24 ¹ Унинг кунларида Бобил подшоҳи Набукаднезар кўтарилди ва Йеҳойаким уч йил унинг ҳокимияти остида бўлди, лекин кейин Йеҳойаким ундан ажралди. ² Раббий унга қарши қалдийликларнинг, сурияликларнинг, мўабликлар ва аммўнликларнинг тўдаларини юборар эди. Раббий Ўз қуллари пайғамбарлар орқали айтган сўзи бўйича уларни Яҳудияга қарши, уни вайрон қилиш учун юборар эди. ³ Манашеҳнинг гуноҳлари, унинг қилган барча ёвуз ишлари туфайли Яҳудияни Раббийнинг юзидан рад қилиш учун Раббийнинг буйруғи бўйича бу нарса Яҳудияда содир бўлди. ⁴ Шунингдек, Манашеҳ тўккан бегуноҳ қонлар учун бу нарса содир бўлди, чунки у Йерусалимни бегуноҳ қон билан тўлдирди. У тўккан бегуноҳ қон учун Раббий кечиришни истамади. ⁵ Йеҳойакимнинг қолган фаолияти ва унинг қилган барча ишлари Яҳудия подшоҳлари йилномаси китобида ёзилган. ⁶ Йеҳойаким кўз юмиб, ўз оталарига қўшилди ва унинг ўрнига унинг ўғли Йеҳойакин подшоҳ бўлди. ⁷ Миср подшоҳи ўз еридан бошқа чиқмади, чунки Бобил подшоҳи Миср подшоҳига тегишли бўлган Миср дарёсидан Фурот дарёсигача бўлган ҳамма ерни олиб қўйди. ⁸ Йеҳойакин подшоҳ бўлганида, ўн саккиз ёшда эди. У Йерусалимда уч ой ҳукмронлик қилди. Унинг онасининг исми Неҳушта бўлиб, у йерусалимлик Элнатаннинг қизи эди. ⁹ Унинг отаси қилгани каби у ҳам ҳамма нарсада Раббийнинг нигоҳида ёвуз ишларни қилар эди. ¹⁰ Ўша вақтда Бобил подшоҳи Набукаднезарнинг қуллари яна Йерусалимга қарши кўтарилдилар ва шаҳарни қамал қилдилар. ¹¹ Бобил подшоҳи Набукаднезарнинг қуллари шаҳарни қамал қилганларида, подшоҳнинг ўзи шаҳарга келди. ¹² Яҳудиянинг подшоҳи Йеҳойакин ва унинг онаси, хизматкорлари, ҳокимлари ва бичилган қуллари Бобил подшоҳининг олдига чиқдилар. Бобил подшоҳи ўзининг ҳукмронлигининг саккизинчи йилида уни қўлга олди. ¹³ У Раббий уйининг ва подшоҳ уйининг хазинасини олиб чиқди. Раббий айтганидек, Исроил подшоҳи Сулаймон Раббийнинг маъбадида ясаган барча олтин идишларни у синдирди. ¹⁴ У бутун Йерусалимни, барча ҳокимларни, бутун жасур қўшинни, барча дурадгорларни ҳамда темирчиларни кўчириб кетди. Кўчириб кетилганлар эса ўн минг нафар эди. Ернинг энг қашшоқ аҳолисидан бўлак ҳеч ким қолмади. ¹⁵ У Йеҳойакинни ҳам Бобилга кўчириб кетди. У подшоҳнинг онасини, подшоҳнинг хотинларини, унинг бичилган қулларини ҳамда ернинг жасур кишиларини Йерусалимдан Бобилга кўчириб кетди. ¹⁶ Шунингдек, Бобил подшоҳи етти минг кишидан иборат бутун қўшинни, минг нафар рассом ва қурувчиларни, урушга борадиган барча жасурларни Бобилга кўчириб кетди. ¹⁷ Бобил подшоҳи Йеҳойакин ўрнига унинг амакиси Маттанийаҳни подшоҳ қилди ва унинг исмини Сидқийаҳ, деб атади. ¹⁸ Сидқийаҳ подшоҳ бўлганида, йигирма бир ёшда эди. У Йерусалимда ўн бир йил ҳукмронлик қилди. Унинг онасининг исми Ҳамутал бўлиб, у либнаҳлик Йеремийаҳнинг қизи эди. ¹⁹ Йеҳойакин қилгани каби у ҳам ҳамма нарсада Раббийнинг нигоҳида ёвуз ишларни қилар эди. ²⁰ Йерусалим ва Яҳудога Раббийнинг ғазаби шу қадар кучли эдики, У уларни Ўз юзидан рад этди. Сидқийаҳ Бобил подшоҳига қарши исён қилди.