўз халқим орасида, Йерусалимда бўлган ҳаёт тарзимни барча яҳудийлар биладилар. ⁵ Улар мени узоқ вақтдан бери танийдилар. Агар хоҳласалар, динимизнинг энг жиддий таълимоти бўйича фарзий бўлиб яшаганимга гувоҳлик бера оладилар. ⁶ Энди эса, мен Худонинг оталаримизга берган ваъдасига умид қилганим учун суд олдида турибман. ⁷ Шу ваъда амалга ошиши умидида ўн икки қабиламиз Худога кечаю кундуз ғайрат билан хизмат қилмоқдалар. Худди шу умид учун, эй, подшоҳ Агриппа, яҳудийлар мени айбламоқдалар. ⁸ Нима энди? Худо ўликларни тирилтиришига ишониб бўлмас, деб ҳисоблайсизми? ⁹ Тўғриси, ўзим ҳам нозарий Исо номига қарши кўп иш қилиш керак, деб ўйлар эдим. ¹⁰ Мен буни Йерусалимда қилдим ҳам. Олий руҳонийлардан ҳокимият олиб, кўп муқаддасларни зиндонларга ташлаб, уларни ўлдиришларига овоз берар эдим. ¹¹ Барча синагогаларда уларни кўп маротаба жазога тортиб, Исони ҳақоратлашга мажбур қилар эдим. Уларга қарши ҳаддан ташқари қутуриб, ҳатто бегона шаҳарларда ҳам қувғин қилар эдим. ¹² Шу мақсадда олий руҳонийларнинг ҳокимияти ва топшириғи билан Дамашққа бораётганимда, ¹³ мана, подшоҳим, куннинг қоқ ўртасида мен йўлда осмондан қуёш ёғдусидан ҳам ярқироқ нурни кўрдим. Ўша нур мени ва мен билан кетаётганларни ёритди. ¹⁴ Биз ҳаммамиз ерга йиқилганимизда, менга яҳудий тилида гапираётган овозни эшитдим: Шоул, Шоул, нега Мени қувғин қиляпсан? Нишга қарши тепишинг қийин. ¹⁵ Мен эса: Ё, Раббий, Сен кимсан?- дедим. Мен сен қувғин қилаётган Исоман,- деди У,- ¹⁶ Энди, ўрнингдан тур, оёққа тур! Чунки сен кўрган нарсага ва Мен сенга келажакда кўрсатадиган нарсаларимга гувоҳ ва хизматкор бўлишга тайинлаш мақсадида Мен сенга зоҳир бўлдим. ¹⁷ Сени ўз халқингга ҳамда мажусийларга юбораман ва улардан халос қиламан. ¹⁸ Уларнинг кўзларини очиб, зулматдан нурга ва шайтоннинг ҳокимиятидан Худога қайтариш учун, улар Менга бўлган имон орқали гуноҳлари кечирилишига ва муқаддасланганлар билан меросга эришишлари учун сени юбораман. ¹⁹ Шунинг учун, эй, подшоҳ Агриппа, мен самовий ваҳийга итоатсизлик қилмадим. ²⁰ Лекин аввал Дамашқ ва Йерусалим аҳолисига, кейин бутун Яҳудия юртига ва мажусийларга воизлик қилиб юрдим, токи улар тавба қилиб ва Худога ўгирилиб, тавбага лойиқ ишларни қилсинлар. ²¹ Шу сабабдан яҳудийлар мени маъбадда тутиб, ўлдиришга ҳаракат қилдилар. ²² Лекин мен Худодан ёрдам олиб, шу кунга қадар каттаю кичикка гувоҳлик бериб юрибман. Мусо ва пайғамбарлар содир бўлишини башорат қилган нарсалардан бошқа ҳеч нарсани гапирмаяпман, ²³ яъни, Масиҳ яҳудийлару мажусийларга нурни эълон қилиш учун азоб чекиб ўлиши ҳамда ўликлардан биринчи бўлиб тирилиши керак эди”. ²⁴ Повул ўзини шундай ҳимоя қилганида, Фест баланд овоз билан: “Телбалик қиляпсан, Повул! Ўта билимдонлигинг сени ақлдан оздиряпти!”- деди. ²⁵ “Мен телбалик қилмаяпман, Фест жаноби олийлари,- деди Повул,- аммо ҳақиқат ва соғлом онг сўзларини айтяпман. ²⁶ Подшоҳ булар ҳақида билгани учун ҳам унинг ҳузурида бемалол гапирмоқдаман. Бу воқеалардан ҳеч бири ундан яширин эмаслигига аминман, чунки бу бурчакда содир бўлган эмас. ²⁷ Эй, подшоҳ Агриппа, пайғамбарларга ишонасизми? Биламан, ишонасиз!” ²⁸ Шунда Агриппа Повулга жавобан: “Сен мени масиҳий бўлишга қарийб ишонтиряпсан”,- деди. ²⁹ Повул эса: “Озми, кўпми, нафақат сиз, балки бугун мени тинглаётганларнинг ҳаммалари ҳам занжирбандлигимдан ташқари мен каби бўлишларини Худодан сўрар эдим!”- деди. ³⁰ Повул буни айтганида, подшоҳ, ҳоким ва Берника ҳамда улар билан бирга ўтирганлар ўринларидан турдилар. ³¹ Четга чиқиб, ўзаро: “Бу одам ўлимга ёки занжирбандликка лойиқ ҳеч бир иш қилмаяпти”,- дейишар эди. ³² Сўнг Агриппа Фестга: “Агар бу одам императорнинг ҳукмини талаб қилмаганида, уни озод қилса бўлар эди”,- деди.